[Phnom Penh Post] - កម្ពុជាពន្លឿនការសាងសង់ហេដ្ឋារចនាសម្ព័ន្ធ និងប៉ុស្តិ៍ត្រួតពិនិត្យនៅព្រំដែនថៃ
2021-05-24
Go to the website published Phnom Penh Post
ភ្នំពេញៈ កម្ពុជាកំពុងពន្លឿនការសាងសង់ហេដ្ឋារចនាសម្ព័ន្ធផ្លូវ និងប៉ុស្តិ៍ត្រួតពិនិត្យទំនិញនៅច្រកព្រំដែនអន្តរជាតិស្ទឹងបត់ (កម្ពុជា) ជាមួយនឹងច្រកបានណងអៀន (ថៃ) ខណៈដំណើរការសាងសង់ផ្លូវរបស់ប្រទេសថៃតភ្ជាប់មកច្រកទ្វារនេះ សម្រេចបាន ៧០ ភាគរយហើយ។
កាសែត Bangkok Post បានឱ្យដឹងថា ផ្លូវនេះមាន ៤ គន្លង តភ្ជាប់ពីព្រំដែនបានណងអៀនក្នុងខេត្តស្រះកែវរបស់ថៃ មកព្រំដែនស្ទឹងបត់ក្នុងខេត្តបន្ទាយមានជ័យរបស់កម្ពុជា។
កាសែត Bangkok Post បន្ថែមទៀតថា ផ្លូវនេះនឹងចំណាយថវិកា ២ ពាន់លានបាត (៦៣,៧១ លានដុល្លារ) មានប្រវែង ២៥ គីឡូម៉ែត្រ ដែលនឹងជួយសម្រួលដល់ការដឹកជញ្ជូន និងទេសចរណ៍ដល់ភាគីទាំង ២។ ការស្ថាបនាផ្លូវនេះ គ្រោងនឹងបញ្ចប់នៅខែកុម្ភៈឆ្នាំក្រោយ។
លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងថា សព្វថ្ងៃកម្ពុជាបាននិងកំពុងដំណើរការសាងសង់ផ្លូវ និងហេដ្ឋារចនាសម្ព័ន្ធនៅច្រកព្រំដែនស្ទឹងបត់យ៉ាងមមាញឹក។
លោកបានឱ្យដឹងថា៖ «យើងកំពុងតែឌីហ្សាញប្លង់ប៉ុស្តិ៍ត្រួតពិនិត្យទំនិញបណ្តោះអាសន្នរបស់យើង និងហេដ្ឋារចនាសម្ព័ន្ធផ្សេងទៀតកំពុងសាងសង់។ យើងឃើញថា ច្រកព្រំដែនប៉ោយប៉ែតមានការកកស្ទះរថយន្តដឹកទំនិញយ៉ាងខ្លាំង ដូច្នេះទាមទារឱ្យមានហេដ្ឋារចនាសម្ព័ន្ធថ្មីសមរម្យសម្រាប់ត្រួតពិនិត្យទំនិញ និងអ្នកដំណើរចេញចូលប្រទេសទាំង ២»។
បើតាមរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ការសាងសង់គម្រោងនេះត្រូវបានចំណាយថវិកាចំនួន ២៦,៨៥ លានដុល្លារ ដែលជាគម្រោងឥណទានទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង (NEDA)។
មជ្ឈមណ្ឌលប្រឹក្សាធុរកិច្ចកម្ពុជា (CBC) ត្រូវបង្កើតឡើងលើកដំបូងកាលពីថ្ងៃទី ២០ ខែឧសភា ឆ្នាំ ២០២១ នៅទីក្រុងបាងកក ប្រទេសថៃ ដើម្បីបម្រើជាមជ្ឈមណ្ឌលច្រកចេញចូលតែមួយសម្រាប់ការផ្លាស់ប្តូរពាណិជ្ជកម្ម វិនិយោគ វប្បធម៌ និងទេសចរណ៍រវាងកម្ពុជា និងថៃ។
បើយោងតាមលោក អ៊ូក សោភ័ណ្ឌ ឯកអគ្គរាជទូតរបស់កម្ពុជាប្រចាំនៅទីក្រុងបាងកក បានឱ្យដឹងនៅក្នុងពិធីដាក់ឱ្យដំណើរការ CBC ថា ដើម្បីផ្សព្វផ្សាយការទូត សេដ្ឋកិច្ច លើកកម្ពស់ពាណិជ្ជកម្មអន្តរជាតិ និងទាក់ទាញក្រុមវិនិយោគិនបរទេសមកកាន់កម្ពុជាកាន់តែច្រើនបន្ថែមទៀត ការបើកដំណើរការ CBC នឹងដើរតួជាស្ពានយ៉ាងសំខាន់។
លោកបន្តថា ប្រទេសថៃស្ថិតនៅក្នុងចំណោមប្រទេសវិនិយោគិនធំជាងគេទី ៩ នៅក្នុងប្រទេសកម្ពុជា ដែលស្រូបយកប្រហែល ១ ពាន់លានដុល្លារ នៅចន្លោះឆ្នាំ ១៩៩៤ និងចុងត្រីមាសទី ៣ ឆ្នាំ ២០១៧។ បច្ចុប្បន្នមានក្រុមហ៊ុនជាង ១ ០០០ មកពីប្រទេសថៃបានចុះបញ្ជីនៅក្រសួងពាណិជ្ជកម្មកម្ពុជាក្នុងចំណោមក្រុមហ៊ុនទាំងនោះមានដូចជា BJC BigC Group of Companies, Siam Cement Group (SCG), Charoen Porkphand Group និងក្រុមហ៊ុនប្រតិបត្តិករ CP All Public Company ដែលគ្រោងនឹងបើកហាងលក់ 7-Eleven នៅក្នុងប្រទេសកម្ពុជា។
ទំហំពាណិជ្ជកម្មកម្ពុជា-ថៃ ក្នុងត្រីមាសទី ១ ឆ្នាំ ២០២១ មានចំនួនសរុប ២ ០៩៧,៣៤ លានដុល្លារ ធ្លាក់ចុះ ២១,៣៦ ភាគរយធៀបនឹងរយៈពេលដូចគ្នាឆ្នាំ ២០២០។ ក្នុងនោះការនាំពីកម្ពុជាទៅថៃ មាន ៣២៩,៥៤ លានដុល្លារ ធ្លាក់ ៤៨,៩២ ភាគរយ ខណៈការនាំទំនិញពីប្រទេសថៃមកកម្ពុជាមានតម្លៃ ១ ៧៦៧,៨ លានដុល្លារ ធ្លាក់ ១២,៥៧ ភាគរយ។ នេះបើតាមទិន្នន័យពីនាយកដ្ឋានពាណិជ្ជកម្មបរទេសប្រទេសថៃ៕
