លោក ប៉េង ពោធិ៍នា ប្រធានផ្នែករដ្ឋបាល នៃ ស.ស.យ.ក វិស័យសាធារណការ និងដឹកជញ្ជូន អញ្ជើញជាអធិបតីភាពក្នុងកិច្ចប្រជុំផ្ទៃក្នុងផ្នែករដ្ឋបាល ថ្ងៃពុធ ១៣រោច ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៣០ ខែមីនា ឆ្នាំ២០២២ លោក ប៉េង ពោធិ៍នា ប្រធានផ្នែករដ្ឋបាលនៃស.ស.យ.ក វិស័យសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្ទៃក្នុងផ្នែករដ្ឋបាល នៃក្រុមការងារស.ស.យ.ក វិស័យសាធារណការ និងដឹកជញ្ជូន ដោយមានការអញ្ជើញចូលរួមពី លោក-លោកស្រី អនុប្រធានផ្នែក ព្រមទាំងសមាជិក សមាជិកាក្នុងផ្នែករដ្ឋបាលសរុបចំនួន៣៩ រូប។ កិច្ចប្រជុំនេះផ្ដោតជាសំខាន់លើការប្រកាសសុពលភាពក្រុមការងារផ្នែករដ្ឋបាល ការបែងចែកតួនាទី និងភារកិច្ចជូនថ្នាក់ដឹកនាំផ្នែក និងក្រុមការងារផ្នែករដ្ឋបាល។ ថ្លែងទៅកាន់អង្គប្រជុំនាឱកាសនោះ លោកប្រធានអង្គប្រជុំ បានលើកឡើងអំពីមូលហេតុនៃការបង្កើនសមាសភាពរបស់ផ្នែករដ្ឋបាលដើម្បីជួយជំរុញការងារស្នូលរដ្ឋបាល និងកៀងគរសមាជិកថ្មីបន្ថែម និងបានបញ្ជាក់ថាសហភាពសហព័ន្ធយុវជនកម្ពុជា ក៏ដូចជាយុវជនកាកបាទក្រហម ឬយុវជនកាយរិទ្ធគឺសុទ្ធតែជាអង្គការចលនាយុវជនមហាជនឯករាជ្យដែលមានតួនាទីបម្រើដល់សង្គមជាតិ ក៏ដូចជាជួយពន្យល់ផ្សព្វផ្សាយដល់យុវជនប្រជាជនទូទៅឱ្យមានបេះដូងតែមួយ ការយល់ឃើញជាវិជ្ជមានដែលជាប្រយោជន៍ដល់ការអភិវឌ្ឍប្រទេស។ ជាទីបញ្ចប់ លោកប្រធានអង្គប្រជុំ បានប្រគល់សេចក្តីសម្រេចរបស់គណៈកម្មាធិការកណ្ដាលសហភាពសហព័ន្ធយុវជនកម្ពុជាស្ដីពីការទទួលស្គាល់សមាសភាពបំពេញបន្ថែមរបស់ក្រុមការងារ ស.ស.យ.ក ក្នុងវិស័យសាធារណការ និងដឹកជញ្ជូន និងសេចក្តីសម្រេចស្តីពីការកែសម្រួលផ្នែករដ្ឋបាលនិងការបង្កើត និងរៀបចំសមាសភាពផែនចំណុះឱ្យផ្នែករដ្ឋបាលនៃក្រុមការងារ ស.ស.យ.ក ក្នុងវិស័យសាធារណការ និងដឹកជញ្ជូនជូនដល់ លោក-លោកស្រី អនុប្រធានផ្នែក និងប្រធានផ្នែកចំណុះទាំងប្រាំបីរូបផងដែរ៕