កិច្ចប្រជុំពិភាក្សាអំពីលំហូរការងារទាក់ទងនឹងការត្រៀមរៀបចំសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២របស់ក្រសួង ត្រូវបានដឹកនាំដោយឯកឧត្តមអគ្គនាយក សឿន ប៊ុនលី ថ្ងៃព្រហស្បតិ៍ ១១រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវថ្ងៃទី៣០ ខែធ្នូ ឆ្នាំ២០២១ នៅទីស្តីការក្រសួង ឯកឧត្តម សឿន ប៊ុនលី អគ្គនាយកនៃអគ្គនាយកដ្ឋានផែនការ និងគោលនយោបាយ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាអំពីលំហូរការងារទាក់ទងនឹងការត្រៀម រៀបចំសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២របស់ក្រសួង ដោយមានការចូលរួមពីលោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ មន្ត្រី មកពីអគ្គនាយកដ្ឋានរដ្ឋបាល និងហិរញ្ញវត្ថុ និងក្រុមការងារជំនាញពាក់ព័ន្ធផងដែរ។ ថ្លែងទៅកាន់អង្គប្រជុំនាឱកាសនោះ ឯកឧត្តមអគ្គនាយក បានជម្រាបជូនអំពីការបញ្ចប់ការរៀបរៀង សៀវភៅរបាយការណ៍បូកសរុបការងារសម្រាប់សន្និបាតរបស់អគ្គនាយកដ្ឋានផែនការ និងគោលនយោបាយ និងបានដាក់ជូនទៅគ្រប់អគ្គនាយកដ្ឋានទាំងអស់ រួមទាំងអង្គភាពនានាក្រោមឱវាទក្រសួង ដើម្បីស្នើសុំការពិនិត្យ និងផ្ដល់យោបល់លើរបាយការណ៍នេះបន្ថែមទៀត ហើយក្នុងរយៈពេលមួយសប្តាហ៍ អគ្គនាយកដ្ឋាននឹងទទួលបានធាតុចូលបន្ថែម ដើម្បីធ្វើការកែសម្រួលសៀវភៅរបាយការណ៍នេះឱ្យបានចប់សព្វគ្រប់ក្នុងសប្តាហ៍ទីមួយ ដើមឆ្នាំ២០២២។ ដោយឡែកលោក ហ៊ាង សុទ្ធាយុត្តិ បានជម្រាបជូនផងដែរអំពីវឌ្ឍនភាពនៃការត្រៀមរៀបចំអញ្ជើញ អ្នកសារព័ត៌មានចំនួន២០ស្ថាប័ន ការសម្របសម្រួលសណ្ដាប់ធ្នាប់ក្នុងសាលសន្និបាតដោយសហការ ជាមួយនឹងនាយកដ្ឋានរដ្ឋបាល ការរៀបចំផ្នែកបច្ចេកទេសប្រព័ន្ធសំឡេង ប្រព័ន្ធផ្គត់ផ្គង់អគ្គិសនីទៅតាម ទីតាំងសំខាន់ៗ ការរៀបចំផ្ទាំងបង្ហាញរូបភាព ទូរទស្សន៍LED ការថតរូប និងការសម្រិតសម្រាំងរូបភាព ការថតវីដេអូទុកជាឯកសារ ការរៀបចំអត្ថបទចុះផ្សាយសម្រាប់ថ្ងៃបើក ថ្ងៃបិទសន្និបាត និងពិធីប្រគល់ គ្រឿងឥស្សរិយយស ការរៀបចំប្រព័ន្ធវីដេអូពីចម្ងាយ ការរៀបចំប្រព័ន្ធអ៊ីនធឺណែតឱ្យបានប្រសើរឡើង ដោយធានាទាំងគុណភាពរូបភាព និងគុណភាពសំឡេងសម្រាប់អ្នកចូលរួមពីចម្ងាយ។ សូមជម្រាបជូនថា៖ ពិធីសន្និបាតនេះគ្រោងនឹងប្រារព្ធធ្វើឡើងនៅថ្ងៃទី២៧-២៨ ខែមករា ឆ្នាំ២០២២ ដោយមានសមាសភាពអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយ ជាមួយនឹងការប្រកាន់ខ្ជាប់តាមវិធានការការពាររបស់ក្រសួងសុខាភិបាល ដើម្បីទប់ស្កាត់ការឆ្លងរីករាលដាលនៃជំងឺកូវីត-១៩៕