[Moneaksekar] - លោក ម៉ក់ សំណាង ប្រធានស្ថានីយ៍ជញ្ជីងថ្លឹងរថយន្តផ្លូវជាតិលេខ៧១ កំពុងប្រមូលលុយយ៉ាងសុខស្រួល
2018-03-12
Go to the website published Moneaksekar
តាមសេចក្ដីរាយការណ៍ពីក្រុមឈ្មួញនិងអាជីវករដឹកជញ្ជូនទំនិញឆ្លងកាត់ផ្លូវជាតិលេខ៧១ ជាពិសេសឈ្មួញព្រមទាំងអាជីវករដឹកជញ្ជូនដំឡូងមី កៅស៊ូ និងគ្រាន់ស្វាយចន្ទី បានឲ្យដឹងថា នៅពេលពួកគាត់ដឹកជញ្ជូនទំនិញឆ្លងកាត់ផ្លូវនេះត្រូវបង់លុយឲ្យលោក ម៉ក់ សំណាង ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៧១ ចំណុចត្រើង មិនអាចខកខានបានឡើយ។
ប្រភពបានឲ្យដឹងទៀតថាលោក ម៉ក់ សំណាង ប្រធានស្ថានីយ៍ជញ្ជីងថ្លឹងរថយន្តផ្លូវជាតិលេខ៧១ ក្នុងភូមិអូរស្វាយ ឃុំអូរស្វាយ ស្រុកកំពង់សៀម ខេត្តកំពង់ចាម បានប្រើប្រាស់ជញ្ជីងថ្លឹងរថយន្តធ្វើជាជញ្ជីងថ្លឹងលុយស្រេចតែអំពើចិត្តរបស់ខ្លួន។ ដូច្នេះលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនគួរបណ្ដោយឲ្យលោក ម៉ក់ សំណាង ធ្វើអ្វីៗតាមអំពើចិត្តតទៅទៀតទេ ព្រោះសកម្មភាពរបស់មន្ត្រីរូបនេះកំពុងធ្វើឲ្យមានការរិះគន់យ៉ាងខ្លាំង។
សមត្ថកិច្ចពាក់ព័ន្ធមួយចំនួនបានឲ្យដឹងថា រថយន្តដឹកឈើឆ្លងកាត់ផ្លូវជាតិលេខ៧១ ចូលផ្លូវជាតិលេខ៧ ក៏ជាប្រភពចំណូលដ៏សំខាន់របស់លោក ម៉ក់ សំណាង ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ១នៅចំណុចត្រើងផងដែរ។ ប្រភពបានឲ្យដឹងទៀតថា រថយន្តដឹកទំនិញ ដឹកកសិផល និងដឹកឈើទោះបីផ្ទុកលើសទម្ងន់មិនលើសទម្ងន់ក៏ដោយត្រូវតែបង់លុយឲ្យលោក ម៉ក់ សំណាង តាមការកំណត់ទើបអាចបន្តដំណើរទៅមុខទៀតបាន បើមិនដូច្នេះទេអាចត្រូវប្រឈមនឹងការរំខានចៀសមិនផុតឡើយ។ ការដែលលោក ម៉ក់ សំណាង ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីសំណាក់ប្រធានមន្ទីរសាធារណការនិងដឹកជញ្ជូនខេត្តកំពង់ចាមផងដែរ ទើបអ្វីៗអាចប្រព្រឹត្តទៅដោយរលូន។
ប្រភពខ្លះបានឲ្យដឹងថា រថយន្តធំៗដឹកទំនិញលើសទម្ងន់បើកបរឆ្លងកាត់ផ្លូវជាតិលេខ៧១ ក្នុងឃុំអូរស្វាយ ស្រុកកំពង់សៀម ខេត្តកំពង់ចាម ក្នុងមួយថ្ងៃៗរាប់រយគ្រឿងមិនដែលឃើញលោក ម៉ក់ សំណាង និងមន្ត្រីក្រោមឱវាទចាត់វិធានការពិន័យតាមច្បាប់នោះទេ។ ផ្ទុយទៅវិញលោក ម៉ក់ សំណាង គិតតែពីរឿងប្រមូលលុយពីម្ចាស់រថយន្តដឹកទំនិញទាំងនោះយកទៅចែកគ្នាធ្វើមានធ្វើបានយ៉ាងក្រអឺតក្រទម ហើយក៏មានការបែងចែកទៅប្រធានមន្ទីរសាធារណការខេត្តកំពង់ចាម មួយផ្នែកផងដែរទើបអ្វីៗអាចដំណើរការដោយស្ងប់ស្ងាត់។ ឈ្មួញនិងអាជីវករមួយចំនួនដែលដឹកកៅស៊ូ ស្រូវ ដំឡូងមី និងកសិផលផ្សេងៗទៀតឆ្លងកាត់ផ្លូវជាតិលេខ៧១ ចូលផ្លូវជាតិលេខ៧ បានឲ្យដឹងថា ពួកគាត់មិនដែលហ៊ានផ្ទុកទំនិញលើសទម្ងន់ទេ ព្រោះខ្លាចក្រុមជញ្ជីងថ្លឹងរថយន្តផាកពិន័យនាំឲ្យខាតពេលវេលា។ ប៉ុន្តែការពិតពួកគាត់នៅតែបង់លុយឲ្យតាមការកំណត់របស់លោក ម៉ក់ សំណាង ដើម្បីចៀសផុតពីការរំខានផ្សេងៗហើយការបង់លុយនោះពុំមានក្រដាសស្នាមឬវិក្កយបត្របញ្ជាក់ឡើយ។ ហេតុនេះហើយទើបមានការរិះគន់ថាលោក ម៉ក់ សំណាង ប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ៧១ កំពុងប្រើប្រាស់អំណាចនិងតួនាទីប្រមូលលុយតាមរបៀបពុករលួយយ៉ាងគឃ្លើន ហើយលោក ស៊ុន ចាន់ថុល ដែលជារដ្ឋមន្ត្រីក្រសួងសាធារណការនិងដឹកជញ្ជូន មិនគួរមើលរំលងតទៅទៀតនោះទេ៕
