នៅព្រឹកថ្ងៃទី២០ ខែមេសា ឆ្នាំ២០២២ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់សម្ពោធសមិទ្ធផលនានា ដែលជាគម្រោង ការពារទឹកជំនន់និងកែលម្អប្រព័ន្ធប្រឡាយ -លូ ក្នុងរាជធានីភ្នំពេញជំហានទី៤ ជាហិរញ្ញប្បទានឥតសំណងរបស់រដ្ឋាភិបាលជប៉ុន។ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានមានប្រសា សន៍ឲ្យដឹងថា គម្រោងការពារទឹកជំនន់ និងកែលំអប្រព័ន្ធប្រឡាយលូក្នុងរាជធានីភ្នំពេ ញ ជំហានទី៤ នេះ ចំណាយថវិកាសរុបប្រមាណ៣០លានដុល្លារអាមេរិក ជាជំនួយឥតសំណងរបស់រដ្ឋាភិបាលជប៉ុន។ គម្រោងនេះរួមមាន៖ ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨.២ គីឡូម៉ែត្រ, ដាក់បណ្តាញលូមេ នៅ ក្នុងភូមិសាស្ត្រខណ្ឌដូនពេញប្រវែង ៤.៤ គីឡូម៉ែត្រ, សាងសង់អាងស្តុកទឹកក្រោមដី និងសាងសង់ស្ថានីយ៍បូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC, ដំឡើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយបូមទឹកចតុមុខព្រះគម្លង់១ ព្រះគម្លង់២ និងផ្សារចាស់ និងផ្តល់រថយន្តបូមទឹកចល័តចំនួន ២ គ្រឿង ។ ឯកឧត្តមអភិបាលរាជធានីភ្នំពេញបានបញ្ជាក់ថា អនុវត្តតាមគម្រោងផែនការមេ ដែល JICA បានសិក្សាពីឆ្នាំ ១៩៩៩ គម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី១ ជំហាន ទី២ និងជំហានទី៣ បានអនុវត្តចប់សព្វគ្រប់ពីឆ្នាំ២០០៤ ឆ្នាំ ២០១០ និងឆ្នាំ២០១៥ កន្លងមក ហើយដែលបានធ្វើឲ្យតំបន់ប៉ែកខាងត្បូងឆៀងខាងលិច ប៉ែកខាងកើត និងប៉ែក ខាងត្បូងនៃផ្នែកកណ្ដាលរាជធានីភ្នំពេញ បានចៀសផុតពីការគម្រាមកំហែងពីទឹក ជំនន់ មកពីប្រព័ន្ធទន្លេមេគង្គ និងពីជំនន់ទឹកភ្លៀង ដែលពីមួយឆ្នាំទៅមួយឆ្នាំ ភ្លៀងកាន់តែធំទៅៗ ក្រោមឥទ្ធិពលនៃការប្រែ ប្រួលអាកាសធាតុ។ គម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញជំហានទី៤នេះ បានរួមចំណែកកាត់បន្ថយជំនន់ទឹកភ្លៀង នៅតំបន់ខាងជើងវត្តភ្នំ នឹងនៅតំបន់ទួលគោក តាមរយៈការសាងសង់បណ្ដាញលូមេប្រវែងប្រមាណ១០.៦៦៥ ម៉ែត្រ ការជីកដាក់បណ្តាញលូស្ទាក់ទឹកកខ្វក់ប្រវែងប្រមាណ១.៥៤០ម៉ែត្រ ដើម្បីបង្វែរទឹកកខ្វក់ កុំឲ្យហូរចូលទន្លេសាប ការ សាងសង់អាងស្តុកទឹកក្រោមដីជាមួយនឹងអាងត្រែងសំរាម មេកានិច និងស្ថានីយ៍បូមទឹក ការបំពាក់របារក្រុងសម្រាប់មេកា និចនៅអាងត្រងសំរាមទាំង៤ កន្លែង ដែលបានសាងសង់ក្នុងគម្រោងជំហានទី២ និងការផ្គត់ផ្គង់នូវរថយន្តបំពាក់ម៉ូទ័របូម ទឹកចំនួន ២គ្រឿង សម្រាប់ចល័តបូមពង្រឹងទឹកភ្លៀងដែលជន់លិចនៅតំបន់ទំនាបផងដែរ។ ជាមួយនឹងការសម្រេចបាននូវគម្រោងទាំង៤ជំហាននេះ ឯកឧត្តមសង្ឃឹម និងជឿជាក់ថា ការខូចខាតហេដ្ឋារចនាសម្ព័ន្ធផ្សេងៗបណ្តាលមកពីជំនន់ទឹកភ្លៀង នឹងត្រូវបានកាត់បន្ថយ ជាពិសេស រួមចំណែកធ្វើឲ្យបរិស្ថាន និងជីវភាពរស់នៅរបស់ប្រជាជនក្នុងរាជធានីភ្នំពេញ កាន់តែល្អប្រសើរឡើងដែរ៕