ឯកឧត្តមទេសរដ្ឋមន្ត្រី ស៊ុន ចាន់ថុល ជួបពិភាក្សាការងារជាមួយលោក Young Tae Kim អគ្គលេខា ធិការនៃវេទិកាដឹកជញ្ជូនអន្តរជាតិ(International Transport Forum) តាមប្រព័ន្ធវីដេអូពីចម្ងាយ ថ្ងៃព្រហស្បតិ៍ ១៥រោច ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១០ ខែមិថុនា ឆ្នាំ២០២១ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន បានជួបពិភាក្សា ការងារជាមួយលោក Young Tae Kim អគ្គលេខាធិការនៃវេទិកាដឹកជញ្ជូនអន្តរជាតិ (International Transport Forum) តាមប្រព័ន្ធវីដេអូពីចម្ងាយ ដោយមានការចូលរួមដោយផ្ទាល់ពីថ្នាក់ដឹកនាំក្រសួង ទទួលបន្ទុក និងមន្ត្រីជំនាញបច្ចេកទេសពាក់ព័ន្ធ ដើម្បីពិភាក្សាអំពីកិច្ចសហប្រតិបត្តិការ រវាងកម្ពុជា អាស៊ាន និងវេទិកាដឹកជញ្ជូនអន្តរជាតិ។ ជំនួបនេះបានពិភាក្សាលើរបៀបវារៈមួយចំនួនរួមមាន៖ ការចូលរួមរបស់វេទិកាដឹកជញ្ជូនអន្តរជាតិនៅក្នុង កិច្ចប្រជុំរដ្ឋមន្ត្រីដឹកជញ្ជូនអាស៊ាន២០២០-២០២១ ដែលកម្ពុជាធ្វើជាម្ចាស់ផ្ទះ បច្ចុប្បន្នភាពសមាជិកភាពរបស់វេទិកាដឹកជញ្ជូនអន្តរជាតិ និងការចែករំលែកព័ត៌មានរបស់វេទិកាដឹកជញ្ជូនអន្តរជាតិជាមួយនឹង កម្ពុជា និងអាស៊ាន។ ថ្លែងក្នុងកិច្ចចាប់ផ្តើមទៅកាន់អង្គប្រជុំនាឱកាសនោះ ឯកឧត្តមទេសរដ្ឋមន្ត្រី បានជម្រាបជូនវេទិកាដឹក ជញ្ជូនអន្តរជាតិ អំពីការបិទបញ្ចប់កិច្ចប្រជុំឧត្តមមន្ត្រីដឹកជញ្ជូនអាស៊ាន(STOM) ដែលកម្ពុជាបានធ្វើជា ម្ចាស់ផ្ទះចាប់ពីថ្ងៃទី៨ ដល់ថ្ងៃទី៩ ខែមិថុនា នាពេលថ្មីៗកន្លងទៅនេះ។ ជាមួយគ្នានោះផងដែរ លោក Young Tae Kim បានធ្វើបច្ចុប្បន្នភាពអំពីសមាជិកភាពនៃវេទិកាដឹក ជញ្ជូនអន្តរជាតិ(ITS) ដោយក្នុងនោះលោកបានបញ្ជាក់ថា៖ ប៉ុន្មានឆ្នាំកន្លងទៅនេះ ITFទទួលបាន សមាជិកថ្មីមួយចំនួនទៀតរួមមាន ប្រទេសMongolia ប្រទេសObekistan និងបណ្តាប្រទេសចំនួន៧ទៀតមកពីទ្វីបអាស៊ី និងបានសម្តែងនូវការស្វាគមន៍ចំពោះទំនាក់ទំនងរវាងបណ្តាប្រទេសអាស៊ីអាគ្នេយ៍ ជាពិសេស កម្ពុជា ដែលមានបំណងចង់ចូលជាសមាជិករបស់វេទិកាដឹកជញ្ជូនអន្តរជាតិ តាមរយៈ អង្គការUNSCAP និងធនាគារអភិវឌ្ឍន៍អាស៊ី