កណ្តាល៖ លោកជំទាវ កុយ សុដានី រដ្ឋលេខាធិការក្រសួង សាធារណការនិងដឹកជញ្ជូន នៅថ្ងៃព្រហស្បតិ៍ ទី២៤ ខែមិថុនា ឆ្នាំ២០២១នេះ បានអញ្ជើញអមដំណើរឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនចូលរួមគោរពវិញ្ញាណក្ខន្ធសពឧបាសិកា ហុង ចេងហ្គិចលន ត្រូវជា មាតាក្មេករបស់ឯកឧត្ដមឧត្តមសេនីយ៍ឯក ប៉ោ វណ្ណៈ មេបញ្ជាការរងកងរាជអាវុធហត្ថលើផ្ទៃប្រទេស នៅគេហដ្ឋានសព ស្ថិតនៅភូមិព្រែកតាដួង ឃុំព្រែកថ្មី ស្រុកកោះធំ ខេត្តកណ្តាល។ នាឱកាសនោះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឲ្យដឹងថា មរណភាពរបស់ឧបាសិកា ហុង ចេងហ្គិចលន គឺជាការបាត់បង់នូវមាតាក្មេក មាតាបង្កើត ជីដូន និងជីដូនទួតជាទីគោរពស្រឡាញ់ដ៏ជ្រាលជ្រៅបំផុត និងប្រកបដោយព្រហ្មវិហារធម៌ ដែលកន្លងមក ឧបាសិកាហុង ចេងហ្គិចលន បានតស៊ូចិញ្ចឹមបីបាច់ថែរក្សា និងអប់រំទូន្មានបុត្រធីតារហូតក្លាយជាបញ្ញវន្ត និងធនធានដ៏មានតម្លៃសម្រាប់សង្គមជាតិ។ គួរជម្រាបផងដែរថា ឧបាសិកា ហុង ចេងហ្គិចលន បានទទួលមរណភាពកាលពីថ្ងៃអង្គារ ១៣កើត ខែបឋមាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែមិថុនា ឆ្នាំ២០២១ វេលាម៉ោង១២:៤៥នាទី ក្នុងជន្មាយុ ៩៨ វស្សាដោយជរាពាធ។ គួរជម្រាបជូនថា ឯកឧត្តមទេសរដ្ឋមន្ត្រី ព្រមទាំងគណៈប្រតិភូតំណាងឱ្យមន្ត្រីរាជការ បុគ្គលិក និងកម្មករនៃក្រសួងសាធារណការ និងដឹកជញ្ជូន បានចូលរួមរំលែកនូវមរណទុក្ខដ៏ក្រៀមក្រំ និងសេចក្ដីសង្វេគជាទីបំផុត ជាមួយឯកឧត្តមឧត្តមសេនីយ៍ឯក និងលោកជំទាវ ព្រមទាំងក្រុមគ្រួសារ និងបានលំឱនកាយវាចាចិត្ត ឧទ្ទិសបួងសួងដល់ដួងវិញ្ញាណក្ខន្ធរបស់ឧបាសិកា ហុង ចេងហ្គិចលន សូមឱ្យបានសោយសុខក្នុង សុគតិភពកុំបីឃ្លៀងឃ្លាតឡើយ៕