ភ្នំពេញ ៖ ស្ថានីយជញ្ជីងអចល័តចំនួន ២ទីតាំង ដែលទីតាំងទី១ស្ថិតនៅក្នុងស្រុកដំណាក់ចង្អើរ ខេត្តកែប និងទីតាំងទី២ស្ថិតនៅ ក្នុងស្រុករវៀង ខេត្តព្រះវិហារ បានចាប់ផ្តើមដំណើរការថ្លឹងសាកល្បងរថយន្តដឹកជញ្ជូនធុនធ្ងន់ទាំងអស់ក្នុងរយៈពេល ២០ថ្ងៃ ចាប់ពី ថ្ងៃទី០១ ដល់ថ្ងៃទី២០ខែធ្នូ ឆ្នាំ២០២១ និងអនុវត្តវិធានការផាកពិន័យ ចំពោះរថយន្តដឹកជញ្ជូនលើសទម្ងន់កម្រិតកំណត់ តាមបទប្បញ្ញត្តិ នៃច្បាប់ជាធរមាន ចាប់ពី ថ្ងៃទី២១ ខែធ្នូ ឆ្នាំ២០២១ តទៅ។ យោងទៅតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូនដែលវិទ្យុជាតិកម្ពុជាទទួលបានឱ្យដឹងថា គណៈកម្មាធិការ សម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ អនុវត្តដូច្នេះ ដើម្បី ទប់ស្កាត់បទល្មើសយានយន្តដឹកជញ្ជូនលើសទម្ងន់ និងការពារហេដ្ឋារចនាសម្ព័ន្ធផ្លូវថ្នល់ឲ្យស្ថិតស្ថេររឹងមាំ គង់វង្ស និងជាប់ធន់តាម អាយុកាលបច្ចេកទេសសាងសង់។ គណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ បានសម្រេច បង្កើតស្ថានីយជញ្ជីងអចល័តថ្លឹងយានយន្តដឹកជញ្ជូនលើសទម្ងន់កម្រិតកំណត់ ០២កន្លែងបន្ថែមទៀត ដែលមួយកន្លែង មានឈ្មោះថា ស្ថានីយដំណាក់ចង្អើរ–ខេត្តកែប ស្ថិតនៅលើកំណាត់ផ្លូវជាតិលេខ៣៣ ត្រង់ចំណុចគីឡូម៉ែត្រ២១+៥៨៥ ក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប និង មួយកន្លែងទៀត មានឈ្មោះថា អូរពោធិ៍–ខេត្តព្រះវិហារ ស្ថិតនៅលើកំណាត់ផ្លូវជាតិ លេខ៦២ ត្រង់ចំណុចគីឡូម៉ែត្រ ៥២+០០០ ក្នុងភូមិអូរពោធិ៍ ឃុំរមណីយ ស្រុករវៀង ខេត្តព្រះវិហារ។ តាមរយៈនេះសូមសាធារណជន ក៏ដូចជាសមាគមដឹកជញ្ជូនទំនិញផ្លូវគោក សមាគម ភ្នាក់ងារបញ្ជូនទំនិញកម្ពុជា ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ និងអ្នកពាក់ព័ន្ធទាំងអស់ ជ្រាបជាព័ត៌មាន និងចូលរួមសហការជាមួយមន្ត្រីមានសមត្ថកិច្ច ដែលបំពេញភារកិច្ច ប្រចាំការនៅទីតាំងស្ថានីយជញ្ជីងអចល័តថ្លឹងយានយន្តដឹកជញ្ជូនលើសទម្ងន់កម្រិតកំណត់ខាងលើ និង ចូលរួមអនុវត្ត បទប្បញ្ញត្តិច្បាប់ និងលិខិតបទដ្ឋានគតិយុត្តជាធរមាន ប្រកបដោយស្មារតីទទួលខុសត្រូវខ្ពស់ទាំងអស់គ្នា៕