វិទ្យាស្ថានតេជោសែន សាធារណការ និងដឹកជញ្ជូន ចុះអនុស្សរណៈយោគយល់ជាមួយនឹងសាកលវិទ្យាល័យ Chang'an University ដើម្បីពង្រឹងគុណភាពនៃការអប់រំឱ្យសមស្របទៅនឹងតម្រូវការទីផ្សារ និងផ្តល់ជំនួយបច្ចេកទេសដល់សិស្សានុសិស្សក្នុងការពង្រីកឱកាសការងារ ជំនាញ ចំណេះដឹងឱ្យកាន់តែទូលំទូលាយ ថ្ងៃពុធ ១រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹង ថ្ងៃទី១៥ ខែមិថុនា ឆ្នាំ២០២២ នៅទីស្តី ការក្រសួង លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន និងជាតំណាងដ៏ខ្ពង់ខ្ពស់ឯកឧត្តមទេសរដ្ឋមន្រ្តី ស៊ុន ចាន់ថុល បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណៈយោគយល់រវាងវិទ្យាស្ថានតេជោសែន សាធារណការ និងដឹកជញ្ជូន និងសាកលវិទ្យាល័យ Chang'an University ដោយមានការចូលរួមដោយផ្ទាល់ និងតាមប្រព័ន្ធវិដេអូពីចម្ងាយពីថ្នាក់ដឹកនាំ ក្រសួង មន្ត្រីជំនាញពាក់ព័ន្ធរបស់វិទ្យាស្ថាន តំណាងសាកលវិទ្យាល័យ Chang'an University តំណាងក្រុមហ៊ុនសាជីវកម្មស្ពានថ្នល់ចិន(CRBC)ប្រចាំកម្ពុជា និងមន្ត្រីជំនាញពាក់ព័ន្ធ។ ថ្លែងសុន្ទរកថាស្វាគមន៍ទៅកាន់អង្គពិធី ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន និងជាតំណាងភាគីហត្ថលេខី បានជម្រាបជូនអំពីដំណើរការរបស់វិទ្យាស្ថាន ដែលត្រូវបានបង្កើតឡើងប្រកបដោយចក្ខុវិស័យវែងឆ្ងាយ ជំនឿមុតមាំចំពោះកូនខ្មែរ និងការតាំងចិត្តខ្ពស់បំផុតរបស់ឯកឧត្តមទេសរដ្ឋមន្ត្រី ស៊ុន ចាន់ថុល ក្នុងការបណ្តុះបណ្តាលកូនខ្មែរឱ្យមានជំនាញច្បាស់លាស់ ចំណេះដឹងទូលំទូលាយ និងមានសីលធម៌ អត្តចរិត ចរិយាសម្បត្តិត្រឹមត្រូវ ដើម្បីដោះស្រាយវិបត្តិកង្វះអ្នកជំនាញបច្ចេកទេសនាពេលបច្ចុប្បន្ន និងបង្កើតឱ្យមានអ្នកបន្តវេនរបស់កម្ពុជាដ៏មានសក្តានុពល និងស្មារតីទទួលខុសត្រូវលើវិស័យសាធារណការ និងដឹកជញ្ជូន នាពេលអនាគត រួមចំណែកដល់ការអភិវឌ្ឍសេដ្ឋកិច្ច និងសង្គមជាតិ។ ឯកឧត្តម បានបន្ថែមថា៖ វិទ្យាស្ថានមានការប្តេជ្ញាតាំងចិត្តខ្ពស់ក្នុងការបណ្តុះបណ្តាលទៅលើគុណតម្លៃសំខាន់ចំនួនបីរួមមាន៖ ១) ជំនាញ ២) ចំណេះដឹង ៣) សីលធម៌ ក្នុងឋានៈជាអ្នកបន្តវេនដ៏មានសក្តានុពលប្រកបដោយស្មារតីទទួលខុសត្រូវខ្ពស់ចំពោះវាសនាអនាគតរបស់កម្ពុជាលើវិស័យហេដ្ឋារចនាសម្ព័ន្ធផ្លូវថ្នល់ និងដឹកជញ្ជូន។ ជាមួយគ្នានោះដែរ លោក Fan Wen សាកលវិទ្យាធិការរងនៃសាកលវិទ្យាល័យ Chang'an បានចូលរួម មតិចាប់អារម្មណ៍ក្នុងអង្គពិធី និងបានលើកឡើងអំពីប្រវត្តិខ្លះៗរបស់សាកលវិទ្យាល័យឆាងអាន (Chang’an University) ជាសាកលវិទ្យាល័យដ៏ល្បីមួយនៅប្រទេសចិន ជាពិសេសផ្នែកវិស្វកម្មសំណង់ សាងសង់ផ្លូវ និងការគ្រប់គ្រងគមនាគមន៍សាធារណៈ។ លើសពីនេះ សាកលវិទ្យាល័យ Chang'an ជា សាកលវិទ្យាល័យដ៏សំខាន់មួយរបស់សាធារណរដ្ឋប្រជាមានិតចិន ស្ថិតក្រោមការដឹកនាំផ្ទាល់របស់ ក្រសួងអប់រំ។ លោកបានបញ្ជាក់បន្ថែមថា៖ សាកលវិទ្យាល័យឆាងអាន បានបណ្តុះបណ្តាលអ្នកជំនាញឆ្នើមជាច្រើន ទាំងក្នុង និងក្រៅប្រទេស ជាពិសេសលើផ្នែកដឹកជញ្ជូនលើផ្លូវហាយវេ។ លោកជឿជាក់យ៉ាងមុតមំាថា ដោយមានការគាំទ្រពីប្រទេសភាគី និងក្រុមហ៊ុនCRBC ការបង្កើតនូវកម្មវិធីសិក្សារួមគ្នារវាងវិទ្យាស្ថាន ទាំងពីរ នឹងប្រព្រឹត្តទៅដោយរលូន និងដើរតួយ៉ាងសំខាន់ក្នុងការសម្របសម្រួលរវាងភាគីនីមួយៗ ដើម្បី ជួយដល់ការអភិវឌ្ឍវិទ្យាស្ថានតែជោសែន សាធារណការនិងដឹកជញ្ជូន សាកលវិទ្យាល័យឆាងអាន និងក្រុមហ៊ុនCRBC ថែមទាំងអាចជួយដល់ការរឹតចំណងមិត្តភាពរវាងប្រទេសចិន និងកម្ពុជាផងដែរ។ ដោយឡែក លោក Zhou Yong ប្រធានគ្រប់គ្រងទូទៅប្រចាំប្រទេសកម្ពុជា នៃក្រុមហ៊ុនCRBC បានចូលរួមអបអរសាទរដល់ការសម្រេចបាននូវអនុស្សរណៈយោគយល់រវាងវិទ្យាស្ថានតេជោសែន សាធារណការ និងដឹកជញ្ជូន និងសាកលវិទ្យាល័យ Chang'an University នាថ្ងៃនេះ។ លោកបានលើកឡើងថា៖ ក្រុមហ៊ុនCRBC មានគោលបំណងលើកស្ទួយកិច្ចសហប្រតិបត្តិការរវាងប្រទេសចិន និងប្រទេសកម្ពុជាលើកិច្ចការងារកសាងហេដ្ឋារចនាសម្ព័ន្ធ និងចូលរួមយ៉ាងស្វិតស្វាញក្នុងការអភិវឌ្ឍ ហេដ្ឋារចនាសម្ព័ន្ធ វិស័យអប់រំ និងវិស័យសាធារណការ និងដឹកជញ្ជូននៅក្នុងប្រទេសកម្ពុជាឱ្យកាន់តែមានភាពរីកចម្រើន។ ចំណែកលោកបណ្ឌិត Zhang Wei ព្រឹទ្ធបុរសសាលាអប់រំអន្តរជាតិ នៃសាកលវិទ្យាល័យ Chang'an ក៏បានចូលរួមជាមតិ និងបានចូលរួមអបអរសាទរដល់កិច្ចសហការគ្នារវាងស្ថាប័នទាំងពីរ និងបានលើក ឡើងថា៖ សាកលវិទ្យាល័យឆាងអាន (Chang'an University) បានត្រៀមខ្លួនរួចជាស្រេចក្នុងការជួយ សម្របសម្រួលវិទ្យាស្ថានតេជោសែន សាធារណការ និងដឹកជញ្ជូន ក្នុងកិច្ចការងារផ្សេងៗ ដោយមានការ គាំទ្រពីក្រុមហ៊ុនCRBC ក្នុងការអនុវត្តកិច្ចការងារទាំងនោះឱ្យប្រព្រឹត្តិទៅដោយជោគជ័យ។ លោកសង្ឃឹម ថាកិច្ចសហប្រតិបត្តិការនេះនឹងអាចជាប្រយោជន៍ដល់ប្រជាជននៅក្នុងប្រទេសទាំងសងខាង។ ថ្លែងក្នុងមតិសំណេះសំណាលទៅអង្គពិធីនាឱកាសនោះដែរ លោកជំទាវរដ្ឋលេខាធិការ បានមាន ប្រសាសន៍ថា៖ អនុស្សរណៈនៃការយោគយល់គ្នានេះ គឺជាធាតុសំខាន់បំផុតមួយ ដែលរួមចំណែកដល់ ការកសាងធនធានមនុស្សប្រកបដោយប្រសិទ្ធភាព រវាងវិទ្យាស្ថានតេជោសែន សាធារណការ និងដឹក ជញ្ជូន និងសាកលវិទ្យាល័យឆាងអាន (Chang'an University) ដើម្បីធានាគុណភាពនៃការអប់រំ សមស្របទៅនឹងតម្រូវការទីផ្សារ និងផ្តល់ជំនួយបច្ចេកទេសដល់សិស្សានុសិស្ស ដើម្បីពង្រីកឱកាសការងារ ជំនាញ ចំណេះដឹងឱ្យកាន់តែទូលំទូលាយ ព្រមទាំងផ្តល់ប្រយោជន៍ដល់គ្នាទៅវិញទៅមករវាងភាគីទាំងពីរផងដែរ។ គួរបញ្ជាក់ផងដែរថា៖ ពិធីចុះអនុស្សរណៈយោគយល់គ្នា រវាងវិទ្យាស្ថានតេជោសែន សាធារណការ និងដឹកជញ្ជូន និងសាកលវិទ្យាល័យ Chang'an University បានឯកភាពជាគោលការណ៍ ដើម្បីផ្តល់កិច្ចសហប្រតិបត្តិការសម្រាប់ការអភិវឌ្ឍការអប់រំ និងការស្រាវជ្រាវក្នុងសមត្ថកិច្ចរបស់ភាគីនីមួយៗ ដូចជា៖ សហការក្នុងការផ្តល់ការបណ្តុះបណ្តាលលើជំនាញបច្ចេកទេសផ្សេងៗ ផ្លាស់ប្តូរមន្ត្រី សាស្ត្រាចារ្យ អ្នកស្រាវជ្រាវនិងបុគ្គលិក សហការលើការស្រាវជ្រាវ និងការអនុវត្តគម្រោងរួមគ្នាក្នុងវិស័យពាក់ព័ន្ធ សហការផ្តល់ជំនួយបច្ចេកទេសលើការអប់រំ និងកម្មវិធីបណ្តុះបណ្តាលផ្សេងៗ ចូលរួមសន្និសីទ សិក្ខាសាលា កម្មវិធីបណ្តុះបណ្តាល និងព្រឹត្តិការណ៍ផ្សេងៗទៀត ផ្លាស់ប្តូរព័ត៌មាន និងឧបករណ៍បច្ចេកទេសផ្សេងៗ ប្រើប្រាស់ឧបករណ៍ សម្ភារៈសំណង់ និងធនធានរួមគ្នា ផ្តល់ឱកាសដល់និស្សិតដើម្បីផ្លាស់ប្តូរបទពិសោធន៍សិក្សា ផ្តល់ជូនវិញ្ញាបនបត្រនៃការបណ្តុះបណ្តាលបច្ចេកទេសជំរុញអនុវត្តសកម្មភាពផ្សេងៗ ទៀតស្របតាមស្មារតីនៃអនុស្សរណៈនៃការយោគយល់គ្នានេះ៕