បាត់ដំបង៖ អនុរដ្ឋលេខាធិការក្រសួងសាធារណការ និងដឹកជញ្ជូន ឯកឧត្តម ឯក រដ្ឋ នៅថ្ងៃទី២១ ខែកក្កដា ឆ្នាំ២០២២នេះ បានដឹកនាំក្រុមមន្ត្រីជញ្ជីងចល័តរបស់ក្រសួងដោយផ្ទាល់ សហការជាមួយមន្ទីរសាធារណការនិងដឹកជញ្ជូនខេត្តបាត់ដំបងឆ្មក់ចុះពិនិត្យរករថយន្តដឹកជញ្ជូនលើសទម្ងន់ នៅតាមផ្លូវជាតិលេខ៥៩ ក្នុងភូមិសាស្ត្រស្រុកភ្នំព្រឹក ខេត្តបាត់ដំបង។ បើតាមឯកឧត្ដម ឯក រដ្ឋ បានឲ្យភ្នាក់ងារ The Mirror News ដឹងនៅល្ងាចថ្ងៃ២១ កក្ដដានេះថា ក្រុមមន្ត្រីជញ្ជីងចល័តក្រសួងបានចុះមកពិនិត្យជាលើកទី៣ហើយនិងបន្តនៅថ្ងៃស្អែកទី២២ ខែកក្កដា ឆ្នាំ២០២២មួយថ្ងៃទៀតជាលើកទី៤ ដោយយោងតាមប្រសាសន៍ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនថា មានក្រុមរថយន្តនៅបន្តលួចលាក់ដឹកលើសទម្ងន់។ ឯកឧត្តម ឯក រដ្ឋ បានបន្តថា ជាក់ស្តែងក្រុមការងារក្រសួងបានចុះដល់គោលដៅ នៅឃុំអូររំដួល ស្រុកភ្នំព្រឹក ខេត្តបាត់ដំបងនិងបានធ្វើការពិនិត្យរថយន្តចំនួន២២គ្រឿង ដែលជារថយន្តឈ្មួញថៃចូលមកទិញពោតក្រហមនៅតាមព្រំដែនកម្ពុជា-ថៃ ប៉ុន្តែរថយន្តទាំង២២គ្រឿងនោះ មិនមានរថយន្តណាមួយដឹកលើសកម្រិតទម្ងន់កំណត់ដោយច្បាប់នោះឡើយ និងមិនបានផាកពិន័យទេ។ ឯកឧត្តម ឯក រដ្ឋ បានបញ្ជាក់ថា កាលពីថ្ងៃទី១០ កក្កដាកន្លងទៅថ្មីៗនេះ ក្រុមការងារក្រសួងសាធារណការនិងដឹកជញ្ជូនបានធ្វើផ្សព្វផ្សាយនិងបានជម្រាបជូនដល់ជនជាតិថៃដែលជាអ្នករកស៊ីឲ្យគោរពច្បាប់ដឹកជញ្ជូនរបស់កម្ពុជា ហើយប្រជាជនក៏មានការយល់ដឹងស្ដីពីច្បាប់នៃការដឹកជញ្ជូនផងដែរ។ ឯកឧត្តមបានចាត់ទុកការមិនដឹកលើសទម្ងន់នៃរថយន្តរបស់ឈ្មួញថៃទាំងនេះ ជាការបង្ហាញឱ្យឃើញពីការភ្ញាក់រលឹក និងការចូលរួមគោរពច្បាប់ដឹកជញ្ជូនរបស់កម្ពុជាពីសំណាក់ឈ្មួញរបស់ថៃ ក៏ដូចជាក្រុមសៃឡូ ដែលជាឈ្មួញកណ្តាលនៅក្នុងប្រទេសកម្ពុជា។ ឯកឧត្តម ឯក រដ្ឋ បានគូសបញ្ជាក់ថា ក្នុងប្រតិបត្តិការនេះមិនបានធ្វើឲ្យប៉ះពាល់ដល់កសិផលរបស់កសិករខ្មែរយើងទេ ហើយក៏មិនបានបង្កការរាំងស្ទះដល់ការប្រមូលទិញពោតក្រហមនៅតាមព្រំដែនក្នុងខេត្តបាត់ដំបងនោះឡើយ ព្រោះឈ្មួញថៃនៅតែបន្តចូលមកប្រមូលទិញពោតក្រហមពីកម្ពុជា នៅតាមព្រំដែនក្នុងភូមិសាស្ត្រខេត្តបាត់ដំបងជាធម្មតា។ ជាមួយគ្នានោះ ឯកឧត្តម ឯក រដ្ឋ បានអំពាវនាវដល់បងប្អូនប្រជាពលរដ្ឋ ទាំងក្រុមហ៊ុនដឹកជញ្ជូនទាំងអស់ ទោះបីជានៅជាយដែនក៏ដោយ សូមគោរពច្បាប់ផ្លូវថ្នល់ ជៀសវាងការដឹកលើសកម្រិតទម្ងន់កំណត់ជាហេតុធ្វើឲ្យផ្លូវថ្នល់ឆាប់ខួច រថយន្តក៏ងាយខួច ហើយអាចបង្កឲ្យមានគ្រោះថ្នាក់ចរាចរណ៍កើតឡើងទៀត។ ឯកឧត្តមបន្តអំពាវនាវទៀតថា កុំឲ្យបុគ្គលណា ក្រុមហ៊ុនណាទៅអន្តរាគមន៍ជួយ ដែលពាក់ព័ន្ធការងារដឹកលើសទម្ងន់កម្រិតកំណត់នេះ ព្រោះថាកាលណាអន្តរាគមន៍គឺខុសពីច្បាប់ស្ដីពីផ្លូវថ្នល់៕