កម្មវិធីវឌ្ឍនភាពការងារវិស័យសាធារណការ និងដឹកជញ្ជូន (MPWT Live Show)ក្រោមប្រធានបទ៖ “ការថែទាំផ្លូវថ្នល់ និងការចូលរួមពីប្រជាពលរដ្ឋ” ត្រូវបានចូលរួមជាវាគ្មិនកិត្តិយសពីឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន ថៃ្ងចន្ទ ១០រោច ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវថ្ងៃទី២៩ ខែវិច្ឆិកា ឆ្នាំ២០២១ នៅទីស្តីការ ក្រសួង ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាវាគ្មិន កិត្តិយសក្នុងកម្មវិធីវឌ្ឍនភាពការងារវិស័យសាធារណការ និងដឹកជញ្ជូន (MPWT Live Show) ក្រោម ប្រធានបទ៖ «ការថែទាំផ្លូវថ្នល់ និងការចូលរួមពីប្រជាពលរដ្ឋ» ដោយមានការអញ្ជើញចូលរួមពីឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស និងឯកឧត្តម ហេង រត្នពិសិដ្ឋ អគ្គនាយកនៃអគ្គ នាយកដ្ឋានសាធារណការ និងមន្ត្រីជំនាញពាក់ព័ន្ធក្រោមឱវាទក្រសួងផងដែរ។ កម្មវិធីនេះ គឺជាកម្មវិធីផ្សាយផ្ទាល់លើទំព័រហ្វេសប៊ុកផ្លូវការរបស់ក្រសួងសាធារណការ និងដឹកជញ្ជូន ដែលទទួលបានការអនុញ្ញាតដ៏ខ្ពង់ខ្ពស់ពីឯកឧត្តមទេសរដ្ឋមន្ត្រី ស៊ុន ចាន់ថុល ក្នុងការដាក់ដំណើរការជា ផ្លូវការក្នុងគោលបំណងបង្ហាញពីវឌ្ឍនភាព សមិទ្ធផល កិច្ចខិតខំប្រឹងប្រែងរបស់ក្រសួងទៅកាន់ប្រជា ពលរដ្ឋឱ្យកាន់តែទូលំទូលាយ។ កម្មវិធីនេះផ្ដល់ឱកាសឱ្យថ្នាក់ដឹកនាំ និងមន្ត្រីរបស់ក្រសួងផ្សារភ្ជាប់ទំនាក់ ទំនងជាមួយបងប្អូនប្រជាពលរដ្ឋឱ្យកាន់តែមានភាពជិតស្និទ្ធ តាមរយៈការបកស្រាយសំណួរដែលបានធ្វើ ការខមិន(Comment) សួរពាក់ព័ន្ធនឹងប្រធានបទរបស់វាគ្មិនកិត្តិយស ក្នុងទំព័រហ្វេសប៊ុកផ្លូវការរបស់ ក្រសួង ក៏ដូចជាជំរុញការផ្ដល់សេវាសាធារណៈឱ្យកាន់តែមានភាពល្អប្រសើរថែមទៀត។ ថ្លែងក្នុងកិច្ចចាប់ផ្តើមនៃកម្មវិធី ឯកឧត្តមរដ្ឋលេខាធិការ បានគួសបញ្ជាក់អំពីសារសំខាន់នៃប្រព័ន្ធបណ្តាញ ផ្លូវថ្នល់នៅក្នុងព្រះរាជាណាចក្រកម្ពុជាដែលរួមមានផ្លូវមួយលេខ ផ្លូវពីរលេខ និងផ្លូវបីលេខ សម្រាប់បម្រើដល់ការដឹកជញ្ជូនជូនប្រទេសជាតិ ក្នុងនោះផ្លូវមួយលេខសាងសង់បានចំនួន២២៥០គីឡូម៉ែត្រ ដោយក្រាលកៅស៊ូបាន១០០% ចំណែកផ្លូវពីរលេខមានប្រវែង៥០០០គីឡូម៉ែត្រ ក្រាលកៅស៊ូបានជាង ៣០០០គីឡូម៉ែត្រ ស្មើនឹងប្រមាណ៧៤% ដើម្បីពង្រឹងសមត្ថភាពនៃការដឹកជញ្ជូនឱ្យកាន់តែប្រសើរឡើង។ ឯកឧត្តមរដ្ឋលេខាធិការ បានបន្ថែមថា៖ ក្រសួងបានធ្វើការថែទាំផ្លូវមួយលេខ និងផ្លូវពីរលេខបាន ប្រមាណ៧០% អាស្រ័យដោយកម្រិតថវិកាដែលក្រសួងទទួលបានពីថវិកាជាតិ និងបានលើកឡើងអំពី បេសកកម្ម ការប្តេជ្ញាចិត្តប្រកបដោយស្មារតីទទួលខុសត្រូវខ្ពស់របស់ក្រសួង ក៏ដូចជាមន្ត្រីរាជការទាំង អស់ ដែលជាអ្នកបម្រើសេវាជូនប្រជាពលរដ្ឋក្នុងការជួសជុលថែទាំផ្លូវថ្នល់ និងបម្រើសេវាជូនប្រជាពលរដ្ឋ ដើម្បីធានានិរន្តរភាពនៃការដឹកជញ្ជូន។ ជាមួយគ្នានេះ ឯកឧត្តមរដ្ឋលេខាធិការ បានជម្រាបជូនផងដែរអំពីយន្តការមួយចំនួនក្នុងការពង្រឹង ការងារថែទាំផ្លូវថ្នល់នៅតាមបណ្តារាជធានី-ខេត្ត ដើម្បីឱ្យមន្ត្រីបំពេញបេសកកម្មលើការងារថែទាំផ្លូវថ្នល់ អាចពង្រឹងសមត្ថភាពរបស់ខ្លួននិងធ្វើការត្រួតពិនិត្យ តាមដានជាប្រចាំនូវស្ថានភាពខូចរបស់ផ្លូវថ្នល់ ដើម្បីជួសជុលថែទាំបានទាន់ពេលវេលា ក្នុងនោះ៖ ក្រសួងមានអគ្គនាយកដ្ឋានបច្ចេកទេស ដែលជាអ្នកផ្ដល់មធ្យោបាយនិងបច្ចេកទេសក្នុងការសាងសង់និងថែទាំផ្លូវថ្នល់ អគ្គនាយកដ្ឋានសាធារណការដែល ជាអ្នកពិនិត្យថាតើការថែទាំត្រូវការថវិកាវិនិយោគចំនួនប៉ុន្មាន និងអគ្គនាយកដ្ឋានប្រព័ន្ធចម្រោះទឹកកខ្វក់ ដែលជាអ្នកត្រួតពិនិត្យមើលបណ្ដាញប្រព័ន្ធចម្រោះទឹកកខ្វក់ចេញពីតួផ្លូវ។ ជាងនេះទៅទៀត ក្រសួងបានបង្កើតកម្មវិធីថែទាំផ្លូវ(ROAD CARE Mobile App)ដែលអាចឱ្យអ្នកប្រើ ប្រាស់ផ្លូវថ្នល់ ក៏ដូចជាប្រជាពលរដ្ឋចូលរួមផ្ដល់ព័ត៌មានពីផ្លូវមានជង្ហុកសំបុកមាន់ និងផ្លូវខូច តាមរយៈ ការបង្ហោះជារូបថត និងវីដេអូចូលទៅក្នុងកម្មវិធីនេះ និងបញ្ជូនទៅកាន់ក្រុមការងារទទួលបន្ទុករបស់ ក្រសួង មន្ទីរសាធារណការ និងដឹកជញ្ជូនទាំង២៥រាជធានី-ខេត្ត និងអាជ្ញាធរពាក់ព័ន្ធ ដើម្បីចុះទៅធ្វើការ ជួសជុលបានទាន់ពេលវេលា បង្ការកុំឱ្យផ្លូវខូចកាន់តែធំ ចំណាយថវិកាច្រើនក្នុងការជួសជុលថែទាំ និង បានថ្លែងអំណរគុណយ៉ាងជ្រាលជ្រៅដល់បងប្អូនប្រជាពលរដ្ឋដែលបានចូលរួមរាយការណ៍តាមរយៈកម្មវិធីនេះដើម្បីថែទាំផ្លូវថ្នល់យើងឱ្យបានគង់វង្ស និងកាត់បន្ថយចំណាយលើការជួសជុលថែទាំ។ ទស្សនាការផ្សាយផ្ទាល់ឡើងវិញ https://fb.watch/9A9fTQNN5x/