នៅទីស្ដីការក្រសួង​ថ្ងៃ១៣រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃពុធ ទី០៣ ខែវិច្ឆិកា ឆ្នាំ២០២១ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារ បានអញ្ជើញដឹកនាំកិច្ចប្រជុំក្រុមការងារពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងលើកិច្ចការប្រើប្រាស់ដីចំណីផ្លូវ នៅតាមបណ្តោយផ្លូវ និងផ្លូវរថភ្លើង តាមប្រព័ន្ធវីដេអូពីចម្ងាយ ដើម្បីប្រមូលធាតុចូលបន្ថែមសម្រាប់បំពេញបន្ថែមចំណុចខ្វះខាត សំដៅធ្វើយ៉ាងណាឱ្យការរៀបចំសេចក្ដីព្រាងអនុក្រឹត្យនេះមានខ្លឹមសារច្បាស់លាស់និងគ្រប់ជ្រុងជ្រោយ។ នៅក្នុង​ឱកាសនោះ ក្រុមលេខាធិការដ្ឋាន បានរាយការណ៍អំពីការងាររៀបចំ និងចំណុចមួយចំនួនដែលបានឯកភាពគ្នាកាលពីកិច្ចប្រជុំលើកមុន ក្នុងនោះរួមមាន ការដាក់បញ្ចូលក្នុងសេចក្តីយោងទាក់ទងទៅនឹងអនុក្រឹត្យពាក់ព័ន្ធចំនួន៥(ការបង្កើតអគ្គនាយកដ្ឋា នប្រព័ន្ធចម្រោះទឹកកខ្វក់ ការដំឡើងវិទ្យាស្ថានតេជោ សែន សាធារណការ និងដឹកជញ្ជូន អនុក្រឹត្យលេខ១៨១ ១៨២ និង១៨៣) ការឯកភាពលើមាត្រា១(ថ្មី)។ ជាមួយគ្នានេះដែរ អង្គប្រជុំបានចាប់ផ្តើមពិនិត្យពិភាក្សាលើមាត្រាទី២(ថ្មី)។ ដោយពិនិត្យឃើញថា មានសំណើសុំកែប្រែទាំងស្រុងលើមាត្រា២(ថ្មី) និងមាត្រាបន្តបន្តាប់ទៀត អង្គប្រជុំក៏បានឯកភាពឱ្យក្រុមលេខាធិការដ្ឋាន ពិនិត្យសំណើសុំកែប្រែទៅតាមមាត្រានីមួយៗ បញ្ចូលគ្នាជាសេចក្តីព្រាងមាត្រាថ្មីសិន ទើបស្នើដាក់ចូលក្នុងកិច្ចប្រជុំគណៈកម្មការ ជាក្រោយ។ ទន្ទឹមនឹងនេះ អង្គប្រជុំក៏បានពិភាក្សាផងដែរលើនីតិវិធីថ្មី ដែលជូនដំណឹងដោយក្រុមប្រឹក្សាអ្នកច្បាប់ ទីស្តីការគណៈរដ្ឋមន្រ្តី ស្នើឱ្យមានតំណាងក្រុមអ្នកច្បាប់ចូលរួមពិភាក្សា និងរៀបចំសេចក្តីព្រាងច្បាប់ពីដើមដំបូង៕