ភ្នំពេញ៖ ស្ពានព្រែកសំរោងចំហៀងខាងស្ដាំពេលធ្វើដំណើរពីរង្វង់មូលត្រើយខាងកើតឆ្ពោះមករង្វង់មូលត្រើយខាងលិចកំពុងរងនូវភាពខ្ទេចខ្ទាំ ស្រុតកៅស៊ូមួយចំហៀងបង្កឡើងដោយក្រុមរថយន្តដឹកខ្សាច់មិនដែលល្មើសច្បាប់ ស្ថិតនៅសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។ តាមប្រភពព័ត៌មានបានឱ្យភ្នាក់ងារ The Mirror News ដឹងនៅរសៀលថ្ងៃទី២៨ ខែមិនា ឆ្នាំ២០២២នេះ ម្ចាស់ការដ្ឋានខ្សាច់នៅជាប់រង្វង់មូលត្រើយខាងកើតក្នុងសង្កាត់ព្រែកថ្មី ខណ្ឌច្បារអំពៅ រួមទាំងក្រុមរថយន្តដឹកជញ្ជូនខ្សាច់បានកំពុងធ្វើសកម្មភាពបូម ចាក់ ចូក កើប ដឹកជញ្ជូនរ៉ែខ្សាច់យ៉ាងគគ្រឹកគគ្រេង គ្មានសណ្តាប់ធ្នាប់ ល្មើសច្បាប់ ជាពិសេសការដ្ឋានខ្សាច់ទាំងនោះមិនបានគោរពតាមលិខិតបទដ្ឋានគតិយុត្តឬកិច្ចសន្យាជាមួយក្រសួងរ៉ែនិងថាមពល និងជាមួយអាជ្ញាធរមូលដ្ឋានឡើយ ដែលក្រុមរថយន្តដឹកខ្សាច់ទាំងនោះបានកំពុងបន្តដឹកជញ្ជូនទាំងខ្សាច់នៅសើម ហូរទឹកលើផ្លូវ ធ្លាក់ខ្សាច់លើផ្លូវ បណ្ដាលឲ្យផ្លូវកៅស៊ូក្លាយជាផ្លូវខ្សាច់ជាហេតុធ្វើឲ្យផ្លូវរងគ្រោះយ៉ាងដំណំ រងនូវភាពខ្ទេចខ្ទាំ ខួច ស្រុត បង្កឲ្យខួចសណ្ដាប់ធ្នាប់ បរិស្ថាន រអិល ហុយ ងាយឲ្យអ្នកដំណើររងគ្រោះ រាល់ពេលធ្វើដំណើរម្ដងៗ។ ប្រភពបន្តឲ្យដឹងទៀតថា កន្លងមកទោះបីជាធ្លាប់មានព័ត៌មានចុះផ្សាយ ឬបង្ហោះតាមបណ្ដាញសង្គមហ្វេសប៊ុកជុំវិញករណីខាងលើ ហើយអាជ្ញាធរក៏ធ្លាប់ចុះមកអន្តរាគមន៍ អប់រំណែនាំយ៉ាងណាក្តី ប៉ុន្តែហាក់ដូចជាមិនមានប្រសិទ្ធភាពជាមួយម្ចាស់ការដ្ឋានខ្សាច់និងក្រុមរថយន្តដឹកជញ្ជូនទាំងទេ ដោយមានការដាក់ការសង្ស័យថា មានអ្នកកាងដែលមានឥទ្ធិពល សូម្បីចៅសង្កាត់ក៏មិនហ៊ានបង្ក្រាប អធិការខណ្ឌ រួមទាំងអភិបាលខណ្ឌច្បារអំពៅក៏មិនអាចហាមឃាត់បានឡើយ។ បើតាមប្រភពពីលោក លីវ វណ្ណថេង ចៅសង្កាត់ព្រែកថ្មីបានឲ្យភ្នាក់ងារព័ត៌មានដឹងតាមរយៈទូរស័ព្ទថា លោកក្នុងនាមចៅសង្កាត់តែងតែចុះធ្វើការអប់រំណែនាំដល់ម្ចាស់ការដ្ឋានខ្សាច់និងក្រុមរថយន្តដឹកខ្សាច់ទាំងនោះជារើយៗ ហើយក៏បានឲ្យក្រុមការងារសង្កាត់ចុះបាញ់ទឹក លាងសម្អាត បោសសំអាតផ្លូវជាញឹកញាប់ផងដែរ ប៉ុន្តែសកម្មភាពរបស់ម្ចាស់ការដ្ឋានខ្សាច់និងក្រុមរថយន្តដឹកខ្សាច់ទាំងនោះហាក់បីនៅដដែលៗ។ ជាមួយគ្នានោះប្រជាពលរដ្ឋបានសំនូមពរដល់ឯកឧត្តម ឃួង ស្រេង អភិបាលរាជធានីភ្នំពេញ និងលោក ចេង មុន្នីរ៉ា អភិបាលខណ្ឌច្បារអំពៅ មេត្តាអញ្ជើញចុះមកពិនិត្យ អន្តរាគមន៍ ហាមឃាត់ម្ចាស់ការដ្ឋានខ្សាច់ឬក្រុមដឹកជញ្ជូនខ្សាច់ដែលល្មើសច្បាប់ឲ្យបានតឹងរ៉ឹងបំផុតផង ជៀសវាងក្រុមទាំងនោះធ្វើឲ្យខួចផ្លូវ ស្ពាន ថ្នល់ បរិស្ថាន និងខួចសណ្ដាប់ធ្នាប់សាធារណៈ៕