ថ្ងៃអង្គារ ៩កើត ខែពិសាខ ឆ្នាំឆ្លូវ ត្រីស័ក ព.ស. ២៥៦៤ ត្រូវនឹងថ្ងៃទី២០ ខែមេសា ឆ្នាំ២០២១ ក្រសួងសាធារណការ និងដឹកជញ្ជូន បានបន្តយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់បុគ្គលិក មន្ត្រីរាជការ មន្ត្រីជាប់កិច្ចសន្យា ព្រមទាំងបងប្អូនប្រជាពលរដ្ឋដែលរស់នៅក្នុងខណ្ឌឫស្សីកែវ ចាប់ពីថ្ងៃទី២០ ខែមេសា ឆ្នាំ២០២១ រហូតដល់ថ្ងៃទី៣ ខែឧសភា ឆ្នាំ២០២១។ យោងតាមរបាយការណ៍របស់អនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩នៃក្រសួងសាធារណការ និងដឹកជញ្ជូន បានឱ្យដឹងថាការចាក់វ៉ាក់សាំងបង្ការជំងឺកូវីដ-១៩ ដូសទី២ នៅថ្ងៃទី២០ ខែមេសា ឆ្នាំ២០២១ សម្រេចបានចំនួន ៤៧៥ ដូស ក្នុងនោះ បុគ្គលិក មន្ត្រីរាជការ មន្ត្រីជាប់កិច្ចសន្យានៃក្រសួងសាធារណការ និងដឹកជញ្ជូនបានចំនួន២២១ដូស ស្មើនឹង ៤៦,៥២% និងប្រជាពលរដ្ឋមកពីខណ្ឌឫស្សីកែវបានចំនួន ២៥៤ ដូស ស្មើនឹង៥៣,៤៨%។ យោងតាមសេចក្តីជូនដំណឹងស្ដីពីការចាក់វ៉ាក់សាំងបង្ការជំងឺកូវីដ-១៩ ដូសទីពីរ ក្នុងអំឡុងពេលនៃការអនុវត្តវិធានការបិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្ដាល បានបញ្ជាក់ថា៖ អនុគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ នៃក្រសួងសាធារណការ និងដឹកជញ្ជូនត្រូវចាត់ចែង រៀបចំការចាក់វ៉ាក់សាំងបង្ការជំងឺកូវីដ-១៩ ដូសទី២ គ្រប់គ្រងសណ្តាប់ធ្នាប់ និងការអនុវត្តវិធានការសុខាភិបាល ឱ្យបានម៉ឺងម៉ាត់ ដើម្បីការពារការចម្លងវីរុសកូវីដ-១៩ ក្នុងដែនសមត្ថកិច្ចរបស់ខ្លួន ដោយក្នុងនោះមានប្រជាពលរដ្ឋនៅក្នុងខណ្ឌឫស្សីកែវអញ្ជើញមកទទួលការចាក់វ៉ាក់សាំងផងដែរ ដោយសារពួកគាត់មិនត្រូវបានអនុញ្ញាតឱ្យធ្វើដំណើរឆ្លងកាត់ពីខណ្ឌមួយទៅខណ្ឌមួយ ដើម្បីស្វែងរកការចាក់វ៉ាក់សាំងបាន។ សូមរំលឹកជូនផងដែរថាទោះបីជាបុគ្គលម្នាក់ៗបានទទួលវ៉ាក់សាំងបង្ការជំងឺកូវីដ-១៩ រួចហើយក្តី ក៏បងប្អូនត្រូវតែបន្ត អនុវត្តវិធានសុខាភិបាល ៣ការពារ (ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាពបុគ្គលពីមួយ ម៉ែត្រកន្លះឡើងទៅ) និងបីកុំ (កុំទៅកន្លែងមានមនុស្សកុះករច្រើន កុំទៅកន្លែងបិទគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា) ដើម្បីបិទបញ្ចប់ព្រឹត្តិការណ៍សហគមន៍ ២០ កុម្ភៈ ឱ្យបានឆាប់រហ័ស៕