ភ្នំពេញ៖ ពិតជារឿងល្អណាស់សម្រាប់សង្គមកម្ពុជា ដែលក្រសួងសាធារណការនិងដឹកជញ្ជូនក្រោមការដឹកនាំរបស់ ឯកឧត្តមទេសរដ្ឋមន្ត្រី ស៊ុន ចាន់ថុល បានធ្វើការបំពាក់ «QR Code» នៅលើផ្លាក់លេខរថយន្ត ដើម្បីរួមចំណែកយ៉ាងច្រើនក្នុងការលុបបំបាត់ការប្រើប្រាស់ផ្លាកលេខក្លែងក្លាយ ឬការបំពាក់ផ្លាកលេខខុសរថយន្តជាដើម បង្កើនចំណូលរដ្ឋ និងរួមចំណែកដល់ការស្វែងរករថយន្តដែលគេចពន្ធផងដែរ។ នៅក្នុងប្រតិបត្តិការចុះឆ្មក់ត្រួតពិនិត្យមើលភាពត្រឹមត្រូវនៃផ្លាកលេខសម្គាល់រថយន្ត តាមរយៈការស្កេន QR CODE នៅលើផ្លាកលេខឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា ការប្រើប្រាស់ផ្លាកលេខក្លែងក្លាយធ្វើឱ្យរដ្ឋពិបាកក្នុងការគ្រប់គ្រងយានយន្ត បាត់បង់ចំណូលជាតិ ហើយក៏បង្កភាពងាយស្រួលសម្រាប់ជនល្មើសបង្កអសន្តិសុខនៅក្នុងសង្គម។ ឯកឧត្តមទេសរដ្ឋមន្ត្រីបន្ថែមទៀតថា ដើម្បីលុបបំបាត់បញ្ហាប្រើប្រាស់ផ្លាកលេខក្លែងក្លាយ ឬផ្លាកលេខសេះហោះ ដែលជាបញ្ហាដុះស្លែមួយនៅក្នុងសង្គមកម្ពុជាក្រសួងក៏បានកំពុងរិះរកមធ្យោបាយក្នុងការដោះស្រាយបញ្ហានេះផងដែរ។ ឯកឧត្តមទេសរដ្ឋមន្ត្រី ស៊ុន ចាន់ថុល ក្រសួងបានប្រើប្រាស់ប្រព័ន្ធឌីជីថលទៅដោះស្រាយបញ្ហាស្មុគស្មាញជាច្រើនដូចជាផ្តល់សេវាលើការចុះបញ្ជីយានយន្ត ការផ្តល់ និងពន្យារបណ្ណបើកបរជាដើម។ ឯកឧត្តមក៏បានរិះរកយុទ្ធសាស្ត្រ ដើម្បីលុបបំបាត់ការប្រើប្រាស់ផ្លាកលេខក្លែងក្លាយ ឬផ្លាកលេខសេះហោះផងដែរ។ ទីបំផុតទៅនៅខែកក្កដា ឆ្នាំ២០១៧ ប្រព័ន្ធ «QR Code» ក៏ត្រូវបានក្រសួងសាធារណការ និងដឹកជញ្ជូន រៀបចំបំពាក់នៅផ្លាកលេខរថយន្ត។ឯកឧត្ដមបន្តថា តាមរយៈ «QR Code» គេអាចដឹងព័ត៌មានរបស់រថយន្តមានដូចជាផ្លាកលេខ ប្រភេទរថយន្ត ពណ៌រថយន្ត ឆ្នាំផលិត លេខតួ លេខម៉ាស៊ីន និងព័ត៌មានពាក់ព័ន្ធដទៃទៀត។ គួរជម្រាបជូនផងដែរថា ឯកឧត្តមទេសរដ្ឋមន្ត្រី ស៊ុន ចាន់ថុល និងឯកឧត្ដមនាយឧត្តមសេនីយ៍ ហឹម យ៉ាន អគ្គស្នងការរងនគរបាលជាតិ នាព្រឹកថ្ងៃអង្គារ ទី២២ ខែមីនា ឆ្នាំ២០២២នេះបានដឹកនាំកម្លាំងនគរបាលចរាចរណ៍ ឆ្មក់ពិនិត្យស្វែងរកផ្លាកលេខក្លែងក្លាយលើរថយន្តដែលធ្វើដំណើរនៅលើផ្លូវជាតិលេខ១។ គួរជម្រាបជូនទៀតថា រថយន្តជាច្រើនគ្រឿងត្រូវបានកម្លាំងនគរបាលចរាចរណ៍ហៅដើម្បីត្រួតពិនិត្យ តែគេរកមិនឃើញមានរថយន្តបំពាក់ផ្លាកលេខក្លែងក្លាយ ឬបំពាក់ខុសរថយន្តនោះឡើយ។ ក្នុងប្រតិបត្តិការនោះ ក៏បានរកឃើញរថយន្តមួយគ្រឿង ដែលយកទៅបិទស្កុតពណ៌ ខុសពីពណ៌រថយន្តដែលបានចុះបញ្ជី។ ការបិទស្កុតពណ៌ ឬបាញ់ពណ៌ឱ្យខុសពីពណ៌ដើមនៃរថយន្តចុះបញ្ជី ជាសកម្មភាពដែលច្បាប់បានហាមឃាត់។ ទន្ទឹមគ្នានោះដែរឯកឧត្តមនាយឧត្តមសេនីយ៍ ហឹម យ៉ាន បានឱ្យដឹងថា ចាប់តាំងពីក្រសួងសារធាណការ និងដឹកជញ្ជូន ដាក់ចេញវិធានការតឹងរឹងលើការគ្រប់គ្រងរថយន្ត ដោយការបំពាក់ QR Code លើរថយន្ត បានធ្វើឱ្យការប្រើប្រាស់ផ្លាកលេខក្លែងក្លាយធ្លាក់ចុះជាអតិបរមា។ មិនតែប៉ុណ្ណោះប្រព័ន្ធនេះ ក៏បានជួយដល់កម្លាំងនគរបាលក្នុងគ្រប់គ្រងសុវត្ថិភាពចរាចរណ៍ រក្សាសន្តិុសុខសណ្តាប់ធ្នាប់ និងប្រឆាំងបទល្មើសផ្សេងៗផងដែរ។ ឯកឧត្តមនាយឧត្តមសេនីយ៍បានបញ្ជាក់ដូច្នេះ «ប្រព័ន្ធនេះបានជួយឱ្យយើងគ្រប់គ្រងបានយានយន្ត។ យើងគ្រប់គ្រងបានយានយន្ត គឺយើងអាចគ្រប់គ្រងបាននូវសុវត្ថិភាព បញ្ហាសុវត្ថិភាពទាំងបញ្ហាសន្តិសុខ ទាំងបញ្ហាចរាចរណ៍»។ លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ការប្រើប្រាស់ QR Code លើផ្លាកលេខរថយន្តនេះ បានជួយកាត់បន្ថយការក្លែងបន្លំផ្លាកលេខ ជួយសមត្ថកិច្ចគយស្វែងរករថយន្តគេចពន្ធ ហើយក៏បានរួមចំណែកក្នុងប្រមូលចំណូលជូនរដ្ឋផងដែរ។ មិនតែប៉ុណ្ណោះឯកឧត្តមទេសរដ្ឋមន្ត្រី ស៊ុន ចាន់ថុល បានលើកឡើងទៀតថា ប្រទេសកម្ពុជា បានប្រើប្រាស់ QR Code លើផ្លាកលេខរថយន្តនេះមុនគេ ហើយបច្ចុប្បន្នមានប្រទេសមួយចំនួនក៏បានសិក្សាពីកម្ពុជាប្រើប្រាស់ QR Code លើផ្លាកលេខរថយន្តផងដែរ។ ឯកឧត្តមទេសរដ្ឋមន្ត្រីបានបញ្ជាក់ផងដែរពីភាពឆ្លាតវៃរបស់កម្ពុជាលើការប្រើប្រាស់ QR Code លើផ្លាកលេខរថយន្តយ៉ាងដូច្នេះ «ប្រទេសកម្ពុជាយើងតូចមែន ប៉ុន្តែមិនមែនមានគំនិតតិចតួចស្តួចស្តើងជាងគេនោះទេ។ ការប្រើ QR Code កម្ពុជាជាប្រទេសទី១ លើពិភពលោក ដែលមាន QR Code ភ្លាប់ទៅនឹងផ្លាករថយន្តតែម្តង។ ឥឡូវមានប្រទេសជិតខាង គេកំពុងរៀនសូត្រ ហើយនឹងដាក់ QR Code លើផ្លាកលេខរថយន្តរបស់គេដែរ»។ ឯកឧត្តមទេសរដ្ឋមន្ត្រី ស៊ុន ចាន់ថុល ក៏បានថ្លែងយ៉ាងដូច្នេះថា រហូតមកដល់ពេលបច្ចុប្បន្នការប្រើប្រាស់ផ្លាកលេខក្លែងក្លាយមិនទាន់លុបបំបាត់អស់ទាំងស្រុងនៅឡើយនោះទេ។ ឯកឧត្តមទេសរដ្ឋមន្ត្រី បានអំពាវនាវឱ្យអ្នកប្រើប្រាស់រថយន្តទាំងអស់គោរពច្បាប់ ហើយប្រើប្រាស់ផ្លាកលេខឱ្យបានត្រឹមត្រូវ៕