ក្រុមនិស្សិតជ័យលាភីអាហារូបករណ៍រដ្ឋាភិបាលអូស្ត្រាលីឆ្នាំ២០២២ ក្រុមទី២ ចំនួន២២រូប ចូលជួបមន្ត្រី​សាធារណការ​ លោកជំទាវ ឥម នីថារ៉ា រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៍ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងកិច្ចសំណេះសំណាល និងផ្តល់អនុសាសន៍ណែនាំដល់ក្រុមនិសិត្សជ័យលាភីអាហារូបករណ៍រដ្ឋាភិបាលអូស្ត្រាលី ឆ្នាំ២០២២ ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។ កម្មវិធីអាហារូបករណ៍នេះមានគោលបំណងចូលរួមអភិវឌ្ឍធនធានមនុស្សនៅកម្ពុជាតាមរយៈការផ្ដល់អាហារូបករណ៍សម្រាប់ការបណ្ដុះបណ្ដាល កម្រិតថ្នាក់ក្រោយឧត្តមសិក្សា នៅប្រទេសអូស្ត្រាលី លើគ្រប់វិស័យ ជាពិសេសវិស័យសំខាន់ៗមួយចំនួនដូចជា វិស័យសេដ្ឋកិច្ច ពាណិជ្ជកម្ម ការគ្រប់គ្រងដីធ្លី សេវាសាធារណៈ បច្ចេកវិទ្យា អប់រំ និងវិស័យកសិកម្ម ដើម្បីចូលរួមចំណែកក្នុងការអភិវឌ្ឍនប្រទេសកម្ពុជាប្រកបដោយបរិយាបន្ន និងចីរភាព។ ក្រោយបញ្ចប់ការសិក្សា និស្សិតជ័យលាភីទាំងអស់នឹងត្រូវត្រឡប់មកចូលរួមអភិវឌ្ឍប្រទេសកម្ពុជាវិញស្របតាមជំនាញ និងសក្តានុពលរៀងៗខ្លួន។ ក្នុងកិច្ចសំណេះសំណាលនេះដែរ ក្រុមនិស្សិតអាហារូបករណ៍ បានសួរសំណួរមួយចំនួនទាក់ទងនឹងវិស័យសាធារណការ វិស័យភស្តុភារកម្ម វិទ្យាស្ថានតេជោ សែន សាធារណការ និងដឹកជញ្ជូន ប្រព័ន្ធដឹកជញ្ជូនផ្លូវគោក ផ្លូវទឹក ការងារកំពង់ផែ និងការងារផ្លាកលេខពិសេសជាដើម។ សូមជម្រាបជូនថានិស្សិតជ័យលាភីអាហារូបករណ៍រដ្ឋាភិបាលអូស្ត្រាលីឆ្នាំ ២០២២ ក្រុមទី២ មានចំនួនសរុប២២រូប ក្នុងនោះ ស្ត្រី១៣រូប ដែលមានសមាសភាពជាមន្ត្រីរាជការ បុគ្គលិកក្រុមហ៊ុនឯកជន និងមន្ត្រីអង្គការមិនមែនរដ្ឋាភិបាលដែលនឹងត្រូវចេញដំណើរទៅបន្តការសិក្សាថ្នាក់បណ្ឌិតចំនួន១ រូប និងបរិញ្ញាបត្រជាន់ខ្ពស់នៅតាមសាកលវិទ្យាល័យផ្សេងៗនៅប្រទេសអូស្ត្រាលីនៅអំឡុងខែកក្កដា ឆ្នាំ២០២២ ខាងមុខនេះ៕