(កំពង់ចាម)៖ រាជរដ្ឋាភិបាល​ នឹង​ពង្រីក​ផ្លូវ​ជាតិ​លេខ​៧ ជាផ្លូវ ៤គន្លង ដែលមានប្រវែង​ជាង ៤០គីឡូម៉ែត្រ ចាប់ពីចំណុចទីប្រជុំជនស្គន់ ក្នុង​ស្រុកជើងព្រៃ មកដល់ចំណុចគល់ស្ពានគីហ្សូណា ក្នុង​ទីរួមខេត្តកំពង់ចាម។ កាល​ពី​ព្រឹក​ថ្ងៃ​ទី​១២ ខែកក្កដា ឆ្នាំ២០២១នេះ ឯកឧត្តម អ៊ុន ចាន់ដា អភិបាលនៃគណៈអភិបាល​ខេត្ត​កំពង់​ចាម បានអញ្ជើញអមដំណើរ​ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រីក្រសួង​សាធារ​ណ​ការ​ និង​ដឹក​ជញ្ជូន បាន​​អញ្ជើញ​ចុះ​ពិនិត្យគម្រោងនេះ​។ គម្រោងមួយនេះ ជាចំណងដៃថ្មីស្រឡាងមួយទៀត​របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ជាប្រមុខ ជូនដល់ប្រជាពលរដ្ឋក្នុងខេត្តកំពង់ចាម ក៏ដូចជាតភ្ជាប់ចរាចររបស់បងប្អូនប្រជាពលរដ្ឋ នៅតាមបណ្តាខេត្តភាគឥសាន្ត។ តាមរយៈ ក្រសួងសាធារណៈការ និងដឹកជញ្ជូន សមិទ្ធិផលថ្មីនានារបស់រាជរដ្ឋាភិបាលកម្ពុជា នៅតែបន្តកសាង ស្ថាបនា ជួសជុលឡើង ជាក់ស្តែង គម្រោងពង្រីកកំណាត់ផ្លូវជាតិលេខ៧ ជាផ្លូវដែលមាន ៤គន្លង ចាប់ពីចំណុចរង្វង់មូលផ្សារស្គន់ រហូតដល់គល់ស្ពានគីហ្សូណា ក្រុងកំពង់ចាម នឹងផ្តល់ភាពងាយស្រួលក្នុងការធ្វើដំណើរចរាចរណ៍ទៅវិញទៅមក ខណៈបច្ចុប្បន្នកម្ពុជា មានកំណើនមធ្យោបាយដំណើរពីមួយឆ្នាំទៅមួយឆ្នាំ។ សូមបញ្ជាក់​ថា នាបច្ចុប្បន្ននេះ ផ្លូវចាប់ពីចំណុចស្គន់ ឆ្ពោះទៅដល់រាជធានីភ្នំពេញ គឺយើងមានផ្លូវ ៤គន្លង រួចហើយ។ ដោយឡែក ចាប់ពីចំណុចស្គន់ ឆ្ពោះមកកាន់ទីរួម​ខេត្តកំពង់ចាមវិញ ​មានផ្លូវ​តែ ២គន្លង​ប៉ុណ្ណោះ។ គម្រោងនេះ នឹងលេចចេញជារូបរាង បន្ទាប់ពីមន្ត្រីបច្ចេក​ទេសក្រសួងសាធារណការ នឹងដឹកជញ្ជូន ​សិក្សាលម្អិត ក្នុងពេលឆាប់ៗនេះ​៕​