កំពត៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាថ្ងៃទី២៩ ខែមីនា ឆ្នាំ២០២២នេះ បានដឹកនាំក្រុមការងារចុះពិនិត្យផ្លូវជាតិលេខ៣ ពីកំពត-វាលរិញ ចម្ងាយ៥៤គីឡូម៉ែត្រ។ នាឱកាសនោះ ឯកឧត្តមទេសរដ្ឋមន្ត្រីបានលើកឡើងថា ការសាងសង់ផ្លូវពីកំពត-វាលរិញ ចម្ងាយ៥៤គីឡូម៉ែត្រនេះ គឺធនាគារពិភពលោកបានផ្ដល់ថវិកាកម្ចីឲ្យរាជរដ្ឋាភិបាលដើម្បីស្ដារផ្លូវនេះ ហើយក្រសួងសាធារណការនិងដឹកជញ្ជូនធ្វើបាន៣៤គីឡូម៉ែត្របានល្អហើយ ប៉ុន្តែចំពោះ២០គីឡូម៉ែត្រទៀតគឺនៅមានបញ្ហាច្រើនណាស់ ធ្វើមិនដែលបានជាប់ទេ ខួចរហូតរងពីយូរយារណាស់មកហើយ ដោយសារធ្វើមិនតាមលក្ខណៈបច្ចេកទេសនៅតាមតំបន់ដែលមានដីស្អុយរហូតដល់១៨ម៉ែត្រ។ ឯកឧត្តមទេសរដ្ឋមន្ត្រីបានបញ្ជាក់ថា ផ្លូវ២០គីឡូម៉ែត្រនេះ ក្រសួងបានធ្វើការបែងចែកជាពីរ គឺ ពីផ្លូវជាតិលេខ៤ ចំនួន៥គីឡូម៉ែត្រ មានដីស្អុយរហូតដល់១៨ម៉ែត្រ ដូច្នេះដើម្បីធ្វើផ្លូវនេះឲ្យបានជាប់ ត្រូវវ៉ៃសសរគ្រឹះឲ្យដល់ជម្រៅ១៨ម៉ែត្រ ហើយចំពោះផ្លូវ១៥គីឡូម៉ែត្រទៀត ត្រូវពង្រឹងគ្រឹះ និងចាក់បេតុង២.៦តឹកពីលើដើម្បីកុំឲ្យស្រុត។ ឯកឧត្តមបានថ្លែងបន្តថា ផ្លូវដែលមានដីស្អុយរហូត១៨ម៉ែត្រនេះ មានកន្លែងខ្លះទទឹង១២ម៉ែត្រ និងកន្លែងខ្លះ១៦ម៉ែត្រ ហើយកន្លែងខ្លះ១៩ម៉ែត្រ អាចពី២កន្លង ទៅ៤កន្លង។ ឯកឧត្តមទេសរដ្ឋមន្ត្រី បានបញ្ជាក់ថា សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជាបានឲ្យមិត្តចិនជួយផ្ដល់ប្រាក់កម្ចីសម្បទានមកសាងសង់ផ្លូវ២០គីឡូម៉ែត្រនេះ។ ដោយឡែកឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុបានធ្វើលិខិតជាលាយលក្ខណ៍អក្សររួចរាល់ហើយដើម្បីផ្ញើទៅស្ថានទូតចិន ដូច្នោះក្រសួងមានតែរងចាំថវិកាកម្ចីពីមិត្តចិនដើម្បីយកមកសាងសង់ផ្លូវនេះឲ្យត្រឹមត្រូវតាមលក្ខណៈបច្ចេកទេសឲ្យជាប់បានយូរអង្វែង។ ជាមួយគ្នានោះដែរ ឯកឧត្តមទេសរដ្ឋមន្ត្រី ស៊ុន ចាន់ថុល បានគូសបញ្ជាក់ច្បាស់ៗថា ទោះបីជាយ៉ាងណាក៏ដោយ ក្រសួងសាធារណការនិងដឹកជញ្ជូននឹងខិតខំរកគ្រប់មធ្យោបាយ រកប្រភពថវិកាមកជួយសម្រួលផ្លូវ២០គីឡូម៉ែត្រនេះឲ្យបានស្រួលជាបណ្ដោះអាសន្នដើម្បីបញ្ជៀសការកកស្ទះចរាចរណ៍និងសម្រួលដល់ការធ្វើដំណើររបស់បងប្អូនប្រជាពលរដ្ឋ។ សូមបញ្ជាក់ជូនថា ផ្លូវ២០គីឡូម៉ែត្រនេះ ធនាគារពិភពលោកធ្លាប់ធ្វើម្ដង, ក្រុមហ៊ុនកូរ៉េធ្វើម្ដង, ក្រសួងសាធារណការនិង ដឹកជញ្ជូនធ្លាប់ធ្វើម្ដង, ហើយធនាគារពិភពលោកមកធ្វើម្ដងទៀត ប៉ុន្តែនៅមិនជាប់។ ជាថ្មីម្ដងទៀត ឯកឧត្តមទេសរដ្ឋមន្ត្រី ស៊ុន ចាន់ថុល អំពាវនាវដល់ក្រុមហ៊ុនដឹកជញ្ជូនទំនិញទាំងអស់កុំឲ្យដឹកជញ្ជូនទំនិញលើសទម្ងន់ដោយច្បាប់ ដែលធ្វើឲ្យផ្លូវឆាប់ខូចនៅទូទាំងប្រទេស៕