ភ្នំពេញ៖ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូននិងជាសមាជិកគណៈដឹកនាំចនាយុវជន ស.ស.យ.ក. ប្រចាំគ្រឹះស្ថានឧត្តមសិក្សារដ្ឋ នៅថ្ងៃចន្ទ ទី៩ ខែឧសភា ឆ្នាំ២០២២នេះបានអញ្ជើញដឹកនាំ ថ្នាក់ដឹកនាំ មន្រ្តីរាជការ បុគ្គលិក ក្រុមការងារ ស.ស.យ.ក.ប្រចាំវិទ្យាស្ថាន តំណាងសាស្រ្តាចារ្យ និងនិស្សិត នៃវិទ្យាស្ថានតេជោសែន សាធារណការ និងដឹកជញ្ជូន ដើម្បីនាំយកនូវថវិកាសប្បុរសធម៌ចំនួន ១៣.១៥៥ ដុល្លារអាមេរិក (ដប់បីពាន់ មួយរយហាសិបប្រាំដុល្លារអាមេរិកគត់) ដែលជាថវិកាទទួលបានពីសប្បុរសជននានា និងសកម្មភាពប្រមូលមូលនិធិក្នុងព្រឹត្តិការណ៍សង្រ្កាន្ត TSI សហការរៀបចំឡើងដោយ ក្រសួងសាធារណការ និងដឹកជញ្ជូន វិទ្យាស្ថានតេជោសែន សាធារណការ និងដឹកជញ្ជូន រួមជាមួយនឹងក្រុមការងារសហភាពសហព័ន្ធយុវជនកម្ពុជា ប្រចាំវិទ្យាស្ថានតេជោសែន សាធារណការ និងដឹកជញ្ជូន កាលពីថ្ងៃទី០៦ ខែមេសា ឆ្នាំ២០២២ កន្លងទៅនេះ មកប្រគល់ជូនដល់មន្ទីរពេទ្យកុមារគន្ធបុប្ផា។ នាឱកាសនោះ ឯកឧត្តម ហឿន សំនៀង បានថ្លែងថា វិទ្យាស្ថានបានប្រមូលមូលនិធិនេះ តាមរយៈការរៀបចំកម្មវិធីសង្ក្រាន្ត TSI ឆ្នាំ២០២២ ដោយមានការចូលរួមបរិច្ចាគដោយសទ្ធាជ្រះថ្លាពីសំណាក់ថ្នាក់ដឹកនាំ មន្ត្រីរាជការ នៃក្រសួងសាធារណការ និងដឹកជញ្ជូន ដៃគូសហការ ព្រមទាំងសាស្ត្រាចារ្យ បុគ្គលិក និងនិស្សិត របស់វិទ្យាស្ថានតេជោសែន សាធារណការ និងដឹកជញ្ជូន។ ឯកឧត្តមនាយក ក៏បានថ្លែងអំណរគុណជូនចំពោះក្រុមគ្រូពេទ្យនៃមន្ទីរពេទ្យគន្ធបុប្ផា ដែលបានយកចិត្តទុកដាក់ក្នុងការពិនិត្យព្យាបាលជំងឺកុមារកម្ពុជា ដោយមិនប្រកាន់វណ្ណៈពូជសាសន៍អ្វីឡើយ ហើយសង្ឃឹមថាថវិកាទាំងនេះ អាចចូលរួមជាចំណែកមួយយ៉ាងសំខាន់ដើម្បីទ្រទ្រង់សកម្មភាពជួយសង្គ្រោះកុមារកម្ពុជា ដែលមកសម្រាកព្យាលបាលនៅមន្ទីរពេទ្យនេះ។ ជាមួយគ្នានោះ លោក Dr Denis Laurent ប្រធានគ្រប់គ្រងទូទៅ បានថ្លែងអំណរគុណដល់ វិទ្យាស្ថានតេជោសែន សាធារណការ និងដឹកជញ្ជូន និងក្រសួងសាធារណការ និងដឹកជញ្ជូន ដែលបានខិតខំប្រឹងប្រែងប្រមូលថវិកាទាំងនេះដើម្បីគាំទ្រដល់មន្ទីរពេទ្យគន្ធបុប្ផា លើសពីនេះទៅទៀត លោកក៏បានលើកឡើងថា ការជួយគាំទ្រនេះគឺមានសារៈសំខាន់ណាស់ ដោយសារកុមារគឺជាសសរទ្រូង និងជាទំពាំងស្នងឬស្សីនៃប្រទេសជាតិ។ គួរបញ្ជាក់ផងដែរថា ព្រឹត្តិការណ៍សង្ក្រាន្ត-TSI របស់វិទ្យាស្ថានតេជោសែន សាធារណការ និងដឹកជញ្ជូន ត្រូវបានរៀបចំឡើងក្នុងគោលបំណងដើម្បី អបអរសាទរដល់ពិធីបុណ្យចូលឆ្នាំប្រពៃណីជាតិខែ្មរ និងដើម្បីចូលរួមអភិរក្ស-លើកតម្កើងវប្បធម៌ជាតិ ព្រមទាំងបំផុសស្មារតីយុវជនឱ្យមានមោទនភាព ស្រលាញ់វប្បធម៌ អរិយធម៌ ប្រពៃណី ទំនៀមទម្លាប់ ដែលជាអត្តសញ្ញាណដ៏ផូរផង់របស់ជាតិ ជាពិសេសដើម្បីប្រមូលថវិកាសប្បុរសធម៌ ជួយទ្រទ្រង់ដល់ មន្ទីរពេទ្យគន្ធបុប្ផាផងដែរ៕