អ្នកទាំងអស់គ្នាប្រហែលបានដឹងរួចមកហើយនូវគម្រោងសាងសង់ស្ពានឆ្លងកាត់ទន្លេចំនួនពីរគឺ ស្ពានឆ្លងទន្លេមេគង្គតភ្ជាប់ខេត្ដក្រចេះទៅកាន់ខេត្ដកំពង់ធំ និងស្ពានឆ្លងកាត់ទន្លេតភ្ជាប់ពីភ្នំពេញ-ស្វាយជ្រុំ។ ហើយអ្វីដែលវិវត្ដថ្មីទាក់ទងគម្រោងស្ពានទាំងពីរនេះគឺថា រាជរដ្ឋាភិបាលទើបតែនឹងបង្ហើញពីពេលវេលា នៃការបើកការដ្ឋានសាងសង់ស្ពានទាំងពីរកន្លែងនេះផងដែរ។ ១. ស្ពានឆ្លងទន្លេមេគង្គតភ្ជាប់ខេត្ដក្រចេះទៅកាន់ខេត្ដកំពង់ធំ ស្ពានឆ្លងទន្លេមេគង្គតភ្ជាប់ខេត្ដក្រចេះទៅកាន់ខេត្ដកំពង់ធំ ត្រូវបានរាជរដ្ឋាភិបាលដាក់បញ្ជូលទៅក្នុងគម្រោងសាងសង់ច្រើនឆ្នាំមកហើយ។ ហើយកាលពីពេលថ្មីៗកន្លងទៅនេះសម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា ក៏បានបញ្ជាក់ច្បាស់ៗ ពីកាលបរិច្ឆេទនៃការសាងសង់ស្ពាននេះផងដែរ ដែលការសាងសង់គឺអាចនឹងធ្វើឡើងនៅក្នុងឆ្នាំ២០២៣ ខាងមុខ។ យោងតាមប្រសាសន៍របស់សម្ដេចតេជោនាយករដ្ឋមន្រ្ដី នៅក្នុងពិធីសម្ពោធបើកឱ្យប្រើប្រាស់ជាផ្លូវការកំណាត់ប្រវែង ៩៣,៥៦ គីឡូម៉ែត្រ នៃគម្រោងធ្វើឱ្យប្រសើរឡើងវិញផ្លូវជាតិលេខ៧ ពីខ្លាស្ទុះ ទៅរមាត ខេត្តក្រចេះ នាថ្ងៃទី០៧ កុម្ភៈ ២០២២ បានបញ្ជាក់យ៉ាងដូច្នេះថា «ឆ្នាំ២០២៣នេះ គឺនឹងសម្ភោធបើកការដ្ឋានសម្រាប់ការសាងសង់ស្ពាន នៅម្ដុំទីរួមខេត្ដក្រចេះ ដើម្បីយើងតភ្ជាប់ទៅកំពង់ធំ»។ សម្ដេចមានប្រសាសន៍បន្ដថា «ការតភ្ជាប់ស្ពាននៅក្នុងខេត្ដក្រចេះនេះគឺមិនមែនគ្រាន់តែសម្រាប់ចម្លងពីត្រើយម្ខាងទៅត្រើយម្ខាងទេ ប៉ុន្ដែយើងចេញកាត់ផ្លូវមួយខ្សែនៅកំពង់ថ្មនៅឯខេត្ដកំពង់ធំ»។ តាមការសិក្សារបស់ក្រសួងសាធារណការ និងដឹកជញ្ជូនកន្លងទៅ ស្ពានមួយខ្សែនេះនឹងមានប្រវែង ១,៧៦១ម៉ែត្រ ខណៈត្រូវប្រើប្រាស់រយៈពេលចន្លោះពី ២ ទៅ ៣ ឆ្នាំ ក្នុងការសាងសង់។ ហើយចំពោះថវិកាដែលត្រូវចំណាយគឺជាកម្ចីហិរញ្ញប្បទានពីសាធារណៈរដ្ឋប្រជាមានិតចិន៕ ២. ស្ពានឆ្លងទន្លេតភ្ជាប់ភ្នំពេញទៅតំបន់ស្វាយជ្រុំ ស្ពានមួយកន្លែងនេះ គឺល្បីយូរណាស់មកហើយដែរ ខណៈដែលប្រជាពលរដ្ឋជាច្រើនបាននឹងកំពុងរង់ចាំដំណឹងអំពីការសាងសង់។ យ៉ាងណាបច្ចុប្បន្នគម្រោងស្ពានឆ្លងទន្លេតភ្ជាប់ពីភ្នំពេញទៅតំបន់ស្វាយជ្រុំនេះត្រូវបានរាជរដ្ឋាភិបាលសិក្សាចប់សព្វគ្រប់ហើយ។ យោងតាមប្រសាសន៍របស់ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូនបានបញ្ជាក់ថា «គម្រោងសាងសង់ស្ពានពីភ្នំពេញទៅស្វាយជ្រុំ ឥឡូវសិក្សាជិតចប់សព្វគ្រប់ហើយ ដែលមានជម្រើសស្ពាន៣ប្រភេទ មានស្ពានធម្មតា មានស្ពានខ្សែកាបិ៍ ដូចនៅអ្នកលឿង ដែលយើងឃើញ។ល។ ដូច្នេះយើងកំពុងពិនិត្យចុងក្រោយ ហើយជ្រើសរើសប្រព័ន្ធមួយណា ដើម្បីរៀបចំដាក់ចេញថ្លៃសាងសង់។ ខ្ញុំគិតថាទាល់ឆ្នាំ២០២៣ ទើបយើងអាចបើកការដ្ឋានសាងសង់ស្ពានស្វាយជ្រុំនេះបាន»។ ការបញ្ជាក់របស់ឯកឧត្ដមទេសរដ្ឋមន្រ្ដីនេះ ត្រូវបានធ្វើឡើងនៅក្នុងដំណើរចុះពិនិត្យវឌ្ឍនភាពការងារស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្រុងសៀមរាប ខេត្តសៀមរាប កាលពីអំឡុងខែមករា ឆ្នាំ២០២២កន្លងទៅ៕