ការបន្តយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទីពីរ រយៈពេលបីថ្ងៃ ចាប់គិតពីថ្ងៃទី២០ ដល់ថ្ងៃទី ២២ ខែមេសា ឆ្នាំ២០២១ សម្រេចបានចំនួន ១៥៦១ ដូស ក្នុងនោះ៖ បុគ្គលិកមន្ត្រីរាជការក្រសួង បានចំនួន៣៧២ដូស ស្មើនឹង២៣,៨៣% និងប្រជាពលរដ្ឋខណ្ឌឬស្សីកែវបានចំនួន១១៨៩ ដូសស្មើនឹង ៧៦,១៧% ថ្ងៃព្រហស្បតិ៍ ១១កើត ខែពិសាខ ឆ្នាំឆ្លូវ ត្រីស័ក ព.ស. ២៥៦៤ ត្រូវនឹងថ្ងៃទី២២ ខែមេសា ឆ្នាំ២០២១យោងតាមរបាយការណ៍របស់អនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩នៃក្រសួងសាធារណការ និងដឹកជញ្ជូន បានឱ្យដឹងថា៖ ការចាក់វ៉ាក់សាំងបង្ការជំងឺកូវីដ-១៩ ដូសទី២ រយៈពេល បីថ្ងៃចាប់គិតពីថ្ងៃទី២០ ខែមេសា ឆ្នាំ២០២១ រហូតដល់ថ្ងៃទី២២ ខែមេសា ឆ្នាំ២០២១ សម្រេចបានចំនួន ១៥៦១ ដូស ក្នុងនោះ បុគ្គលិក មន្ត្រីរាជការ មន្ត្រីជាប់កិច្ចសន្យានៃក្រសួងសាធារណការ និងដឹកជញ្ជូន បានចំនួន ៣៧២ដូស ស្មើនឹង២៣,៨៣% និងប្រជាពលរដ្ឋមកពីខណ្ឌឬស្សីកែវ បានចំនួន ១១៨៩ ដូស ស្មើនឹង ៧៦,១៧%។ ជាមួយគ្នានោះផងដែរ ដើម្បីបញ្ចៀសហានិភ័យនៃការឆ្លងជំងឺកូវីដ-១៩ ជាយថាហេតុ អនុគណៈកម្មការ ចាក់វ៉ាក់សាំងបង្ការជំងឺកូវីដ-១៩ នៃក្រសួងសាធារណការ និងដឹកជញ្ជូន បានរៀបចំសណ្ដាប់ធ្នាប់ និងរក្សាគម្លាតសុវត្ថិភាពបានត្រឹមត្រូវតាមការណែនាំរបស់ក្រសួងសុខាភិបាលចំពោះបងប្អូនប្រជាពលរដ្ឋដែលអញ្ជើញមកចាក់ថ្នាំវ៉ាក់សាំង និងតម្រូវឲ្យអនុវត្តការលាងដៃ បាញ់អាកុល វាស់កំដៅ រក្សាអនាម័យ មុននឹងអនុញ្ញាតឱ្យចូលទីតាំងផ្តល់វ៉ាក់សាំង។ បងប្អូនដែលបានទទួលវ៉ាក់សាំងបង្ការជំងឺកូវីដ-១៩ រួចហើយ សូមមេត្តាបន្តអនុវត្តវិធានសុខាភិបាល៣ ការពារ (ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាព បុគ្គលពីមួយម៉ែត្រកន្លះឡើងទៅ) និងបីកុំ (កុំទៅកន្លែងមានមនុស្សកុះករច្រើន កុំទៅកន្លែងបិទគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា) ដើម្បីបិទបញ្ចប់ព្រឹត្តការណ៍សហគមន៍ ២០ កុម្ភៈ និងនាំមកនូវប្រប្រតីភាពឡើងវិញក្នុង ពេលឆាប់ៗនេះ៕