[Rasmei News] - ក្រុមការងារជួសជុល ថែទាំផ្លូវ របស់មន្ទីរសាធារណការ ខេត្តព្រះវិហារ បន្តបាននិងកំពុង កៀសម្រួល ផ្លូវក្រាលល្បាយថ្ម ៣ខ្សែ នៅតាមបណ្ដោយជើងភ្នំដងរែក
2021-04-02
Go to the website published Rasmei News
ព្រះវិហារៈ បើទោះបីប្រទេសកម្ពុជា កំពុងស្ថិតក្នុងតំណាក់កាល នៃការបង្ការ ទប់ស្កាត់ និងជំងឺកូវីដ-១៩ ក៏ពិតមែន ប៉ុន្តែសំរាប់មន្ទីរសាធារណការ និងដឹកជញ្ជូនខេត្ត ព្រះវិហារ នៅតែបន្តការជួលជុលថែទាំផ្លូវ នៅក្នុងខេត្តរបស់ខ្លួន ជាប្រចាំ ដើម្បីកុំអោយខូច ខាតធ្ងន់ធ្ងរ ចំណាយលើការជួសជុល ឬស្ថាបនាឡើងវិញច្រើន ហើយក៏ដើម្បីបង្កភាពងាយ ស្រួល ដល់ប្រជាពលរដ្ឋ ក្នុងការធ្វើដំណើរផងដែរ។
ជាក់ស្តែង នៅព្រឹកថ្ងៃទី០២ មេសា ឆ្នាំ២០២១នេះ ក្រុមការងារនៃមន្ទីរសាធារណការ និងដឹកជញ្ជូន ខេត្តព្រះវិហារ បានបន្តកិច្ចខិតខំប្រឹងប្រែង ដោយកៀសម្រួលផ្លូវ ក្រាលល្បាយ ថ្ម ចំនួន ០៣ ខ្សែ នៅតាមបណ្ដោយជើងភ្នំដងរែក ស្ថិតនៅឃុំស្រអែម ស្រុកជាំក្សាន្ត ខេត្តព្រះវិហារ ។
លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានឱ្យដឹងថាៈ បើទោះបីប្រទេសកម្ពុជា កំពុងស្ថិតក្នុងដំណាក់កាល នៃការបង្ការ ទប់ស្កាត់នឹងជំងឺកូវីដ-១៩ ក៏ពិតមែន អនុវត្តតាមការណែនាំ របស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន និងលោក ប្រាក់ សុវណ្ណ អភិបាលខេត្តព្រះវិហារ នៅព្រឹក ថ្ងៃទី០២ ខែមេសា ឆ្នាំ២០២១ នេះ ក្រុមការងារជួសជុល ថែទាំផ្លូវ របស់មន្ទីរសាធារណការ និងដឹកជញ្ជូនខេត្តព្រះវិហារ បានបន្តកិច្ចខិតខំប្រឹងប្រែង កៀសម្រួលផ្លូវក្រាលល្បាយថ្ម ចំនួន ០៣ ខ្សែ នៅតាមបណ្ដោយជើងភ្នំដងរែក ស្ថិតនៅឃុំស្រអែម ស្រុកជាំក្សាន្ត ខេត្តព្រះវិហារ ដូចជាផ្លូវខេត្តលេខ 2PVH1 ប្រវែង ៩,៥ គីឡូម៉ែត្រ ដោយកៀរសម្រួល ថែមល្បាយថ្ម ស្រោចទឹក កិនបង្ហាប់ សម្រេចបានលទ្ធផល ១០០% និងបន្តកៀសម្រួល ផ្លូវខេត្តលេខ ២៦ ២៧ ប្រវែង១៣,៨គីឡូម៉ែត្រ (ភូមិគ១ ដល់ភូមិអង្គ្រង) និងផ្លូវខេត្តលេខ 2PVH3 ប្រវែង ១៧,០គីឡូម៉ែត្រ ពីជើងភ្នំទ្រព្យ ដល់ភូមិអង្គ្រង)។
គួរបញ្ជាក់ថា ពាក់ព័ន្ធនឹងការងារបង្ការ ទប់ស្កាត់នឹងជំងឺកូវីដ-១៩ មន្ទីរសាធារណការ និងដឹកជញ្ជូន ខេត្តព្រះវិហារ តែងតែយកចិត្តទុកដាក់បំផុត ក្នុងការចូលរួមចំណែក ជាមួយប្រមុខរាជរដ្ឋាភិបាលកម្ពុជា ដោយអនុវត្តតាមការណែនាំ របស់ក្រសួងសុខាភិបាល និងជាពិសេសអនុវត្ត តាមអនុសាសន៍ដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាចក្រកម្ពុជា នូវវិធានការ ការពារជំងឺកូវីដ១៩ ៣កុំ ៣ការពារ។
ថ្នាក់ដឹកនាំមន្ទីរ តែងតែបានដាស់តឿន ក្រើនរំលឹកដល់មន្ត្រី ក្រោមឱវាទទាំងអស់ ជារឿយៗ ត្រូវមានទំនួលខុសត្រូវខ្ពស់ ដោយបន្តអនុវត្តវិធានការ ខាងលើ អោយបានហ្មត់ចត់ និងត្រឹមត្រូវតាមការណែនាំ ដោយបានចាត់តាំងមន្ត្រី ប្ដូរវេនគ្នាប្រចាំ ការរៀងរាល់ម៉ោង ធ្វើការ ដើម្បីត្រួតពិនិត្យកំដៅ និងបាញ់អាល់កុល លាងដៃជូនមន្ត្រី និងប្រជាពលរដ្ឋ ដែលមកទទួលសេវាគ្រប់ប្រភេទ របស់មន្ទីរទាំងអស់ នៅទ្វារច្រកចេញចូល និងនៅមុខអគារ ទាំងអស់របស់មន្ទីរ៕
