ឯកឧត្តម តូច ចាន់កុសល រដ្ឋលេខាធិការប្រចាំការអញ្ជើញជួបសំណេះសំណាលជាមួយបេក្ខជនជ័យ លាភីអាហារូបករណ៍ចំនួន១៣រូប តាមរយៈប្រព័ន្ធវីដេអូពីចម្ងាយ មុនចេញដំណើរទៅបន្តការសិក្សានៅសាធារណរដ្ឋឆែក ថ្ងៃពុធ ៩រោច ខែស្រាពណ៍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០១ ខែកញ្ញា ឆ្នាំ២០២១ ឯកឧត្តម តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជួបសំណេះសំណាលជាមួយបេក្ខជនជ័យលាភីអាហារូបករណ៍តាមប្រព័ន្ធវីដេអូពីចម្ងាយ មុនចេញដំណើរទៅបន្តការសិក្សានៅសាធារណរដ្ឋឆែក ដោយមានការចូលរួមពីថ្នាក់ដឹកនាំក្រសួង ។ ការជួបសំណេះសំណាលនេះធ្វើឡើង ដើម្បីផ្ដល់អនុសាសន៍ ចំណេះដឹង បទពិសោធន៍ល្អៗ ក៏ដូចជា បង្ហាញនូវគោលនយោបាយ និងចក្ខុវិស័យរបស់ក្រសួង ដែលជាទស្សនទានដ៏មានតម្លៃបំផុតសម្រាប់ បេក្ខជនក្នុងការយកទៅផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានដឹងបានយល់ និងមកទស្សនាកម្ពុជា ដើម្បីស្វែងរកកាលានុវត្តភាពក្នុងការវិនិយោគផងដែរ។ ថ្លែងទៅកាន់បេក្ខជនជ័យលាភីអាហារូបករណ៍នាឱកាសនោះ ឯកឧត្តមរដ្ឋលេខាធិការប្រចាំការ បានថ្លែងនូវការកោតសរសើរ និងអបអរសាទរដល់បេក្ខជនជ័យលាភីទាំងអស់ ដែលបានទទួលអាហារូបករណ៍ទៅបន្តការសិក្សានៅសាធារណរដ្ឋឆែក និងសង្ឃឹមជឿជាក់ថា៖ បេក្ខជនជ័យលាភីទាំងអស់ នឹងខិតខំប្រឹងប្រែងរៀនសូត្រ ដើម្បីក្រេបយកចំណេះដឹង និងបទពិសោធន៍ថ្មីៗនៅសាធារណរដ្ឋឆែក ដើម្បីចូលរួមជួយអភិវឌ្ឍប្រទេសជាតិមាតុភូមិយើងឱ្យបានរុងរឿងថែមទៀត។ ឆ្លៀតក្នុងឱកាសនោះផងដែរ ឯកឧត្តមរដ្ឋលេខាធិការ បានជម្រាបជូនអំពីសកម្មភាពការងារសម្រេចបាន របស់ក្រសួងក្នុងរយៈពេលកន្លងមកដែលក្នុងនោះរួមមាន៖ វិស័យសាធារណការ មានដូចជាគម្រោងសាងសង់ផ្លូវ៣៨ខ្សែក្នុងខេត្តសៀមរាប គម្រោងសាងសង់ផ្លូវ ៣៤ខ្សែក្នុងខេត្តព្រះសីហនុ គម្រោងធ្វើឲ្យប្រសើរឡើងវិញកំណាត់ផ្លូវជាតិលេខ៥ ផ្លូវល្បឿនលឿនភ្នំពេញក្រុងព្រះសីហនុ ផ្លូវក្រវាត់ក្រុង និងស្ពានធំៗ។ វិស័យដឹកជញ្ជូនផ្លូវគោក មានដូចជាការបង្កើតមណ្ឌលផ្ដល់សេវាសាធារណៈនៅតាមផ្សារទំនើបក្នុងរាជធានីភ្នំពេញ និងខេត្តសៀមរាប ផ្លាកលេខពិសេសផ្ទាល់ខ្លួន កម្មវិធីដកពិន្ទុបណ្ណបើកបរលើទូរសព្ទដៃ ការបង្កើតឱ្យមានសាលាបង្រៀនបើកបររថយន្តធុនធ្ងន់ ដើម្បីបណ្ដុះបណ្ដាលអ្នកបើកបររថយន្តធុនធំក្នុងការដោះស្រាយបញ្ហាកង្វល់របស់ក្រុមហ៊ុនដឹកជញ្ជូន ការធ្វើប្រតិភូកម្មលើការផ្តល់សេវាសាធារណៈទៅរដ្ឋបាលថ្នាក់ក្រោមជាតិ ដើម្បីបង្ខិតសេវាសាធារណៈទៅកៀកនឹងប្រជាពលរដ្ឋ ផ្តល់ភាពងាយស្រួល ឆាប់រហ័ស ប្រសិទ្ធភាព តម្លាភាព និងកាត់បន្ថយចំណាយក្រៅផ្លូវការស្របតាមគោលនយោបាយរបស់រាជរដ្ឋាភិបាល និងសមិទ្ធផលការងារ សំខាន់ៗជាច្រើនទៀតផងដែរ។ ជាមួយគ្នានេះផងដែរ ឯកឧត្តមរដ្ឋលេខាធិការប្រចាំការ បានជំរុញលើកទឹកចិត្តឱ្យបេក្ខជនជ័យលាភី អាហារូបករណ៍ទាំងអស់ ខិតខំប្រឹងប្រែងរៀនសូត្រ ដើម្បីមុខមាត់គ្រួសារ ក៏ដូចជាមុខមាត់ប្រទេសជាតិ និងបានបន្ថែមថា៖ នេះជាភ័ព្វសំណាងហើយដែលប្អូនៗបានរស់នៅក្រោមរបបដឹកនាំមួយដែលមានការគិតគូរគ្រប់ជ្រុងជ្រោយលើជោគវាសនា និងអនាគតរបស់ប្អូនៗទាំងអស់គ្នា។ ជាទីបញ្ចប់ ក្នុងនាមក្រសួងសាធារណការ និងដឹកជញ្ជូន ក្នុងនាមឯកឧត្តមទេសរដ្ឋមន្ត្រី ក៏ដូចជាក្នុងនាមថ្នាក់ដឹកនាំ និងមន្ត្រីរាជការក្រសួងទាំងអស់ ឯកឧត្តមរដ្ឋលេខាធិការប្រចាំការ បានជូនពរដល់បេក្ខជនជ័យលាភីទាំងអស់សូមប្រកបដោយសុខភាពល្អ និងចាកផុតពីជំងឺកូវីដ-១៩ទាំងអស់៕