ភ្នំពេញ ៖ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកកិច្ចការនីតិកម្ម បានអញ្ជើញដឹកនាំកិច្ចប្រជុំលើកទី១របស់ក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន ដើម្បីត្រួតពិនិត្យ តាមដាននិងកែសម្រួលលើលិខិតបទដ្ឋានគតិយុត្ត កិច្ចសន្យា និងកិច្ចព្រម ព្រៀងនៅក្នុង ក្របខណ្ឌក្រសួងសាមី ដែលនៅខ្វះចន្លោះ និង/ឬ លែងអាចអនុវត្តបាន។ ថ្លែងក្នុងកិច្ចប្រជុំ ឯកឧត្តម រដ្ឋលេខាធិការក្រសួងសាធារណការ បានមានប្រសាសន៍គូសបញ្ជាក់ថា ក្រុមការងារនេះបង្កើតឡើង ស្របតាមសេចក្តីសម្រេចលេខ. ១៣២ សសរ ចុះថ្ងៃទី២៦ ខែធ្នូ ឆ្នាំ២០១៦ របស់រាជរដ្ឋាភិបាល ស្តីពីការបង្កើតក្រុមការងារ វាយតម្លៃលើផលប៉ះពាល់នៃលិខិតបទដ្ឋាន គិតយុត្ត ដើម្បីត្រួតពិនិត្យ តាមដាន និងកែសម្រួលលើលិខិតបទដ្ឋានគតិយុត្ត កិច្ចសន្យា និងកិច្ចព្រមព្រៀងនៅក្នុងក្របខណ្ឌក្រសួងសាមី ដែលនៅខ្វះចន្លោះ និង/ឬ លែងអាចអនុវត្តបាន ស្របតាមការវិវត្តន៍ របស់សង្គមជាតិនាបច្ចុប្បន្ន។ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់សមាជិកសមាជិកា ក្រុមការងារ ដែលបានសហការល្អ ប្រកបដោយស្មារតីទទួលខុសត្រូវខ្ពស់ និងបានស្នើឱ្យបង្កើតលេខាធិការដ្ឋានក្រុមការងារវាយតម្លៃផលប៉ះពាល់នៃលិខិត បទដ្ឋានគតិយុត្ត ឱ្យបានឆាប់រហ័សតាមដែលអាចធ្វើទៅបាន និងបានសំណូមពរឱ្យពង្រឹងបន្ថែមសមត្ថភាពរៀបចំរបាយការណ៍ វាយតម្លៃលើផលប៉ះពាល់នៃលិខិតបទដ្ឋានគតិយុត្តឱ្យមានគុណភាពកាន់តែល្អប្រសើរថែមទៀតផងដែរ។ សូមជម្រាបជូនថា ក្រុមការងារនេះបង្កើតឡើងក្នុងគោលបំណងលើកកម្ពស់គុណភាព និងឧត្តមភាពនៃច្បាប់ កិច្ចសន្យា កិច្ចព្រមព្រៀងសំខាន់ៗ និងលិខិតបទដ្ឋានគតិយុត្តពាក់ព័ន្ធក្នុងវិស័យសាធារណការ និងដឹកជញ្ជូន និងមានវិសាលភាព អនុវត្តការងាររៀបចំ កសាង កែសម្រួល និងពិនិត្យឡើងវិញនូវច្បាប់កិច្ចសន្យា កិច្ចព្រមព្រៀងសំខាន់ៗ លិខិតបទដ្ឋានគតិយុត្ត ក្នុងដែនសមត្ថកិច្ចរបស់ក្រសួងសាធារណការ និងដឹកជញ្ជូន៕