ប៉ៃលិន ៖ ប្រជាពលរដ្ឋ ប្រមាណ ១០២៥ នាក់ ទទួលបានការអប់រំផ្សព្វផ្សាយ នូវច្បាប់ស្តីពីចរាចរណ៍ផ្លូវគោក ពីមន្ទីរសាធារណការ និងដឹកជញ្ជូនខេត្ត ដែលបានធ្វើឡើងក្នុងក្រុងប៉ៃលិន និងស្រុកសាលាក្រៅ ជាការកើនរំលឹកដល់អ្នកប្រើប្រាស់ផ្លូវត្រូវស្មារតីយកចិត្តទុកដាក់ក្នុងពេលបើកបរ ឬធ្វើដំណើរនៅទីសាធារណៈ នៅថ្ងៃទី ២៤-២៨ ខែមករា ឆ្នាំ ២០២២ មន្ទីរសាធារណការ និងដឹកជញ្ជូនខេត្តប៉ៃលិន បានធ្វើយុទ្ធនាការអប់រំ ផ្សព្វផ្សាយច្បាប់ស្តីពីចរាចរណ៍ផ្លូវគោក ដល់បងប្អូនប្រជាពលរដ្ឋ ដែលមកទទួលសេវាសាធារណៈក្នុងវិស័យដឹកជញ្ជូននៅមន្ទីរផ្ទាល់ ប្រមាណ ១៧៥ នាក់ (ស្រី៣២នាក់) និងអ្នកដែលបានធ្វើដំណើរនៅតាមទីសាធារណៈក្នុងក្រុងប៉ៃលិន និងក្នុងស្រុកសាលាក្រៅ សរុបចំនួនប្រមាណ ៨៥០នាក់ ដោយក្នុងនោះរួមមាន៖ - បានចែកមួកសុវត្ថិភាព ចំនួន ៣៥ មួក - សៀវភៅច្បាប់ស្តីពីចរាចរណ៍ផ្លូវគោក ចំនួន ១៧៥ ក្បាល និងសៀវភៅត្រូវយល់ដឹងពីការបើកបរទោចក្រយានយន្ត ចំនួន១៧៥ក្បាល - ចែកខិត្តប័ណ្ណស្ដីពីការអបរំសុវត្ថិភាពចរាចរណ៍ផ្លូវគោក ចំនួន ៨៥០ច្បាប់។ នាពេលនោះផងដែរក្រុមការងារបានចុះពិនិត្យតាមសាលាបង្រៀនបើកបរយានយន្តចំនួន ៤សាខា ចងបដាផ្សព្វផ្សាយនៅលើផ្លូវប្រសព្វមួយចំនួន ក៏ដូចជាតាមកន្លែងដែលមានគ្រោះថ្នាក់ញឹកញ៉ាប់ និងបានចុះត្រួតពិនិត្យផ្សព្វផ្សាយតាមយានដ្ឋាន សាខាក្រុមហ៊ុនដឹកជញ្ជូន ចំនួន ១១ ទីតាំង ដោយបានពន្យល់ណែនាំឱ្យមានការចុះបញ្ជីអាជីវកម្ម ឬស្នើបន្ត ឱ្យបានត្រឹមត្រូវ ។ ការធ្វើយុទ្ធនាការផ្សព្វផ្សាយច្បាប់ស្តីពីចរាចរណ៍ផ្លូវគោកនេះឡើង ក្នុងន័យកើនរំលឹកដល់អ្នកប្រើប្រាស់ផ្លូវឱ្យមានស្មារតីយកចិត្តទុកដាក់ខ្ពស់ក្នុងពេលបើកបរត្រូវប្រុងប្រយ័ត្ន និងត្រូវឈ្វេងយល់ឱ្យកាន់តែច្បាស់ពីច្បាប់ដែលមានចែង ហើយត្រូវចូលរួមគោរព អនុវត្តឱ្យបានទាំងអស់គ្នា ជាពិសេសក្នុងឱកាសបុណ្យចូលឆ្នាំថ្មីប្រពៃណីជនជាតិចិន-វៀតណាម នាពេលខាងមុខនេះ។