ភ្នំពេញ៖ ជាការពិតណាស់ថ្ងៃនេះ ជាថ្ងៃអបអរសាទរខួប ៤៣ឆ្នាំ នៃទិវាជ័យជម្នះ ៧មករា, ៧មករា ១៩៧៩ -៧មករា២០២២, ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូននាព្រឹកថ្ងៃទី៧ ខែមករា ឆ្នាំ២០២២នេះ បានថ្លែងយ៉ាងដូច្នេះថា «ជាការពិតណាស់ បើគ្មានសុខសន្តិភាព យើងក៏គ្មានឱកាសបានមកជួបជុំក្នុងកម្មវិធីចុះបឋមសិលាបុកគ្រឹះសាងសង់អគារមន្ទីរពេទ្យកម្ពស់៣ជាន់នេះដែរ, បើគ្មានសុខសន្តិភាពទេ យើងក៏គ្មានកសាងផ្លូវជាតិលេខ២១នេះដែរ, បើគ្មានសុខសន្តិភាពទេ យើងក៏គ្មានឱកាសទាក់ទាញវិនិយោគិនមកវិនិយោគនៅកម្ពុជា បង្កើតឱកាសការងារជូនដល់បងប្អូនប្រជាពលរដ្ឋយើងធ្វើ, បើគ្មានសុខសន្តិភាព ក៏គ្មានឱកាសទាក់ទាញភ្ញៀវទេសចរណ៍រាប់លាននាក់ មកលេងកំសាន្តនៅកម្ពុជាយើង, បើគ្មានសុខសន្តិភាព យើងគ្មានឱកាសដាក់ផលិតផលកសិកម្មយើងលក់នៅបរទេស ដើម្បីបង្កើតការងារជូនដល់បងប្អូនប្រជាពលរដ្ឋយើង ដូច្នេះសុខសន្តិភាពនេះជាកត្តាមួយដ៏សំខាន់បំផុត ក្នុងកសាងមាតុភូមិប្រទេសជាតិរបស់យើងដើម្បីឲ្យប្រទេសជាតិយើងមានការរីកចម្រើន កាត់បន្ថយភាពក្រីក្ររបស់ប្រជាពលរដ្ឋ។ យើងទាំងអស់គ្នាត្រូវដឹងគុណសន្តិភាព»។ គួរជម្រាបផងដែរថា សមិទ្ធផលថ្មីកើតលើទឹកដីស្រុកកោះធំគឺជាមន្ទីរពេទ្យកម្ពស់៣ជាន់ និងអគារអមចំនួន២ផ្សេងទៀត បាននឹងកំពុងចាប់ផ្តើមលេចចេញជារូបរាងជាបណ្ដើរៗដោយឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនអញ្ជើញជាគណៈអធិបតីក្នុងពិធីបុកគ្រឹះសាងសង់មន្ទីរពេទ្យតេជោសែនកោះធំនិងសំណេះសំណាលជាមួយមន្ត្រីមូលដ្ឋានស្រុកកោះធំចំនួន៥៣០នាក់ នៅថ្ងៃទី៧ ខែមករា ឆ្នាំ២០២២នេះ។ក្នុងនោះក៏មានការចូលរួមជាកិត្តិយសពីសំណាក់ឯកឧត្ដមបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្ដាល, ឯកឧត្តម គង់ សោភ័ណ្ឌ អភិបាលខេត្តកណ្ដាល,ឯកឧត្តម លោកជំទាវ លោក លោកស្រី ប្រជាពលរដ្ឋ ព្រមទាំងមន្រ្តីរាជការជាច្រើននាក់ផ្សេងទៀត។ គួរជម្រាបជូនទៀតថា គម្រោងសាងសង់អគារថ្មី នៃមន្ទីរពេទ្យតេជោសែនកោះធំនេះ រៀបចំឡើងក្រោមគំនិតផ្តួចផ្តើមរបស់ឯកឧត្ដមទេសរដ្ឋមន្ត្រី ស៊ុន ចាន់ថុល ដើម្បីឆ្លើយតបទៅនឹងតម្រូវការជាក់ស្តែង និងសមស្របតាមកម្មវិធីនយោបាយរបស់រាជរដ្ឋាភិបាល និងចក្ខុវិស័យសម្រាប់អភិវឌ្ឍជាតិរបស់សម្តេចតេជោ នាយករដ្ឋមន្ត្រី ដែលបានគិតគូរយកចិត្តទុកដាក់លើសុខទុក្ខ សុខភាព និងសុខុមាលភាពរបស់ប្រជាពលរដ្ឋ។ នាឱកាសនោះឯកឧត្តមទេសរដ្ឋមន្រ្តី ស៊ុន ចាន់ថុល បានលើកឡើងថា ក្រោយពីការសាងសង់រួច មន្ទីរពេទ្យនេះ នឹងក្លាយជាទីតាំងផ្តល់សេវាសុខាភិបាលសាធារណៈជូនដល់ប្រជាពលរដ្ឋប្រមាណជាង៦០ម៉ឺននាក់ដែលរស់នៅក្នុងស្រុកស្អាង ស្រុកកោះធំ ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវផងដែរ។ ឯកឧត្តមទេសរដ្ឋមន្ត្រី ស៊ុន ចាន់ថុល ក៏បានថ្លែងជំរុញដល់បងប្អូនប្រជាពលរដ្ឋទៅបោះឆ្នោតឲ្យបានគ្រប់គ្នា និងបោះឆ្នោតជូនដល់គណបក្សប្រជាជនកម្ពុជា ព្រោះមានតែគណបក្សប្រជាជនកម្ពុជាតែប៉ុណ្ណោះ ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលជាមគ្គុទេសឯកក្នុងការដឹកនាំប្រទេសជាតិឱ្យស្គាល់តែសុខសន្តិភាព ស្គាល់តែការរីកចម្រើន មានការអភិវឌ្ឍ និងមានមិត្តភាពល្អ ជាមួយនឹងបរទេស ខណៈដែលធនធានមនុស្សនៅក្នុងគណបក្សប្រជាជនកម្ពុជាមានច្រើនសម្បូរបែប មានបណ្ឌិតជាច្រើននាក់ ពិសេសគឺមានក្រុមបញ្ញវន្តជាច្រើននាក់ មានទាំងមន្ត្រីជើងចាស់និងមន្ត្រីជើងថ្មី ដែលសុទ្ធសឹងតែជាធនធានមនុស្សដ៏ល្អឯកសម្រាប់ដឹកនាំប្រទេសជាតិបន្តទៅមុខជានិរន្តរ៍»។ គួរបញ្ជាក់ថា គម្រោងសាងសង់មន្ទីរពេទ្យនេះរួមមាន៖ ការសាងសង់អគារថ្មីចំនួន០៣ខ្នង៖ *១.អគារមន្ទីរពេទ្យ ចំនួន ០១ខ្នង មាន០៣ជាន់ ដែលជាន់ផ្ទាល់ដីមានទំហំ ៣.៥១៤,៨ ម៉ែត្រការ៉េ ជាន់ទី១មានទំហំ ៣.៥១៤,៨ ម៉ែត្រការ៉េ និងជាន់ទី២ មានទំហំ៣.៥១៤,៨ ម៉ែត្រការ៉េ ស្មើនឹងទំហំសរុប ១០.៥៤៤,៤ ម៉ែត្រការ៉េ។ *២.អគារខាងឆ្វេង ចំនួន ០១ខ្នង មាន០២ជាន់ ដែលជាន់ផ្ទាល់ដីមានទំហំ ៥០០ម៉ែត្រការ៉េ និងជាន់ទី១មានទំហំ ៥០០ ម៉ែត្រការ៉េ ស្មើនឹងទំហំសរុប ១០០០ម៉ែត្រការ៉េ។ *៣.អគារខាងស្តាំចំនួន០១ខ្នង មាន០២ជាន់ ដែលជាន់ផ្ទាល់ដីមានទំហំ៥០០ម៉ែត្រការ៉េ និងជាន់ទី១ មានទំហំ៥០០ម៉ែត្រការ៉េ ស្មើនឹងទំហំសរុប១០០០ម៉ែត្រការ៉េ។ សូមបញ្ជាក់បន្ថែមថា អគារមន្ទីរពេទ្យតេជោសែនទាំង៣ខាងលើមានទំហំសរុបស្មើនឹង ១២.៥៤៤,៤ម៉ែត្រការ៉េ ដែលអាចផ្ទុកគ្រែអ្នកជំងឺបានចំនួន១៥០គ្រែ បំពាក់ដោយម៉ាស៊ីនត្រជាក់សម្ភារបរិក្ខារពេទ្យនិងឧបករណ៍បច្ចេកទេសទំនើបៗបម្រើឱ្យការព្យាបាល គ្រោងចំណាយពេលសាងសង់ចំនួន១២ខែ ចាប់ផ្តើមពីខែមករាឆ្នាំ២០២២និងគ្រោងបញ្ចប់ការសាងសង់នៅខែធ្នូ ឆ្នាំ២០២២៕