នៅថ្ងៃ១០រោច ខែផល្គុន ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃអាទិត្យ ទី២៧ ខែមីនា ឆ្នាំ២០២២ ឯកឧត្តម ប្រាក់ សុខុន ឧបនាយករដ្ឋមន្រ្ដី រដ្ឋមន្រ្ដីក្រសួងការបរទេស និង សហប្រតិបត្តិការអន្តរជាតិ អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង និង ឯកឧត្តម គង់ សោភ័ណ្ឌ អភិបាលខេត្តកណ្តាល បានអញ្ជើញជាអធិបតីក្នុងពិធីបើកការ ដ្ឋានសាងសង់ផ្លូវបេតុងអាមេមួយខ្សែ គឺផ្លូវលេខ ១២១០ ប្រវែង ៥ ៩០០ម៉ែត្រ ទទឹង ១០ ម៉ែត្រ កម្រាស់០,២ម៉ែត្រ ស្ថិតក្នុងឃុំព្រែកគយ និង ឃុំស្អាងភ្នំ ស្រុកស្អាង ខេត្តកណ្តាល។ ឯកឧត្តម គង់ សោភ័ណ្ឌ អភិបាលខេត្តកណ្តាល បានមានប្រសាសន៍ថា ដោយទទួលបានការគាំទ្រពីក្រុមការងាររាជរដ្ឋាភិបាល ចុះមូលដ្ឋានខេត្តកណ្តាល ដឹកនាំដោយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ បានធ្វើឱ្យមូលដ្ឋានក្រុង ស្រុក ឃុំ សង្កាត់ ក្នុងខេត្តកណ្តាល មានការអភិវឌ្ឍរីកចម្រើន ប្រែមុខមាត់យ៉ាងឆាប់រហ័ស ។ ជាក់ស្តែងការចាប់ផ្តើមដំណើរការបើកការដ្ឋានសាងសង់ផ្លូវបេតុងអាមេនៅពេលនេះ បញ្ជាក់ឱ្យឃើញថា អាជ្ញាធរគ្រប់លំដាប់ថ្នាក់ នៅតែយកចិត្តទុកដាក់ជាប់ជានិច្ច ចំពោះទុក្ខកង្វល់របស់ប្រជាពលរដ្ឋ ក្នុងការធ្វើដំណើរទៅមកនៅពេលផ្លូវពិបាកធ្វើដំណើរ ។ ជាពិសេសនោះ ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជាអ្នកដឹកនាំដ៏ឈ្លាសវៃ តែងតែយកចិត្តទុក្ខដាក់របស់ប្រជាពលរដ្ឋជានិច្ច ចំពោះបញ្ហាផ្លូវ ទឹក ភ្លើង។ ព្រោះទាំងនេះជាជីវភាពប្រចាំថ្ងៃរបស់ប្រជាពលរដ្ឋ ដែលរស់គ្រប់មូលដ្ឋាន ហេតុនេះទីណាមានប្រជាពលរដ្ឋរស់នៅត្រូវមានផ្លូវ ទឹក ភ្លើងដល់ទីនោះ។ ឯកឧត្តម អភិបាលខេត្តកណ្តាល បញ្ជាក់ថា ផ្លូវដែលងកំពុងប្រារព្ធពិធីបើកការដ្ឋាន សាងសង់នាពេលនេះ ក៏នឹងក្លាយទៅជាផ្លូវយុទ្ធសាស្ត្រ តភ្ជាប់ពីផ្លូវជាតិលេខ២ ទៅផ្លូវជាតិលេខ២១ ដើម្បីត្រៀមទទួល