ភ្នំពេញៈ មន្ដ្រីជាន់ខ្ពស់ក្រសួងសាធារណការ​ និងដឹកជញ្ជូន នឹងដាក់ឲ្យដំណើរការស្ពានអាកាសស្តុបផ្សារដីហុយ ប្រើប្រាស់ជាបណ្តោះអាសន្ននៅថ្ងៃទី១២ មេសា ខាងមុខនេះ ដើម្បីឲ្យប្រជាពលរដ្ឋបានធ្វើដំណើរឆ្លងកាត់ មុន​ឱកាសបុណ្យចូលឆ្នាំប្រពៃណីជាតិខ្មែរ។ ប្រាប់អង្គភាពសារព័ត៌មាន CAM POST នៅព្រឹកថ្ងៃទី២៦ មីនា​នេះ លោក នូ វឌ្ឍនៈ អគ្គនាយកបច្ចេកទេស និងជាអ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ថា ការដាក់ឲ្យ​ដំណើស្ពានអាកាសបណ្ដោះអាសន្ននេះ​ ដើម្បីលើកកម្ពស់សកម្មភាពសុវត្ថិភាពចរាចរណ៍ផ្លូវគោក ក្រសួងសាធារណការកំពុងពន្លឿនការដ្ឋានសាងសង់ស្ពានអាកាសផ្សារដីហុយនេះ ឲ្យបានរួចរាល់ សម្រាប់ប្រជាពលរដ្ឋបានធ្វើដំណើរ និងចូលរួមកាត់បន្ថយការកកស្ទះចរាចរណ៍ឲ្យមានភាពល្អប្រសើរឡើង។ លោកបន្ដ ថា ស្ពានអាកាសស្តុបផ្សារដីហុយ នឹងដាក់ឲ្យដំណើរការប្រើប្រាស់ជាបណ្តោះអាសន្តនៅថ្ងៃទី១២ មេសា ឥឡូវកំពុងជំរុញក្រុមហ៊ុនធ្វើឲ្យបានលឿន ដើម្បីប្រជាពលរដ្ឋបានធ្វើដំណើរឆ្លងកាត់ក្នុងឱកាសបុណ្យចូលឆ្នាំខ្មែរនេះ។ លោកបានបញ្ជាក់ថា ស្ពានអាកាសស្តុបផ្សារដីហុយមកដល់ពេលនេះ ការដ្ឋានទាំងមូលសម្រេចបាន ៩០%ហើយ ខណៈគ្រឿងផ្គុំសំណង់ខាងក្រោមសម្រេចបាន១០០%។ លោកបញ្ជាក់ទៀតថា​ ការងារនិងគេបង្ខំលៃមេចឲ្យបាន កំឡុងពេលចូលឆ្នាំ ប៉ុន្តែប្រើបានតែឡានធុនតូចទេ ម៉ូតូ ឡានធំមិនទាន់អនុញ្ញាតឡើយ ព្រោះឡានធំវាធ្ងន់មិនទាន់គ្រប់លក្ខណះបច្ចេកទេសបេតុង ចឹងអាចថា មុនថ្ងៃទី១១ ១២ អីហ្នឹងគេបើកឲ្យប្រើក៏ប៉ុន្តែហើយចូលឆ្នាំគេអាចបិទទៅវិញ ដើម្បីកែចាក់ AC ពីលើព្រោះវាពីជាន់ ប៉ុន្តែដល់ពេលចូលឆ្នាំហើយត្រូវចាក់ក្រាហ្វុនគ្រីតអាខ្មៅៗ ត្រូវបិទទៅវិញ ដើម្បីគេធ្វើបញ្ចប់។ គួររំលឹកថា ស្ពានអាកាសស្តុបផ្សារដីហុយ ចាប់ផ្តើមបើកការដ្ឋានសាងសង់ កាលពីចុងខែសីហា ២០១៦ តាមគម្រោងត្រូវបញ្ចប់នៅបំណាច់ខែធ្នូ ឆ្នាំ២០១៧ ប៉ុន្តែដោយមានបញ្ហាខ្លះ ក្រុមការងារបានបន្ត ពន្យាពេល មកនៅមុនចូលឆ្នាំខ្មែរ។ មូលហេតុនៃការយឺតយ៉ាវ ដោយសារមានផលប៉ះពាល់ គឺខ្សែក្រោមដី និងបង្គោលតង់ស្យុងអគ្គិសនីកម្ពុជាមិនទាន់ដកចេញ។ ការដ្ឋានរស្ថាបនាស្ពានអាកាសស្តុបផ្សារដីហុយមានបណ្តោយ៩០៥ម៉ែត្រ ទទឹង១៦.៥ម៉ែត្រ ស្ថិតនៅប្រសព្វ រវាងមហាវិថីសហព័ន្ធរុស្ស៊ី និងផ្លូវហាណូយ ដែលជាគម្រោងហិរញ្ញប្បទានរបស់សាធារណរដ្ឋប្រជាមានិតចិន និងទទួលបានសិទ្ធិសាងសង់ដោយក្រុមហ៊ុនសៀងហៃ ត្រួតពិនិត្យបច្ចេកទេសដោយក្រសួងសាធារណការ និងដឹកជញ្ជូន។ គួរបញ្ជាក់ថា​ បច្ចុប្បន្នរាជធានីភ្នំពេញមានស្ពានអាកាសចំនួន៥កន្លែង ទី១-គឺស្ពានអាកាសក្បាលថ្នល់ ទី២-ស្ពានអាកាសស្ទឹងមានជ័យ ទី៣-ស្ពានអាកាស៧មករាស្តុបពេទ្យលោកសង្ឃ ទី៤-ស្ពានអាកាសស្ដុបតិចណូ និងទី៥ស្ពានអាកាសស្តុបផ្សារដីហុយ៕