និងលេខាធិការដ្ឋានអាស៊ានផងដែរ។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រី ក្នុងនាមជាប្រធានកិច្ចប្រជុំរដ្ឋមន្ត្រីដឹកជញ្ជូនអាស៊ាន បានសម្តែងនូវការស្វាគមន៍ចំពោះការចូលរួមដោយផ្ទាល់របស់វេទិកាដឹកជញ្ជូនអន្តរជាតិនៅក្នុងកិច្ចប្រជុំ ថ្នាក់រដ្ឋមន្ត្រីដឹកជញ្ជូនអាស៊ាន ដែលកម្ពុជាគ្រោងនឹងធ្វើជាម្ចាស់ផ្ទះនៅក្នុងខែវិច្ឆិកា ឆ្នាំ២០២១នេះ នៅពេលទទួលបានការយល់ព្រមជាទូទៅពីរដ្ឋសមាជិកអាស៊ានទាំងអស់ នៅក្នុងបរិបទនៃការរាតត្បាត ជំងឺកូវីដ-១៩។ ឯកឧត្តមទេសរដ្ឋមន្ត្រី ក៏បានជម្រាបជូនផងដែរថា៖ បញ្ហាសុវត្ថិភាពចរាចរណ៍គឺជាបញ្ហាគួរឱ្យព្រួយបារម្ភ បំផុតរបស់កម្ពុជា ក៏ដូចជាអាស៊ានទាំងមូល ដោយហេតុថា៖ បច្ចុប្បន្ននេះមានមនុស្សចំនួនពី៤ ទៅ ៥នាក់ គិតជាមធ្យម បានស្លាប់ដោយសារគ្រោះថ្នាក់ចរាចរណ៍នៅកម្ពុជា បើយោងតាមការប៉ាន់ស្មានរបស់ធនាគារពិភពលោក ដោយក្នុងនោះបានបង្កឱ្យខូចខាតទ្រព្យសម្បត្តិប្រមាណ៣០០ លានដុល្លារ ក្នុងមួយឆ្នាំ ខាតបង់ពេលវេលា និងប៉ះពាល់ដល់សេដ្ឋកិច្ចជាតិផងដែរ និងបានសម្ដែងបំណងចង់ធ្វើការ យ៉ាងជិតស្និតជាមួយវេទិកាដឹកជញ្ជូនអន្តរជាតិដើម្បីដោះស្រាយបញ្ហានេះឱ្យមានប្រសិទ្ធភាព។ លើសពីនេះទៀត ឯកឧត្តមទេសរដ្ឋមន្ត្រី បានបន្តថា៖ កម្ពុជាចង់រៀនសូត្របទពិសោធន៍របស់វេទិកាដឹក ជញ្ជូនអន្តរជាតិ ទាក់ទងនឹងគោលនយោបាយ យុទ្ធសាស្ត្រ ការដឹកជញ្ជូនបៃតង ដោយសារកម្ពុជា សព្វថ្ងៃនេះមិនទាន់មានយានយន្តដើរដោយអគ្គិសនី(Electric Vehicle) នៅឡើយទេ ប៉ុន្តែកម្ពុជាកំពុង ធ្វើដំណើរឆ្ពោះទៅកាន់ទិសដៅនោះហើយ។ ឯកឧត្តមទេសរដ្ឋមន្ត្រី ក៏បានស្នើសុំអនុសាសន៍ និងការចែករំលែកព័ត៌មានពីវេទិកាដឹកជញ្ជូនអន្តរជាតិ លើការប្រើប្រាស់ប្រព័ន្ធGPS បំពាក់លើយានយន្តដើម្បីតាមដានស្ថានភាពយានយន្តដែលកំពុងបើកបរ លើដងផ្លូវ ដោយសារបច្ចុប្បន្នេះមានប្រព័ន្ធច្រើនមិនដឹងថាប្រព័ន្ធណាមួយល្អអាចទទួលយកបានសម្រាប់ កម្ពុជា ក៏ដូចជាបណ្តាប្រទេសអាស៊ាន ដើម្បីយកបញ្ហានេះទៅសិក្សាស្វែងយល់ និងពិភាក្សានៅក្នុងកិច្ច ប្រជុំថ្នាក់រដ្ឋមន្ត្រីដឹកជញ្ជូនអាស៊ាន សំដៅអនុម័តយកបទដ្ឋានរួមមួយសម្រាប់ប្រើប្រាស់ទាំងអស់គ្នា៕