និងសម្រួលចរាចរក្នុងតំបន់ "អាកាសយានដ្ឋានអន្តរជាតិតេជោក្រុងតាខ្មៅ ហើយប្រជាពលរដ្ឋក្នុងមូលដ្ឋានស្រុកស្អាង ជាអ្នកទទួលបានផលផ្លែផ្កាពីសមិទ្ធផលរបស់រាជរដ្ឋាភិបាលទាំងនេះ ដោយបានចំណេញពីការធ្វើដំណើរ កាត់បន្ថយថ្លៃចំណាយក្នុងការដឹកជញ្ជូនកសិផល និងទំនិញនានាទៅកាន់ទីផ្សារទៀតផង។ ក្នុងឱកាសនោះ ឯកឧត្តម ឧបនាយករដ្ឋមន្រ្ដី ប្រាក់ សុខុន បានមានប្រសាសន៍ថា ផ្លូវបេតុងអាមេ០១ខ្សែនេះ គឺជាសមិទ្ធផលថ្មី១ទៀត ដែលបង្ហាញពីការគិតគូរសុខទុក្ខរបស់ប្រជាពលរដ្ឋនៅតាមមូលដ្ឋាន សម្រាប់បម្រើដល់ការរស់នៅរបស់ប្រជាពលរដ្ឋ ក្នុងការធ្វើចរាចរណ៍ទៅមក ដើម្បីចូលរួមអនុវត្តន៍នយោបាយកាត់បន្ថយភាពក្រីក្រ របស់រាជរដ្ឋាភិបាលផងដែរ ។ ឯកឧត្តម ឧបនាយករដ្ឋមន្រ្ដី បានបន្តថា ផ្លូវគឺជាសរសៃឈាមសេដ្ឋកិច្ចយ៉ាងសំខាន់ បើមានផ្លូវ គឺយើងបានធ្វើឱ្យសេដ្ឋកិច្ច ជីវភាពរស់នៅរបស់ប្រជាពលរដ្ឋកាន់តែប្រសើរឡើង។ មិនថាផ្លូវតូច ឬធំនោះទេ ព្រោះផ្លូវគឺជាសសៃឈាមនៃខឿនសេដ្ឋកិច្ចសម្រាប់ប្រទេសជាតិផង សម្រាប់ប្រជាពលរដ្ឋផង ហើយក៏ជាធនធាននៃការអភិវឌ្ឍប្រទេសជាតិ ទៅរកភាពរីកចម្រើនទៀតផង។ ឯកឧត្តម ឧបនាយករដ្ឋមន្រ្ដី ក៏បានសំណូមពរដល់បងប្អូនប្រជាពលរដ្ឋថា ពេលបានផ្លូវល្អងាយស្រួលធ្វើដំណើរ សូមចូលរួមថែរក្សាទាំងអស់គ្នា ព្រោះផ្លូវទាំងនេះជារបស់យើងទាំងអស់គ្នា មិនមែនរបស់បុគ្គលណាម្នាក់ឡើយ និងគោរពច្បាប់ចររាចរណ៍ឱ្យបានគ្រប់ៗ មិនត្រូវបើកលើសល្បឿនដែលបានកំណត់ កុំបើកបរពេលស្រវឹង ពេលបើកបរម៉ូតូត្រូវពាក់មួកសុវត្ថិភាព ត្រូវពាក់ខ្សែក្រវាត់ឱ្យបានត្រឹមត្រូវនៅពេលបើកបររថយន្ត កុំដឹកទំនិញលើសទម្ងន់និងសូមបងប្អូនប្រជាពលរដ្ឋមេត្តាយល់យោគ និងអធ្យាស្រ័យនៅពេលកំពុងសាងសង់ផ្លូវ នៅពេលផ្លូវនេះសាងសង់រួចស្អាតល្អហើយ សូមប្រជាពលរដ្ឋរួមគ្នាថែរក្សា ដើម្បីប្រើប្រាស់បានយូរអង្វែង ៕ ដោយ ណយ នឿន (ប្រភព:រដ្ឋបាលខេត្តកណ្តាល) សម្រួលផ្សាយដោយ៖ ធូ កុសល