កិច្ចប្រជុំក្រុមការងារទទួលបន្ទុកគម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញទៅខេត្តព្រះសីហនុ ដឹកនាំដោយឯកឧត្តមរដ្ឋលេខាធិការ យិត បុណ្ណា ថ្ងៃពុធ ១៥កើត ខែអាសាឍ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៣ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមការងារទទួលបន្ទុកគម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញទៅខេត្តព្រះសីហនុ ដោយមានការចូលរួមពីថ្នាក់ដឹកនាំក្រសួងទទួលបន្ទុក និងក្រុមការងារបច្ចេកទេសពាក់ព័ន្ធ។ អង្គប្រជុំបានពិភាក្សាអំពីការរៀបចំបទដ្ឋានគតិយុត្ត សេចក្តីណែនាំ និងបទដ្ឋានអនុវត្តអំពីការប្រើប្រាស់ ផ្លូវល្បឿនលឿនក្រោមកិច្ចសហការជាមួយក្រុមហ៊ុនសាងសង់ ការសម្របសម្រួលត្រួតពិនិត្យលើបទដ្ឋាន បច្ចេកទេសដើម្បីធានាសុវត្ថិភាពចរាចរណ៍ ការបំពេញបន្ថែមលើចំណុចខ្វះខាតទាក់ទងនឹងសម្ភារៈបរិក្ខារដើម្បីធ្វើឱ្យប្រសើរឡើងសោភ័ណភាពផ្លូវ ការធានាលើការកម្រិតនៃការដឹកជញ្ជូន និងការផ្សព្វផ្សាយដល់បងប្អូនប្រជាពលរដ្ឋឱ្យបានយល់ដឹងអំពីការប្រើប្រាស់ផ្លូវល្បឿនលឿន។ សូមជម្រាបជូនថា៖ ផ្លូវល្បឿនលឿនតភ្ជាប់ពីរាជធានីភ្នំពេញទៅខេត្តព្រះសីហនុនេះ គឺគម្រោងផ្លូវល្បឿនលឿនដំបូងបង្អស់នៅកម្ពុជា នឹងចូលរួមចំណែកក្នុងការជំរុញប៉ូលសេដ្ឋកិច្ចភ្នំពេញ និងប៉ូលសេដ្ឋកិច្ចក្រុងព្រះសីហនុឱ្យកាន់តែមានសន្ទុះរីកចម្រើនលឿន អាចធ្វើដំណើរបានឆាប់រហ័សកាត់បន្ថយពេលវេលា កាត់បន្ថយចំណាយ និងកាត់បន្ថយគ្រោះថ្នាក់ចរាចរណ៍នៅលើផ្លូវជាតិលេខ៤ ជាពិសេសចូលរួមបម្រើផែនការមេប្រែក្លាយខេត្តព្រះសីហនុឱ្យទៅជាតំបន់សេដ្ឋកិច្ចពិសេសពហុបំណង និងទាក់ទាញវិនិយោគិនជាតិ និងអន្តរជាតិបន្ថែមទៀតផងដែរ៕