កិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងផ្លូវឆ្លងកាត់ និងដីចំណីផ្លូវដែក ដឹកនាំដោយឯកឧត្តមរដ្ឋលេខាធិការ ប៉ាល់ ចន្ទតារា ថ្ងៃចន្ទ ១២រោច ខែមាឃ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៨ ខែកុម្ភៈ ឆ្នាំ២០២២ នៅទីស្តីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងផ្លូវឆ្លងកាត់ និងដីចំណីផ្លូវដែក ដោយមានការអញ្ជើញចូលរួមពីថ្នាក់ដឹកនាំក្រសួងទទួលបន្ទុក និងក្រុមការងារជំនាញភាគីពាក់ព័ន្ធ។ សេចក្តីព្រាងអនុក្រឹត្យនេះមានគោលបំណង៖ កំណត់យន្តការលើការគ្រប់គ្រងផ្លូវឆ្លងកាត់ និងដីចំណីផ្លូវដែក ដាក់ចេញនូវវិធានការគត្តិយុត្តចាំបាច់ ដើម្បីបង្កើនប្រសិទ្ធភាពក្នុងការគ្រប់គ្រង ការពារ និងលុបបំបាត់បាតុភាពអនីត្យានុកូលនានានៅតាមផ្លូវឆ្លងកាត់ និងដីចំណីផ្លូវដែក បង្កលក្ខណៈងាយស្រួលដល់សមត្ថកិច្ចពាក់ព័ន្ធ និងរដ្ឋបាលថ្នាក់ក្រោមជាតិក្នុងការគ្រប់គ្រង និងផ្តល់ភាពស្របច្បាប់ដល់ពលរដ្ឋដែលជាម្ចាស់កម្មសិទ្ធិអចលនទ្រព្យនៅតាមដីចំណីផ្លូវដែក រួមចំណែកទប់ស្កាត់ឧបទ្ទវហេតុគ្រោះថ្នាក់ និងបង្កលក្ខណៈងាយស្រួលដល់ការធ្វើចរាចរណ៍តាមផ្លូវដែក ថែរក្សាបាននូវគុណភាពផ្លូវដែកឱ្យស្របតាមកម្រិតស្តង់ដាបច្ចេកទេស ដើម្បីធានាបាននូវអាយុកាលប្រើប្រាស់ផ្លូវដែក រក្សាសណ្តាប់ធ្នាប់សាធារណៈ និង បង្កើនសោភ័ណភាពនៅតាមផ្លូវដែក។ ក្រោយពីបានអានសេចក្តីព្រាងទាំងស្រុងដោយតំណាងក្រុមការងារ ឯកឧត្តមរដ្ឋលេខាធិការប្រធានអង្គប្រជុំបានផ្តល់យោបល់ និងអនុញ្ញាតឱ្យពិនិត្យពិភាក្សានូវទម្រង់រួមជាទូទៅ ព្រមទាំងលើកឡើងនូវចំណុចពាក់ព័ន្ធ និងមាត្រាសំខាន់ៗដែលចាំបាច់និងមិនចាំបាច់សម្រាប់រៀបចំសេចក្តីព្រាងអនុក្រឹត្យនេះ ហើយដែលត្រូវទទួលបានការចាប់អារម្មណ៍ជាដំបូងៗពីសមាជិកអង្គប្រជុំ មុននឹងឈានដល់ការពិភាក្សា ទៅតាមមាត្រានីមួយៗនៅកិច្ចប្រជុំលើកក្រោយៗទៀត។ ឯកឧត្តមរដ្ឋលេខាធិការ បានជម្រាបជូនអង្គប្រជុំផងដែរថា៖ តំណាងក្រសួងសេដ្ឋកិច្ច និងហិរញ្ញវត្ថុបាន ស្នើសុំចូលរួមក្នុងកិច្ចប្រជុំលើកក្រោយ និងស្នើសុំឱ្យមានការពិនិត្យផ្តល់យោបល់ និងធាតុចូលពាក់ព័ន្ធដល់ការគ្រប់គ្រងដីចំណីផ្លូវថ្នល់ និងផ្លូវដែក ការដោះស្រាយផលប៉ះពាល់ និងបទពិសោធន៍នៃការអនុវត្តកន្លងមកសម្រាប់រៀបចំសេចក្តីព្រាងអនុក្រឹត្យទាំងពីរ ទាំងការគ្រប់គ្រងដីចំណីផ្លូវថ្នល់ និងដីចំណីផ្លូវដែកឱ្យបានទូលំទូលាយនិងស៊ីជម្រៅថែមទៀត។ ឯកឧត្តមរដ្ឋលេខាធិការប្រធានអង្គប្រជុំ បានណែនាំក្រុមការងាររៀបចំសេចក្តីព្រាងអនុក្រឹត្យស្តីពីការគ្រប់គ្រងផ្លូវឆ្លងកាត់ និងដីចំណីផ្លូវដែក ឱ្យយកខ្លឹមសារ និងមតិទាំងឡាយ ដែលបានលើកឡើងក្នុងអង្គប្រជុំលើកនេះទៅសិក្សាលម្អិតបន្ថែមទៀត និងរៀបចំកែសម្រួលសេចក្តីព្រាងឡើងវិញ ដើម្បីដាក់ជូនអង្គប្រជុំលើកក្រោយទៀតពិនិត្យពិភាក្សាបន្ត៕