កណ្តាល៖ ឯកឧត្តម ប្រាក់ សុខុន ឧបនាយករដ្ឋមន្រ្ដី រដ្ឋមន្រ្ដីក្រសួងការបរទេស និងសហប្រតិបត្តិការអន្តរជាតិ អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង នាព្រឹកថ្ងៃទី២៧ ខែមិនា ឆ្នាំ២០២២នេះ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកការដ្ឋានសាងសង់ផ្លូវបេតុងអាមេ ផ្លូវលេខ១២១០ ប្រវែង៥,៩០០ម៉ែត្រ ទទឹង១០ម៉ែត្រ កម្ពស់០.២ម៉ែត្រ ស្ថិតក្នុងឃុំព្រែកគយ និងឃុំស្អាងភ្នំ ដោយមានការចូលរួមពីឯកឧត្តមបណ្ឌិត គង់ សោភ័ណ្ឌ អភិបាលនៃគណៈអភិបាលខេត្តកណ្ដាល។ នាឱកាសនោះ ឯកឧត្តមឧបនាយករដ្ឋមន្រ្ដី ប្រាក់ សុខុន បានថ្លែងថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត ភាពឈ្លាសវៃ និងប៉ិបប្រសប់ របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា និងដោយទទួលបានការគាំទ្រពីក្រុមការងាររាជរដ្ឋាភិបាលចុះមូលដ្ឋានខេត្តកណ្តាល ដឹកនាំដោយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានធ្វើឱ្យមូលដ្ឋានក្រុង ស្រុក ឃុំ សង្កាត់ ក្នុងខេត្តកណ្តាលមានការអភិវឌ្ឍរីកចម្រើន ប្រែមុខមាត់យ៉ាងឆាប់រហ័ស។ ឯកឧត្តមឧបនាយករដ្ឋមន្រ្ដីបានគូសបញ្ជាក់ថា ជាក់ស្តែង ផ្លូវលេខ១២១០ ដែលបើកការដ្ឋានសាងសង់នាពេលនេះ គឺជាចំណងដៃថ្មីមួយបន្ថែមទៀតជូនប្រជាពលរដ្ឋ ជាពិសេសបងប្អូនរស់នៅក្នុងស្រុកស្អាង ដែលផ្លូវនេះនឹងជួយសម្រួលការធ្វើដំណើរ កាត់បន្ថយចំណាយលើការដឹកជញ្ជូនទំនិញ កសិផល របស់ប្រជាពលរដ្ឋទៅកាន់ទីផ្សារ។ ម៉្យាងផ្លូវនេះ ក៏ជាផ្លូវសម្រាប់តភ្ជាប់ពីផ្លូវជាតិលេខ២ ទៅផ្លូវជាតិលេខ២១ ដែលផ្លូវនេះនឹងជួយសម្រួលការធ្វើចរាចរ និងបញ្ចៀសចរាចរបានមួយផ្នែកធំ នៅពេលដែលគម្រោងអាកាសយាន្តដ្ឋានអន្តរជាតិតេជោក្រុងតាខ្មៅ បើកឱ្យដំណើរការ៕