លោកជំទាវរដ្ឋលេខាធិការ មឹន មាណវី តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល ដឹកនាំប្រតិភូកម្ពុជាក្នុងវិស័យដឹកជញ្ជូនអញ្ជើញចូលរួមកិច្ចប្រជុំថ្នាក់រដ្ឋមន្ត្រីលើវិស័យដឹកជញ្ជូនលើកទី៤ តាមប្រព័ន្ធវីដេអូពីចម្ងាយ ថ្ងៃសុក្រ ១៣កើត ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៧ ខែវិច្ឆិកា ឆ្នាំ២០២១ នៅទីស្តីការក្រសួង លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាតំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំប្រតិភូកម្ពុជាក្នុងវិស័យដឹកជញ្ជូន ចូលរួមកិច្ចប្រជុំថ្នាក់រដ្ឋមន្ត្រីលើវិស័យដឹកជញ្ជូនលើកទី៤ ដែលសហការរៀបចំឡើងដោយអង្គការ UNESCAP និងវេទិកាដឹកជញ្ជូនអន្តរជាតិ (ITF) តាមរយៈប្រព័ន្ធវីដេអូពីចម្ងាយ កិច្ចប្រជុំនេះបានប្រព្រឹត្តទៅរយៈពេល០៤ថ្ងៃ​ចាប់ពីថ្ងៃទី១៤ ដល់១៧ ខែធ្នូ ឆ្នាំ២០២១ដោយផ្តោតជាសំខាន់លើចំណុចសំខាន់ៗចំនួន​៧ រួមមាន៖ ១.ការដឹកជញ្ជូនតាមផ្លូវគោក និងភស្តុភារកម្ម ២.ការដឹកជញ្ជូនតាមផ្លូវទឹក និងទំនាក់ទំនងការដឹកជញ្ជូនតាមផ្លូវទឹកជាអន្តរជាតិ ៣.ការធ្វើទំនើបកម្មនៃបច្ចេកវិទ្យាឌីជីថលលើវិស័យដឹកជញ្ជូន ៤.ការកាត់បន្ថយឧស្ម័នកាបូនក្នុងវិស័យដឹកជញ្ជូន និងភស្តុភារកម្ម ៥.ការដឹកជញ្ជូនក្នុងទីក្រុង ៦.សុវត្ថិភាពចរាចរណ៍ផ្លូវគោក និង ៧. ការដឹកជញ្ជូន និងបំលាស់ទីបរិយាបន្ន។ ជាមួយគ្នានោះផងដែរ លោកជំទាវរដ្ឋលេខាធិការ បានអញ្ជើញចូលរួមជាវាគ្មិនកិត្តិយសក្នុងកម្មវិធីកិច្ចប្រជុំពិសេសស្តីពីការតភ្ជាប់ការដឹកជញ្ជូន និងជំងឺរាតត្បាតកូវីដ-១៩ និងបានធ្វើសេចក្តីថ្លែងការណ៍ក្នុងសន្និសីទថ្នាក់រដ្ឋមន្ត្រីវិស័យដឹកជញ្ជូនលើកទី៤ស្តីពីគោលនយោបាយស្តីពីការពង្រីកគំនិតផ្តួចផ្តើមដឹកជញ្ជូនប្រកបដោយនិរន្តរភាពនៅតំបន់អាស៊ី និងប៉ាស៊ីហ្វិក ដើម្បីពង្រឹងកិច្ចសហប្រតិបត្តិការក្នុងតំបន់ ក្រោមប្រធានបទ៖ការពន្លឿនសកម្មភាពផ្លាស់ប្តូរក្នុងការដឹកជញ្ជូនដើម្បី​សម្រេចគោលដៅអភិវឌ្ឍន៍ប្រកបដោយចីរភាព៕