(ភ្នំពេញ)៖ ដើម្បីចូលរួម​អនុវត្តវិធានការ​បំរាមគោចរ​ឆ្លងកាត់ពីតំបន់​មួយ ទៅតំបន់មួយ សម្រាប់ការចុះបំពេញ​បេសកកម្មរបស់អង្គភាព​គ្រប់គ្រងគម្រោង​ ( PMU ) អង្គភាព​អនុវត្តគម្រោង ( PIU ) ទាំងអស់ និងបុគ្គលិក​-មន្ត្រីរាជការ​ក្រសួងសាធារណការ និងដឹកជញ្ជូន​ទាំងថ្នាក់​ជាតិ និងថ្នាក់រាជធានី-ខេត្ត ដែលត្រូវចុះទៅបំពេញ​បេសកកម្ម​នៅតាមទីកន្លែង និងការដ្ឋាន​សាងសង់​ផ្សេងៗ​។ ក្រសួង​​​​​​សូម​​​ណែ​​នាំ​​​ដល់​​​អង្គភាព​គម្រោង និងបុគ្គលិក-មន្ត្រីរាជការទាំងអស់ ចូលរួមអនុវត្ត​នូវយន្តការ ៣ ចំណុច រួមមាន៖ ១-គ្រប់សមាជិក​នៃ​អង្គភាព​គម្រោងស្ថាបនា​ហេដ្ឋារចនាសម្ព័ន្ធទាំងអស់ ( PMU-PIU ) នៃក្រសួង​សាធារណការ​ និងដឹកជញ្ជូន​ ព្រមទាំង​ក្រុមហ៊ុន​ទីប្រឹក្សា​បច្ចេកទេស​សាងសង់ និងក្រុមហ៊ុនទទួល​ការសាងសង់​ទាំងអស់ ត្រូវបំពេញការងាររបស់ខ្លួន នៅតាម​តំបន់ការដ្ឋាននីមួយៗ ដែលកំពុង​ប្រចាំការ និង​មិនត្រូវធ្វើការចល័ត ឬគោចរ ទៅតាមតំបន់​គោលដៅ​ផ្សេងៗទេ ក្នុងអំឡុងពេល​នៃការអនុវត្តវិធានការបំរាម​គោចរ​ខាងលើ​។ ២-ត្រូវផ្អាកការចុះ​បំពេញបេសកកម្ម​ជាបណ្តោះអាសន្នរបស់បុគ្គលិក-មន្ត្រីរាជការ​ពីថ្នាក់ជាតិ​ទៅថ្នាក់​ខេត្ត​ដោយតម្រូវ​ឲ្យបុគ្គលិក​-មន្ត្រីរាជការ​គម្រោង​សាងសង់​ទាំងអស់ ដែលប្រចាំការ​នៅតាមបណ្តាខេត្តផ្សេងៗ ត្រូវបន្ត​បំពេញការងារ​របស់ខ្លួន​នៅតាមការដ្ឋានរៀងៗខ្លួន និងត្រូវអនុវត្ត​ឲ្យបានខ្ជាប់​ខ្ជួន​នូវវិធានការ​បំរាម​គោចរ​របស់រាជរដ្ឋាភិបាល និងវិធានការ​បំរាម​គោចរ​របស់​អាជ្ញាធរខេត្ត ដែលខ្លួនកំពុងស្ថិតនៅ​។ ៣-ករណីចាំបាច់​ក្នុងការចុះបំពេញបេសកកម្ម​ដោយអាក់ខាន​មិនបាន ក្នុងអំឡុង​ពេលនៃការអនុវត្ត​វិធានការ​បំរាម​គោចរ​ ការចេញ​លិខិត​បញ្ជាបេសកកម្ម​ ដើម្បី​ចុះទៅបំពេញការងារ​ចាំបាច់នោះ នឹងត្រូវ​កំណត់សិទ្ធិ​ចុះហត្ថលេខាដោយ ឯកឧត្តមទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹក​ជញ្ជូន​ផ្ទាល់​ ឬសិទ្ធិចុះហត្ថលេខា​ដោយឯកឧត្តម ស៊ុយ សាន រដ្ឋលេខាធិការ​ក្រសួងសាធារណការ និងដឹកជញ្ជូន​តែប៉ុណ្ណោះ​៕