ភ្នំពេញ ថ្ងៃទី២២ ខែកក្កដា ឆ្នាំ២០២១ -- ប្រឡាយលូ៥ គឺជាប្រឡាយដ៏សំខាន់មួយ ក្នុងការរំដោះទឹកក្នុងមូលដ្ឋាន​ខណ្ឌពោធិ៍​សែនជ័យ ខណ្ឌសែនសុខ និងខណ្ឌមានជ័យ ទម្លាក់ទៅប្រឡាយម័ល និងបន្តចុះទៅ​ជើងឯក ដែលគិតមកដល់ពេលនេះ ការស្តារប្រឡាយនេះ ត្រូវបានបញ្ចប់១០០ភាគរយ​ហើយ។ មន្រ្ដីជំនាញនៃមន្ទីរសាធារណការ និងដឹកជញ្ជូនរាជធានីភ្នំពេញបានបញ្ជាក់ថា ក្រុមការងារជំនាញបានស្តារយកភក់ចេញពីបាតប្រឡាយបានប្រមាណជាង២ម៉ឺនម៉ែត្រគូបសំរាម និងស្មៅជាង ២ ០០០ ម៉ែត្រគូប ផងដែរ ដែលបានធ្វើឱ្យចរន្តទឹកហូរយ៉ាង​លឿន​គ្មានការរំខាន ដែលអាចបញ្ជៀសបាននូវការលិចលង់ ភូមិដ្ឋានប្រជាពលរដ្ឋ។ លោក ដួង ចាន់សារ៉ាត់ ប្រធានអង្គភាពលូទឹក បូមទឹកនៃមន្ទីរសាធារណការ​និង​ដឹកជញ្ជូនរាជធានីភ្នំពេញបានឱ្យដឹងនៅព្រឹកថ្ងៃទី២២ ខែកក្កដា ឆ្នាំ២០២១នេះថា ដោយ​មានការយកចិត្តទុកដាក់និងការណែនាំពីឯកឧត្ដម ឃួង ស្រេង អភិបាលរាជធានីភ្នំពេញ ក្នុង​ការដោះស្រាយការស្តារប្រព័ន្ធបង្ហូរទឹក ជាពិសេសប្រឡាយមេនៅរាជធានីភ្នំពេញ មន្ទីរសាធារណការនិងដឹកជញ្ជូនរាជធានីភ្នំពេញដែលមានអង្គភាពលូទឹក បូមទឹក និង​ស្ថានីយចម្រោះទឹកកខ្វក់បានធ្វើសកម្មភាពស្តារប្រឡាយលូ៥ ដែលគិតមកដល់ត្រឹមល្ងាច​ថ្ងៃទី២១ ខែកក្កដា ឆ្នាំ២០២១ ការស្តារប្រឡាយលូ៥ បានបញ្ចប់១០០ភាគរយហើយ។ លោកបានបន្ដថា នៅព្រឹកថ្ងៃទី២២ ខែកក្កដានេះ ក្រុមការងារបាន​ចល័តកម្លាំង​និងគ្រឿង​ចក្រ ពីការស្តារប្រឡាយលូ៥នេះ បន្តមកបង្ហើយការស្តារប្រឡាយបឹងទំពន់ថែមទៀត។ លោកបានលើកឡើងថា ការស្តារប្រឡាយបឹងទំពន់ដែលនៅសេសសល់​ប្រវែង​ប្រមាណ១០០ម៉ែត្រទៀតនោះ ក្រុមការងារនឹងសម្រុកឱ្យបានរួចរាល់ក្នុងរយៈ​ពេល១​សប្តាហ៍​ទៀតនេះ។ បើតាមលោក ដួង ចាន់សារ៉ាត់ ប្រឡាយលូ៥ មានប្រវែង​ជាង ១ ០០០ ម៉ែត្រ ទទឹងមានទំហំ ពី១៥ ទៅ ៣០ម៉ែត្រ ចាប់ពីប្រឡាយលូប្រាំ ផ្លូវវេងស្រេង ដល់ ស្ថានីយបូមទឹកលូ៥។ ការដ្ឋាននេះ បានចាប់ផ្តើមស្តារ ដោយប្រើប្រាស់សាឡង់ ចាប់ពី​ថ្ងៃទី១៩ ខែមិថុនា ឆ្នាំ២០២១ ហើយបានបញ្ចប់១០០ភាគរយ​ កាលល្ងាចថ្ងៃទី២១ ខែកក្កដា ឆ្នាំ២០២១នេះ។ លោកបានបញ្ជាក់បន្ថែមថា ការស្តារប្រឡាយលូ៥នេះ ក្រុមការងារ ស្តារ​ភក់​ចេញ​បានចំនួន ២១ ៣៧៥ ម៉ែត្រគូប សំរាម និងស្មៅបានចំនួន ២ ២៥០ ម៉ែត្រគូប។ លោកប្រធានអង្គភាពក៏ស្នើសូមឱ្យបងប្អូនប្រជាពលរដ្ឋមេត្តាទុកដាក់សំរាមឱ្យបានត្រឹមត្រូវ ទៅតាមទីតាំងដែលក្រុមហ៊ុនប្រមូលសំរាមបានកំណត់ ហើយសូមកុំបោះសំរាម​ចូលក្នុងប្រឡាយទឹកនាំឱ្យបិទបាំងផ្លូវទឹក មិនអាចហូរដល់ស្ថានីយ៕