សន្និសីទឧត្តមមន្រ្តីដឹកជញ្ជូនអាស៊ាន-ជប៉ុន លើកទី២០ តាមប្រព័ន្ធវីដេអូពីចម្ងាយ មានការចូលរួមពីសំណាក់គណៈប្រតិភូពីភាគីកម្ពុជា ថ្នាក់ដឹកនាំឧត្តមមន្រ្តីដឹកជញ្ជូន(STOM Leaders) របស់បណ្តាប្រទេសអាស៊ាន ថ្នាក់ដឹកនាំឧត្តមមន្រ្តីដឹកជញ្ជូនរបស់ជប៉ុន និងលេខាធិការដ្ឋានអាស៊ាន ថ្ងៃព្រហស្បតិ៍ ៨ រោច ខែអាសាឍ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី ២១ ខែកក្កដា ឆ្នាំ២០២២ នៅទីស្តីការក្រសួង លោក គិត ចន្ទដារារិទ្ធ អគ្គនាយករងនៃអគ្គនាយកដ្ឋានភស្តុភារកម្ម តំណាងឯកឧត្តមអគ្គនាយក ឈៀង ពេជ្រ ប្រធានឧត្តមមន្ត្រីដឹកជញ្ជូនអាស៊ាន បានអញ្ជើញដឹកនាំគណៈប្រតិភូកម្ពុជា ចូលរួមសន្និសីទឧត្តមមន្រ្តីដឹកជញ្ជូន អាស៊ាន-ជប៉ុន លើកទី២០ ដោយមានការចូលរួមតាមប្រព័ន្ធវីដេអូពីចម្ងាយពីសំណាក់ថ្នាក់ដឹកនាំឧត្តមមន្រ្តីដឹកជញ្ជូន(STOM Leaders) របស់បណ្តាប្រទេសអាស៊ានទាំងអស់ ថ្នាក់ដឹកនាំឧត្តមមន្រ្តីដឹកជញ្ជូនរបស់ជប៉ុន លេខាធិការដ្ឋានអាស៊ាន គណៈប្រតិភូពីភាគីកម្ពុជារួមមានអង្គភាពពាក់ព័ន្ធទាំងអស់ក្រោមឱវាទក្រសួង និងរដ្ឋលេខាធិការដ្ឋានអាកាសចរស៊ីវិលកម្ពុជា។ សន្និសីទនេះស្នើឡើងដោយភាគីជប៉ុនក្នុងគោលបំណងដើម្បី (១) ពិនិត្យមើលវឌ្ឍនភាព នៃការអនុវត្តផែនការសកម្មភាព នៃភាពជាដៃគូក្នុងវិស័យដឹកជញ្ជូនរវាងអាស៊ាន-ជប៉ុន AJTP (ASEAN-Japan Transport Partnership) និង (២) ការពិចារណាលើការសមិទ្ធិលទ្ធភាព និងគំនិតផ្តួចផ្តើមថ្មីសម្រាប់ដាក់ឆ្លងសុំការអនុម័តជាផ្លូវការពីកិច្ចប្រជុំថ្នាក់រដ្ឋមន្រ្តីដឹកជញ្ជូនអាស៊ានលើកទី២០ (20th ATM-Japan) នៅខែតុលា ឆ្នាំ២០២២ ខាងមុខនេះ។ ឧត្តមមន្រ្តីដឹកជញ្ជូនអាស៊ាន និងជប៉ុន បានពិនិត្យទៅលើការងារសំខាន់ៗចំនួន៣ដែលបានស្នើឡើងដោយប្រទេសជប៉ុនរួមមាន៖ (១) សៀវភៅណែនាំអំពីការអនុវត្តល្អបំផុតនៅក្នុងវិធានការសន្តិសុខកំពង់ផែសម្រាប់ការបណ្តុះបណ្តាលគ្រូបង្គោល សៀវភៅណែនាំ និងការបណ្តុះបណ្តាលសវនកម្មគំរូ (២) របាយការណ៍ចុងក្រោយស្តីពីការស្រាវជ្រាវរួមលើការថែទាំស្ពានសម្រាប់ច្រករបៀងឆ្លងព្រំដែនអាស៊ាន និង (៣) ផែនការការងារគម្រោងសន្តិសុខអាកាសចរណ៍អាស៊ាន-ជប៉ុន (២០២៣-២០២៧)។ ក្រោយពីបានពិនិត្យពិភាក្សាគ្នាយ៉ាងលម្អិតក្នុងន័យស្ថាបនា និងប្រកបដោយស្មារតីទទួលខុសត្រូវខ្ពស់ និងដោយយល់ឃើញថា ការងារសំខាន់ៗទាំង៣ខាងលើនេះ នឹងរួមចំណែកក្នុងការធ្វើឱ្យប្រសើរឡើង និងបង្កើនប្រសិទ្ធភាពក្នុងវិស័យដឹកជញ្ជូន និងភស្តុភារកម្ម សន្និសីទឧត្តមមន្រ្តីដឹកជញ្ជូន អាស៊ាន-ជប៉ុន លើកទី២០ បានឯកភាពគ្នាជាគោលការណ៍ ឱ្យមានការសិក្សាគ្រប់ជ្រុងជ្រោយបន្ថែមទៀតទៅលើការងារធំៗទាំង៣ខាងលើ ហើយលទ្ធផលនៃការសិក្សានេះ នឹងត្រូវដាក់ឆ្លងកិច្ចប្រជុំថ្នាក់រដ្ឋមន្រ្តីដឹកជញ្ជូនអាស៊ានលើកទី២០ (20th ATM + Japan Meeting) នៅពាក់កណ្ដាលខែតុលា ឆ្នាំ២០២២ ខាងមុខនេះ៕