កិច្ចប្រជុំស្ដីពីវឌ្ឍនភាពប្រចាំខែ នៃគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ(Port EDI) ត្រូវបានដឹកនាំដោយឯកឧត្តមរដ្ឋលេខាធិការ រស់ វណ្ណា ថ្ងៃអង្គារ ៩រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវថ្ងៃទី២៨ ខែធ្នូ ឆ្នាំ២០២១ នៅទីស្ដីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្តីពីវឌ្ឍនភាពប្រចាំខែ នៃគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ (Port EDI) ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំក្រសួងទទួលបន្ទុក ជំនាញការនៃទីភ្នាក់ងារសហប្រតិបត្តិការអន្តរជាតិជប៉ុន(JICA) គណៈកម្មការគ្រប់គ្រងប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ និងភាគីពាក់ព័ន្ធ។ អង្គប្រជុំបានពិនិត្យ និងពិភាក្សាលើលទ្ធផលនៃការអនុវត្តគម្រោងនៅក្នុងខែធ្នូ ឆ្នាំ២០២១ ទាក់ទងនឹងការបញ្ចប់វគ្គបណ្តុះបណ្តាលដំបូងស្តីពីការប្រើប្រាស់ប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ និងការរៀបចំកម្មវិធីប្រគល់-ទទួលសម្ភារក្នុងគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ(Port EDI) ជូនដល់គណៈកម្មការរៀបចំបែបបទនាវាចូល។ ជាមួយគ្នានោះដែរ អង្គប្រជុំក៏បានពិភាក្សាអំពីទិសដៅដែលត្រូវអនុវត្តបន្តសម្រាប់ខែមករា ឆ្នាំ២០២២ ដែលក្នុងនោះរួមមាន៖ ការរៀបចំកម្មវិធីតេស្តសាកល្បងដំណាក់កាលទី១ក្នុងប្រព័ន្ធ Port EDI ចាប់ពីថ្ងៃទី១០ ខែមករា ដល់ថ្ងៃទី១០ ខែមីនា ឆ្នាំ២០២២ ការដំឡើងប្រព័ន្ធទិន្នន័យក្នុងបន្ទប់រក្សាទិន្នន័យ (Port EDI Data Center) ក្នុងក្រសួងសាធារណការ និងដឹកជញ្ជូន៕