ថ្ងៃអង្គារ ០៧រោច ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៨ ខែកញ្ញា ឆ្នាំ២០២១ នៅ ទីស្តីការក្រសួង ឯកឧត្ដម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែស្ដីពីវឌ្ឍនភាពគម្រោងប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI) ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំក្រសួងទទួលបន្ទុក តំណាងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ តំណាងកំពង់ផែស្វយ័តភ្នំពេញ តំណាងកំពង់ផែស្វយ័តក្រុងព្រះសីហនុ និងតំណាងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ មន្ត្រីជំនាញ ក្រុមអ្នកបច្ចេកទេស និងភាគីពាក់ព័ន្ធផងដែរ។ អង្គប្រជុំបានផ្តោតការពិភាក្សាជាសំខាន់លើផែនការបណ្តុះបណ្តាលមន្ត្រីបង្គោលអំពីការប្រើប្រាស់ប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI) សម្រាប់មន្ត្រីគយ និងរដ្ឋាករ មន្ត្រីកំពង់ផែ និងមន្ត្រី សមត្ថកិច្ចពាក់ព័ន្ធផ្សេងទៀត ដែលគ្រោងនឹងប្រព្រឹត្តទៅនៅពាក់កណ្តាលខែវិច្ឆិកា ឆ្នាំ២០២១នៅពេល ប្រព័ន្ធនេះត្រូវបានដំឡើងដំណាក់កាលដំបូង និងលំហូរនៃប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ ផែពីដំណាក់កាលមួយទៅកាន់ដំណាក់កាលមួយ ដើម្បីស្វែងយល់បន្ថែមអំពីពាក្យដែលត្រូវប្រើប្រាស់នៅក្នុងប្រព័ន្ធនេះ។ ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការ បានស្នើឱ្យបណ្ដាអង្គភាពទាំងឡាយពិចារណា ឱ្យបានហ្មត់ចត់ក្នុងការចាត់តាំងមន្ត្រីឱ្យមកចូលរួមការបណ្តុះបណ្តាលអំពីការប្រើប្រាស់ប្រព័ន្ធនេះ ពោល គឺត្រូវចាត់បញ្ជូនមន្ត្រីណាដែលចាំបាច់សម្រាប់អង្គភាពរបស់ខ្លួន មានសមត្ថកិច្ច និងមានសិទ្ធិក្នុងការ សម្រេចនៅពេលដំណើរការប្រព័ន្ធ ដោយហេតុថាការបណ្ដុះបណ្ដាលមិនអាចប្រព្រឹត្តទៅច្រើនលើកបានទេ។ ជាមួយគ្នានេះ ឯកឧត្តមរដ្ឋលេខាធិការ បានជម្រាបជូនផងដែរថា៖ នៅពេលប្រព័ន្ធផ្លាស់ប្តូរទិន្នន័យអេឡិចត្រូនិចនៅកំពង់ផែ(Port EDI) ត្រូវបានអភិវឌ្ឍ និងដំឡើងរួចរាល់ ប្រព័ន្ធនេះនឹងត្រូវដាក់ឱ្យដំណើរដោយអនុក្រឹត្យមួយ មិនមែនអភិវឌ្ឍ និងដំឡើងរួចដំណើរការតែម្ដងនោះទេ ដោយឡែកនីតិវិធីពាក់ព័ន្ធដែលមិនចាំបាច់គួរពិភាក្សា ដើម្បីកែសម្រួលនៅពេលក្រោយ។ គួរកត់សម្គាល់ថា៖ បច្ចុប្បន្នការធ្វើបែបបទនាវាចរណ៍ចូល-ចេញឆ្លងកាត់ ភ្នាក់ងារនាវាចរណ៍ត្រូវធ្វើឡើង ជាមួយអាជ្ញាធរមានសមត្ថកិច្ច ដោយត្រូវចំណាយពេលរង់ចាំយូ មានការលំបាក និងនីតិវិធីស្មុគស្មាញ ប៉ុន្តែនៅពេលប្រព័ន្ធនេះដំណើរការ វានឹងកាត់បន្ថយទម្រង់ឯកសារក្រដាសស្នាម ផ្លាស់ប្តូរពីរបៀបធ្វើការ ដោយដៃមកធ្វើការលើប្រព័ន្ធវិញ ជួយសម្រួលដល់ការធ្វើបែបបទនាវាចរណ៍ចូល-ចេញឆ្លងកាត់ មានភាពងាយស្រួល ចំណេញពេលវេលា ប្រកបដោយប្រសិទ្ធភាព និងតម្លាភាពផងដែរ៕