នៅថ្ងៃពុធ ១០ កើត ខែស្រាពណ៍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី១៨ ខែសីហា ឆ្នាំ២០២១ វេលាម៉ោង៨ និង៣០នាទីព្រឹក ឯកឧត្តម ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោក បានអញ្ជើញចូលរួមក្នុងកិច្ចប្រជុំស្តីពីការរៀបចំផែនការមេប្រព័ន្ធដឹកជញ្ជូនឆ្លាតវៃសម្រាប់ប្រទេសកម្ពុជា(Intelligent Transport System Master plan) ក្រោមការគាំទ្រពីក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ តាមរយៈប្រព័ន្ធវីដេអូ ដោយមានការចូលរួមពីសំណាក់ភាគីកូរ៉េ លោក-លោកស្រីអគ្គនាយករង នៃអគ្គនាយកដ្ឋានជំនាញ លោក-លោកស្រីប្រធាននាយកដ្ឋាន និងមន្ត្រីជំនាញនៃប្រទេសទាំងពីរផងដែរ។ ថ្លែងក្នុងឱកាសបើកកិច្ចប្រជុំនាឱកាសនោះ ក្នុងនាមថ្នាក់ដឹកនាំក្រសួង ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលសាធារណរដ្ឋកូរ៉េ ជាពិសេស ក្រសួងដែនដី ហេដ្ឋា រចនាសម្ព័ន្ធ និងដឹកជញ្ជូនកូរ៉េ និងមជ្ឈមណ្ឌលស្រាវជ្រាវកូរ៉េ(KHRIHS) ដែលបានផ្តល់ការគាំទ្រដល់ ការរៀបចំផែនការមេប្រព័ន្ធដឹកជញ្ជូនឆ្លាតវៃ(Intelligent Transport System) សម្រាប់ប្រទេសកម្ពុជា និងបានបន្ថែមថា៖ បច្ចុប្បន្ននេះបច្ចេកវិទ្យាទំនើប ពិតជាផ្ដល់ឱកាសឱ្យយើងទាំងអស់គ្នា បានអភិវឌ្ឍ វិស័យដឹកជញ្ជូនឱ្យមានការរីក ចម្រើនក្នុងនោះរួមមាន៖ ឡានដែលដើរដោយថាមពលអគ្គិសនី ដែល កំពុងមានការប្រើប្រាស់នាពេល បច្ចុប្បន្ននេះជាដើម។ ឯកឧត្តមអគ្គនាយក បានកត់សម្គាល់ថា៖ ដើម្បីសម្របខ្លួនទៅនឹងការអភិវឌ្ឍន៍បច្ចេកវិទ្យានេះ ក្រសួង សាធារណការ និងដឹកជញ្ជូនត្រូវការធ្វើបច្ចុប្បន្នភាព និងរៀបចំផែនការមេប្រព័ន្ធដឹកជញ្ជូនឆ្លាតវៃ (Intelligent Transport System) ឱ្យមានប្រសិទ្ធភាព ដើម្បីឆ្លើយតបនិងដោះស្រាយបញ្ហាទាក់ទងនឹងការដឹកជញ្ជូនដែលយើងកំពុងប្រឈមនាបច្ចុប្បន្ននេះ និងបានគូសបញ្ជាក់ពីការប្ដេជ្ញាចិត្តរបស់ក្រសួង សាធារណការ និងដឹកជញ្ជូន ក្នុងការសម្របសម្រួលជាមួយស្ថាប័នរបស់រដ្ឋ សង្គមស៊ីវិល និងភាគីពាក់ ព័ន្ធទាំងឡាយដើម្បីអភិវឌ្ឍន៍គម្រោងនេះឱ្យបានជោគជ័យ។ ឯកឧត្តមអគ្គនាយក បានសម្តែងក្តីសង្ឃឹមយ៉ាងមុតមាំថា៖ ការរៀបចំផែនការមេប្រព័ន្ធដឹកជញ្ជូនឆ្លាតវៃនេះ អាចបញ្ចប់ក្នុងរយៈពេលមួយឆ្នាំតាមផែនការដែល បានកំណត់ដើម្បីយើងរួមគ្នាអនុវត្តឱ្យបានជោគជ័យ។ សូមជម្រាបជូនថា៖ សាធារណរដ្ឋកូរ៉េ បានអនុម័តគម្រោងប្រព័ន្ធដឹកជញ្ជូនឆ្លាតវៃនេះឡើង ក្រោមជំនួយអភិវឌ្ឍន៍ផ្លូវការ(ODA)ដើម្បីជួយធ្វើឱ្យប្រសើរឡើងដល់វិស័យដឹកជញ្ជូនកម្ពុជា ដោយមានការចូលរួមពីក្រសួងសាធារណការ និងដឹកជញ្ជូនកម្ពុជា ក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េ និងសមាគមសាងសង់នៅបរទេសរបស់កូរ៉េផងដែរ។ ប្រព័ន្ធដឹកជញ្ជូនឆ្លាតវៃនេះគឺជាបច្ចេកវិទ្យាទំនើប អាចប្រើដើម្បីគ្រប់គ្រងបណ្តាញផ្លូវថ្នល់ ជួយសម្រួល់ការ គ្រប់គ្រងនិងត្រួតពិនិត្យមធ្យោបាយដឹកជញ្ជូនក្នុងពេលវេលាជាក់ស្តែង ប្រមូលនិងប្រើប្រាស់ព័ត៌មានចរាចរណ៍ក្នុងពេលវេលាជាក់ស្តែង មិនបង្កឱ្យមាន ផលប៉ះពាល់ដល់បរិស្ថាន និងជាប្រព័ន្ធប្រមូលទិន្នន័យព័ត៌មានយកមកវិភាគ និងជួយឱ្យដំណើរការចរាចរណ៍ប្រព្រឹត្តទៅដោយរលូន។