ភ្នំពេញ៖ តាមផែនការផ្លូវល្បឿនលឿន(Expressway) ពីរាជធានីភ្នំពេញទៅខេត្តព្រះសីហនុ នឹងត្រូវដាក់ឱ្យប្រើប្រាស់ជាផ្លូវការ នាអំឡុងខែកញ្ញា ឆ្នាំ២០២២។ លោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បញ្ជាក់ថា បន្ទាប់ផ្លូវនេះដាក់ឱ្យប្រើប្រាស់ជាផ្លូវការហើយនោះ ពលរដ្ឋគឺអាចធ្វើដំណើរដោយឥតគិតថ្លៃ ក្នុងរយៈពេលមួយខែ។ ផ្លូវល្បឿនលឿនពីរាជធានីភ្នំពេញទៅខេត្តព្រះសីហនុ ដែលមានតម្លៃវិនិយោគ ប្រមាណ២០០០លានដុល្លារអាមេរិក ពីក្រុមហ៊ុនសាជីវកម្មស្ពាននិងថ្នល់ចិន (CRBC) នឹងត្រូវដាក់ឱ្យប្រើប្រាស់សាកល្បងនៅខែកក្កដា។ លោក ស៊ុន ចាន់ថុល បានបន្ថែមថា ក្រោយពីប្រើប្រាស់សាកល្បងហើយ ផ្លូវនេះ នឹងត្រូវដាក់ឱ្យប្រើប្រាស់ជាផ្លូវការ នាអំឡុងខែកញ្ញា ឆ្នាំ២០២២។ «ក្រោយពីសម្ពោធដាក់ឱ្យប្រើប្រាស់ជាផ្លូវការហើយនោះ ក្រុមហ៊ុនអនុញ្ញាតឱ្យ[ពលរដ្ឋ]ធ្វើដំណើរលើផ្លូវនេះ ​ដោយឥតគិតថ្លៃ ក្នុងរយៈពេលមួយខែ»។​ នេះជាការលើកឡើងរបស់លោក ស៊ុន ចាន់ថុល ក្នុងឱកាសចុះទស្សនកិច្ចផ្លូវល្បឿនលឿន ភ្នំពេញ-ព្រះសីហនុ នាថ្ងៃទី២៦មេសា។ លោក ស៊ុន ចាន់ថុល បន្តរៀបរាប់ថា សម្រាប់ឆ្នាំទីមួយនៃការដំណើរការផ្លូវល្បឿនលឿននេះ ក្រុមហ៊ុនបានបញ្ចុះថ្លៃពី១៨ដុល្លារមកនៅត្រឹម១២ដុល្លារសម្រាប់ការធ្វើដំណើរមួយម្តង ឬ២៤ដុល្លារសម្រាប់ការដំណើរទៅ-មក។ បើតាមរដ្ឋមន្ត្រីក្រសួងសាធារណការនិងដឹកជញ្ជូន ការដំណើរតាមផ្លូវនេះ គឺចំណាយតិច ចំណេញពេលវេលា និងមានសុវត្ថិភាពថែមទៀត ។ សូមជម្រាបថា ផ្លូវល្បឿនលឿននេះ មានប្រវែងជិត២០០គីឡូម៉ែត្រ ដែលភ្ជាប់ពីសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ទៅភូមិ១ សង្កាត់លេខ៣ នៃក្រុងព្រះសីហនុ។ ផ្លូវនេះ​ ត្រូវបានបើកការដ្ឋានសាងសង់ កាលពីថ្ងៃទី២២មីនា ឆ្នាំ២០១៩ ក្រោមទុនវិនិយោគរបស់ក្រុមហ៊ុនសាជីវកម្មស្ពាននិងថ្នល់ចិន (CRBC) ពីប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd។ ផ្លូវនេះ ឆ្លងកាត់ រាជធានីភ្នំពេញ ខេត្តកណ្តាល កំពង់ស្ពឺ កោះកុង និងខេត្តព្រះសីហនុ។ ជាមួយនឹងការដាក់ឱ្យប្រើផ្លូវល្បឿនលឿននេះ នាអំឡុងខែកញ្ញា ឆ្នាំ២០២២ ក្រសួងសាធារណការ​និងដឹកជញ្ជូន ក៏នឹងផលិតវីដេអូ ពន្យល់ឬណែនាំដល់ពលរដ្ឋពីការប្រើប្រាស់ផ្លូវនេះ ប្រកបដោយសុវត្ថិភាព ផងដែរ។ សម្រាប់ផ្លូវល្បឿនលឿននេះ គឺមិនអនុញ្ញាតឱ្យម៉ូតូ និងរថយន្ត ដែលបើកបរក្នុងល្បឿនយឺត៣០គីឡូម៉ែត្រ ក្នុងមួយម៉ោង ប្រើប្រាស់ឡើយ៕