សៀមរាប៖ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងបញ្ជាក់ថា ការដឹកលើសទម្ងន់កំណត់ ត្រូវតែអនុវត្តដោយច្បាប់ដែលមានជាធរមាន ដោយមិនមានការយោគយល់នោះឡើយ ។ ឯកឧត្តមទេសរដ្ឋមន្ត្រី ថ្លែងបញ្ជាក់ដូច្នេះ នៅពេលដែលឯកឧត្តមបានអញ្ជើញជាអធិបតី ក្នុងពិធីបើកឱ្យដំណើរការនូវមណ្ឌលផ្តល់សេវាសាធារណៈទី៥ របស់ក្រសួងសាធារណការ និងដឹកជញ្ជូន នៅផ្សារទំនើបហេរីថេក វ៉ក ខេត្តសៀមរាប នាថ្ងៃទី ២១ ខែកក្កដា ឆ្នាំ២០២១ នេះ ។ ឯកឧត្តម ស៊ុន ចាន់ថុល បានបញ្ជាក់បន្ថែមថា ក្រសួងនៅតែបន្តអនុវត្តវិធានការក្ដៅដូចភ្លៀងរលឹម ដើម្បីចាប់រថយន្ដដឹកលើសទម្ងន់កំណត់ដោយច្បាប់ ដោយគ្មានរើសអើងថា ជាយានយន្តរបស់អ្នកក្រ អ្នកមាន ឬអ្នកមានខ្នងជាដាច់ខាត ការព្រមាននេះ ធ្វើឡើងក្រោយពីម្ចាស់យានយន្តដឹកជញ្ជូនមួយក្រុមកាលពីថ្ងៃទី ២០ ខែ កក្កដា ម្សិលមិញ នាំគ្នាតវ៉ា និងស្នើសុំកុំឱ្យមានឃាត់យានយន្តទុក១ឆ្នាំ ដោយសុំត្រឹមតែពិន័យជាថវិកា និងស្នើសុំដោះលែងយានយន្តទាំងឡាយណា ដែលកំពុងឃាត់ទុក១ឆ្នាំ ឱ្យចរាចរណ៍ដឹកជញ្ជូនបាន ព្រមទាំងស្នើសុំផ្ទុកទម្ងន់សរុបដល់ ៥៥តោន ចំពោះយានយន្តដែលអនុញ្ញាតឱ្យដឹកត្រឹមតែ ៥០តោន (បន្ថែម១៥តោន), ស្នើសុំ ផ្ទុកទម្ងន់សរុបដល់ ៤៥តោន (បន្ថែម១៥តោន) ចំពោះប្រភេទយានយន្តអនុញ្ញាតឱ្យដឹកត្រឹមតែ ៤០តោន, ស្នើសុំផ្ទុកទម្ងន់សរុបដល់ ៣៥តោន (បន្ថែម១០តោន) ចំពោះប្រភេទយានយន្តដែលអនុញ្ញាតឱ្យដឹកត្រឹមតែ ៣០តោន, និងស្នើសុំផ្ទុកទម្ងន់សរុបដល់ ២៥តោន (បន្ថែម៩តោន) ចំពោះប្រភេទយានយន្ត ដែលក្នុងច្បាប់កំណត់ត្រឹមតែ ១៦តោន ។ ឯកឧត្តមទេសរដ្ឋមន្ត្រី ស៊ុន ចាន់ថុល បានណែនាំដល់ម្ចាស់យានយន្តធុនធ្ងន់ទាំងអស់ ឲ្យចូលទៅមើលច្បាប់ស្តីពីផ្លូវថ្នល់ ត្រង់មាត្រា ៦០ ឱ្យបានច្បាស់លាស់ មុននឹងតវ៉ា ឬលើកសំណើ ខណៈច្បាប់នេះ មានការធ្វើវិសោធនកម្ម ។ ឯកឧត្តម មានប្រសាសន៍ថា «បើមិនចង់ឱ្យគេឃាត់យានយន្តទុក១ឆ្នាំ គឺកុំដឹកលើសទៅចប់ហើយ ។ ច្បាប់ គឺច្បាប់ ដោយគ្មានការយោគយល់ចំពោះមនុស្សមួយក្រុមតូចដឹកល្មើសដោយច្បាប់ ដែលនាំឱ្យខូចប្រយោជន៍សាធារណៈនោះឡើយ ព្រោះយើងត្រូវតែខិតខំថែរក្សាទ្រព្យសម្បត្តិជាតិ ខណៈរាជរដ្ឋាភិបាលបាននិងកំពុងស្វះស្វែងរកថវិកា មកអភិវឌ្ឍន៍ផ្លូវថ្នល់ ស្ពាន ដើម្បីបម្រើដល់វិស័យដឹកជញ្ជូន សំដៅលើកស្ទួយកំណើនសេដ្ឋកិច្ចជាតិ និងសម្រួលដល់ការធ្វើចរាចរណ៍របស់ប្រជាពលរដ្ឋ»។ យោងតាមរបាយការណ៍របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានឱ្យដឹងថា មានយានយន្តចំនួន ១៧៣គ្រឿងហើយ ដែលត្រូវបានពិន័យ និងឃាត់ទុកមិនឱ្យធ្វើចរាចររយៈពេល១ឆ្នាំ តាមច្បាប់ស្តីពីផ្លូវថ្នល់មាត្រា៦០ ក្រោយពីមន្រ្តីនៅតាមស្ថានីយ និងមន្ត្រីចុះឆ្មក់ បានពិនិត្យឃើញដឹកលើសទម្ងន់កំណត់ចាប់ពី ២០ភាគរយឡើងទៅ ៕