[Moneaksekar] - លោក ម៉ឹង យូឡេង បណ្ដោយឲ្យក្រុមជញ្ជីងថ្លឹងរថយន្តលើផ្លូវជាតិលេខ៤ ក្នុងស្រុកអង្គស្នួល ធ្វើអ្វីៗតាមចិត្ត
2018-02-20
Go to the website published Moneaksekar
អំពើពុករលួយរបស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តលើផ្លូវជាតិលេខ៤ ក្នុងស្រុកអង្គស្នួល គឺជារឿងដែលមិនអាចបិទបាំងបានទេ ហើយការដែលមន្ត្រីពុករលួយទាំងនោះហ៊ានធ្វើអ្វីៗតាមអំពើចិត្ត គឺដោយសារពួកគេចេះរកចំណូលទៅសែនមេៗថ្នាក់លើជាប្រចាំ។ ប្រការនេះគឺជារឿងដែលលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនគួរបណ្ដែតបណ្ដោយតទៅទៀតឡើយ ហើយត្រូវចាត់វិធានការទប់ស្កាត់ខ្លះផង។ មានការរិះគន់ចំៗថា មន្ត្រីប្រចាំស្ថានីយ៍ជញ្ជីងថ្លឹងរថយន្តនៅផ្លូវជាតិលេខ៤ មុខសាលាស្រុកអង្គស្នួល គិតតែពីរឿងប្រមូលលុយចែកគ្នាធ្វើមានធ្វើបាន ហើយមិនដែលចាត់វិធានការទៅលើរថយន្តដឹកទំនិញលើសទម្ងន់ទាល់តែសោះ។
ក្រុមមន្ត្រីស្ថានីយ៍ជញ្ជីងថ្លឹងរថយន្តលើផ្លូវជាតិលេខ៤ មុខសាលាស្រុកអង្គស្នួល ស្រុកអង្គស្នួល ខេត្តកណ្ដាល កំពុងរងការរិះគន់រឿងគាបយកលុយពីអ្នកដឹកថ្ម ដឹកខ្សាច់ ដឹកដី និងដឹកទំនិញផ្សេងៗតាមអំពើចិត្តរបស់ពួកគេ។ ការដែលក្រុមមន្ត្រីទាំងនោះហ៊ានធ្វើអ្វីៗតាមអំពើចិត្ត គឺអាចមានការឃុបឃិតបើកដៃពីសំណាក់លោក ម៉ឹង យូឡេង ប្រធានមន្ទីរសាធារណការនិងដឹកជញ្ជូនខេត្តកណ្ដាល ផងដែរទើបអ្វីៗអាចប្រព្រឹត្តទៅដោយរលូន។ ដូច្នេះលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន គួរពិនិត្យមើលទង្វើមិនប្រក្រតីនិងអំពើពុករលួយរបស់ក្រុមមន្ត្រីប្រចាំស្ថានីយ៍ជញ្ជីងថឹ្លងរថយន្តលើផ្លូវជាតិលេខ៤ មុខសាលាស្រុកអង្គស្នួល ជាបន្ទាន់ដើម្បីកុំឲ្យពួកគេប្រើអំណាចគាបយកលុយពីប្រជាពលរដ្ឋយ៉ាងកំរោលបន្តទៀត។
ប្រភពពីម្ចាស់រថយន្តដឹកថ្ម និងដឹកទំនិញមួយចំនួនបានឲ្យដឹងថា ទោះបីពួកគេផ្ទុកលើសទម្ងន់ឬមិនលើសទម្ងន់យ៉ាងណាក៏ដោយ គឺត្រូវបង់លុយតាមការកំណត់របស់ក្រុមមន្ត្រីប្រចាំជញ្ជីងថ្លឹងរថយន្តលើផ្លូវជាតិលេខ៤ មុខសាលាស្រុកអង្គស្នួល ដោយមិនអាចតវ៉ាបានឡើយ។ ប្រភពបានឲ្យដឹងទៀតថា នៅពេលពួកគាត់ដឹកថ្មឬដឹកទំនិញផ្សេងៗដូចពេលមុនៗក៏ដោយ ក៏ជួនកាលត្រូវបង់១ម៉ឺនរៀលឬ២ម៉ឺនរៀល ហើយពេលខ្លះគេតម្រូវឲ្យបង់ដល់ទៅ៤ម៉ឺនរៀល ដែលជាហេតុធ្វើឲ្យម្ចាស់រថយន្តដឹកថ្មនិងដឹកទំនិញផ្សេងៗប្រឈមនឹងការលំបាកកាន់តែខ្លាំង ព្រោះត្រូវចំណាយលុយច្រើនពេក។ ប្រជាពលរដ្ឋសំណូមពរឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនចាត់វិធានការលុបបំបាត់ទង្វើមិនប្រក្រតីរបស់ក្រុមមន្ត្រីប្រចាំជញ្ជីងថ្លឹងរថយន្តលើផ្លូវជាតិលេខ៤ មុខសាលាស្រុកអង្គស្នួល ជាបន្ទាន់។
ទាក់ទងទៅនឹងបញ្ហាខាងលើនេះដែរប្រជាពលរដ្ឋ ក៏ដូចជាក្រុមអាជីវកររកស៊ីដឹកជញ្ជូនថ្ម ដឹកដី ដឹកខ្សាច់ និងដឹកទំនិញឆ្លងកាត់ស្ថានីយ៍ជញ្ជីងថ្លឹងរថយន្តលើផ្លូវជាតិលេខ៤ ក្នុងស្រុកអង្គស្នួល បានលើកឡើងថា ការតម្រូវឲ្យពួកគាត់បង់លុយ គឺគួរតែមានច្បាប់កំណត់ច្បាស់លាស់ដើម្បីកុំឲ្យក្រុមមន្ត្រីពុករលួយគាបយកលុយពីពួកគាត់តាមអំពើចិត្ត។ ដោយសារថាសព្វថ្ងៃនេះរថយន្តផ្ទុកលើសទម្ងន់ឬមិនលើសទម្ងន់ គឺអាចបើកបរឆ្លងកាត់ទីតាំងស្ថានីយ៍ជញ្ជីងថ្លឹងរថយន្តលើផ្លូវជាតិលេខ៤ មុខសាលាស្រុកអង្គស្នួល ទៅតាមអ្វីដែលក្រុមមន្ត្រីទាំងនោះបានកំណត់ ហើយមិនដែលឃើញក្រុមមន្ត្រីទាំងនោះចាត់វិធានការទប់ស្កាត់រថយន្តធំៗដែលដឹកជញ្ជូនទំនិញលើសចំណុះរាប់សិបតោននោះឡើយ។ ប្រភពពីមន្ត្រីរាជការក្នុងមន្ទីរសាធារណការនិងដឹកជញ្ជូនខេត្តកណ្ដាល បានឲ្យដឹងថា ការដែលលោក ម៉ឹង យូឡេង ប្រធានមន្ទីរសាធារណការខេត្តកណ្ដាល បណ្ដោយឲ្យមន្ត្រីក្រោមឱវាទធ្វើអ្វីៗតាមអំពើចិត្ត គឺប្រឈមនឹងការរិះគន់កាន់តែខ្លាំង ដូច្នេះលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនគួរបណ្ដែតបណ្ដោយឲ្យមន្ត្រីពុករលួយគាបសង្កត់ធ្វើបាបប្រជាពលរដ្ឋស្រេចតែអំពើចិត្តរបស់ពួកគេយ៉ាងកំរោលតទៅទៀតឡើយ៕
