(មណ្ឌលគិរី)៖ នៅថ្ងៃទី២១ ខែមេសា ឆ្នាំ២០២១ លោក ស្វាយ សំអ៊ាង អភិបាលខេត្តមណ្ឌលគិរី បានដឹកនាំមន្រ្តីរាជការនិង អង្គភាពពាក់ព័ន្ធ និងអាជ្ញាធរស្រុក ចុះពិនិត្យមើលការស្ថាបនាស្ពាន និងផ្លូវ ឆ្ពោះទៅច្រកទ្វារព្រំដែនទ្វេភាគីណាំលៀរ ក្នុងស្រុកពេជ្រាដា ខេត្តមណ្ឌលគិរី ដើម្បីសម្រួលដល់ការធ្វើចរាចរ វិស័យទេសចរណ៍ ដឹកជញ្ជូនកសិផលរបស់ប្រជាពលរដ្ឋ។ លោក ស្វាយ សំអ៊ាង បានឲ្យដឹងថា គោលបំណង ដើម្បីពិនិត្យមើលការអនុវត្ត ការស្ថាបនាស្ពានអូរផ្លាយ ១កន្លែង និងផ្លូវ ១ខ្សែ ឆ្ពោះទៅច្រកទ្វារព្រំដែន ក្នុងស្រុកពេជ្រាដា ជាគម្រោងរបស់មន្ទីរសាធារណការ និងដឹកជញ្ចូនខេត្ត ដែលប្រើប្រាស់ថវិកាជាតិ។ លោកបានណែនាំដល់មន្ទីរជំនាញ ត្រូវយកចិត្តទុកដាក់ស្ថាបនាស្ពាន និងផ្លូវនេះ ឲ្យមានស្តង់ដារ និងមានលក្ខណៈបច្ចេកទេសគ្រប់គ្រាន់ ដើម្បីធ្វើយ៉ាងណា ឲ្យមានគុណភាពធ្វើឲ្យការប្រើប្រាស់ឲ្យបានយូរអង្វែង។ លោកអភិបាលខេត្ត ក៏សូមឲ្យប្រជាពលរដ្ឋទាំងអស់ ត្រូវចូលរួមសហការជាមួយមន្ទីរជំនាញ និងអាជ្ញាធរមូលដ្ឋាន ដើម្បីធ្វើយ៉ាងណា ឲ្យដំណើរការសាង់សង់ស្ពាន និងផ្លូវនេះ ឲ្យទទួលបានជោគជ័យ ព្រោះសមិទ្ធផលទាំងនេះ គឺជាសរសៃឈាមរបស់ប្រជាពលរដ្ឋនៅក្នុងខេត្ត ក៏ដូចជាភ្ញៀវទេសចរដែលមកទស្សនាកំសាន្តនៅតាមរមណីយដ្ឋាននានានៅតំបន់នេះ និងខ្សែក្រវ៉ាត់ព្រំដែនផងដែរ។ បន្ថែមលើសនេះ លោកបានណែនាំដល់ប្រជាពលរដ្ឋទាំងអស់ ត្រូវចូលរួមអនុវត្តឲ្យបានខ្ជប់ខ្ជួនតាមអនុសាសន៍របស់ប្រមុខរាជរដ្ឋាភិបាលកម្ពុជា ក៏ដូចជាក្រសួងសុខាភិបាល ៣ការពារ ៣កុំ និង ២ចូលរួម ដើម្បីបង្ការ ទប់ស្កាត់ និងការឆ្លងរីករាលដាលនៃជំងឺកូវីដ-១៩ ចូលក្នុងសហគមន៍ ដែលខេត្តរបស់បច្ចុប្បន្ននេះ ពុំទាន់មានមនុស្សបានឆ្លងមេរោគកូវីដ១៩ ម្នាក់នៅឡើយទេ។ តាមការបញ្ជាក់របស់លោក រស់ គីមធន ប្រធានមន្ទីរសាធារណការ និងដឹកជញ្ចូនខេត្តមណ្ឌលគិរី បានឲ្យដឹង ការស្ថាបនាស្ពានបេតុង អូរផ្លាយនេះ មានប្រវែង៤៥ម៉ែត្រ ទទឹង ១០ម៉ែត្រ ចាប់ផ្តើមអនុវត្តចាប់ពីថ្ងៃទី៣០ ខែវិច្ឆិកា ឆ្នាំ២០២០ ហើយស្ពាននេះ នឹងសាង់សង់រួចរាល់នៅចុងឆ្នាំ២០២១នេះ។ ម្យ៉ាងទៀត ផ្លូវចាក់កៅស៊ូ ១ខ្សែនេះដែលត ភ្ជាប់ពីផ្លូវជាតិលេខ៧៦ មានប្រវែងសរុប ៥១គីឡូម៉ែត្រ រហូតដល់ច្រកទ្វារព្រំដែនទ្វេភាគីណាំលៀរ ក្នុងស្រុកពេជ្រាដា ហើយផ្លូវនេះ ស្ថាបនារួចរាល់បានប្រវែង៣៣+៥០០ ក្នុងឆ្នាំ២០២០ បានបន្តចាក់ផ្លូវកៅស៊ូបន្ថែមប្រវែង ៧០០ម៉ែត្រ ហើយផ្លូវ ១ខ្សែនេះ នៅសល់ ១៥គីឡូម៉ែត្រទៀត ដែលមិនទាន់ស្ថាបនា។ លោកបញ្ជាក់ថា ចំពោះផ្លូវដែលនៅសេសសល់នេះ លោកនឹងខិតខំលើកគម្រោងផែនការនៅឆ្នាំបន្តបន្ទាប់ទៀត ដើម្បីធ្វើយ៉ាងណា ឲ្យការដំណើរស្ថាបនាផ្លូវ ១ខ្សែនេះ ឲ្យបានរួចរាល់នាពេលខាងមុខ ដើម្បីងាយស្រួលដល់ប្រជាពលរដ្ឋធ្វើចរាចរណ៍ ក៏ដូចជា ការផ្លាស់ប្តូរកសិផលនានា រវាងប្រទេសជិតខាងនាពេលខាងមុខ ឲ្យកាន់តែមានលក្ខណៈល្អប្រសើរ។ នាឱកាសនោះ លោក ស្វាយ សំអ៊ាង បាននាំយកអំណោយជាគ្រឿងឧបភោគ បរិភោគ និងថវិកាមួយចំនួន ឧបត្ថម្ភដល់ក្រុមការងារនៃមន្ទីរសាធារណការ និងដឹកជញ្ចូនខេត្តមណ្ឌលគិរី ដែលកំពុងស្ថាបនាស្ពានអូរផ្លាយ រួមមាន៖ អង្ករ ២០០គីឡូក្រាម មី ២កេះធំ ត្រីខ ១កេះធំ និងថវិកា ២លានរៀល ដោយឡែក ក្រុមការងារនៃមន្ទីរសាធារណការ និងដឹកជញ្ចូនខេត្ត ដែលកំពុងស្ថាបនាផ្លូវ ឆ្ពោះទៅព្រំដែន រួមមាន៖ អង្ករ ១០០គីឡូក្រាម មី ៥កេះ ត្រីខ ១កេះធំ ម៉ាស់ ២ប្រអប់ និងថវិកា ១លានរៀល ដើម្បីជាការលើកទឹកចិត្ត ដើម្បីដោះស្រាយប្រចាំថ្ងៃ៕