(ភ្នំពេញ)៖ គិតមកដល់ចុងខែកុម្ភៈ ឆ្នាំ២០២១នេះ ការលក់ផ្លាកលេខពិសេសផ្ទាល់ខ្លួនសម្រាប់រថយន្ត (ផ្លាកលេខកម្ពុជា) បានរយៈពេលជាង១ឆ្នាំ និងការលក់ផ្លាកលេខពិសេស លក្ខណៈគ្រួសារ (ផ្លាកលេខរាជធានីខេត្ត) បានរយៈពេលប្រមាណ០៦ឆ្នាំ បានរកចំណូលសរុបប្រមាណ ២១០,៥០០,០០០,០០០រៀល ដែលស្មើនឹង ៥២,៦០០,០០០ដុល្លារសហរដ្ឋអាមេរិក។ នេះបើយោងតាមលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន បានឱ្យភ្នាក់ងារសារព័ត៌មាន Fresh News ដឹងនៅល្ងាចថ្ងៃទី០៥ ខែមីនា ឆ្នាំ២០២១នេះ។ លោក ហ៊ាង សុទ្ធាយុត្តិ បានបញ្ជាក់យ៉ាងដូចនេះថា «ការលក់ផ្លាកលេខពិសេសផ្ទាល់ខ្លួនសម្រាប់រថយន្ត គិតមកដល់ពេលបច្ចុប្បន្ននេះលក់បានចំនួនជាង ៤,៨០០ ផ្លាកលេខ រកចំណូលបានជាង៣៩ពាន់លានរៀល ដែលស្មើនឹងជិត១០លានដុល្លារ ហើយសម្រាប់ផ្លាកលេខពិសេសគ្រួសារ គិតចាប់ពីចុងឆ្នាំ២០១៦ មកដល់ពេលនេះ បានលក់អស់ជាង ១៦៥,០០០ផ្លាកលេខ គិតជាទឹកប្រាប់បានប្រមាណជាង ១៧១ពាន់លានរៀល ដែលស្មើនឹង ៤២,៧៨០,០០០ដុល្លារសហរដ្ឋអាមេរិក ដែលសរុប ថវិកាទាំងផ្លាកលេខពិសេសផ្ទាល់ខ្លួន និងផ្លាកលេខគ្រួសារបានប្រមាណ ២១០,៥០០,០០០,០០០រៀល ដែលស្មើនឹង ៥២,៦០០,០០០ ដុល្លារសហរដ្ឋអាមេរិក»។ លោក ហ៊ាង សុទ្ធាយុត្តិ បានបញ្ជាក់ទៀតថា សម្រាប់ផ្លាកលេខពិសេសផ្ទាល់ខ្លួន (ផ្លាកលេខកម្ពុជា)នេះ បានធ្វើការសិក្សាអស់រយៈពេលប្រមាណជិត២ឆ្នាំ ទើបបាន សម្រេចសម្ភោធបើកដំណើរការលក់ជាផ្លូវការក្រោមអធិបតីភាពលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូន នៅថ្ងៃទី០៧ ខែមករា ឆ្នាំ២០២០នៅផ្សារទំនើបអ៊ីអន២ រាជធានីភ្នំពេញ។ អ្នកនាំពាក្យរូបនេះបានបន្តថា ការគ្រប់គ្រងការលក់លេខផ្ទាល់ខ្លួននេះដែរ ក៏មានសមាសភាពចម្រុះដែលជាគណកម្មការអន្តរក្រសួងរវាងក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ និងអង្គភាពប្រយុទ្ធប្រឆាំងអំពើពុករលួយ ដែលដឹកនាំដោយលោកស្រី កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន។ សូមរំលឹកថា ប្រមុខនៃរាជរដ្ឋាភិបាលកម្ពុជា សម្តេចតេជោ ហ៊ុន សែន កាលពីថ្ងៃទី០៣ ខែមិថុនា ឆ្នាំ២០១៩ បានសម្រេចចេញអនុក្រឹត្យថ្មីមួយស្តីពីការចុះបញ្ជីផ្តល់ បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ។ នៅក្នុងអនុក្រឹត្យថ្មីនេះក៏បានបញ្ជាក់ពីការអនុញ្ញាតឲ្យម្ចាស់យានជំនិះ អាចធ្វើផ្លាកលេខពិសេស ទៅតាមការចង់បានរបស់ខ្លួនផងដែរ។ ផ្លាកលេខពិសេសនេះគឺម្ចាស់យានយន្តអាចកំណត់អក្សរ ឬលេខទៅតាមអ្វីដែលខ្លួនចង់បាន ហើយក៏អាចយកផ្លាកលេខនេះ ទុកប្រើប្រាស់ពេញមួយជីវិតផងដែរ។ នេះបើយោងតាមការបញ្ជាក់លោកទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន។ នៅក្នុងអនុក្រឹត្យនេះបានបញ្ជាក់ថា ផ្លាកលេខយានយន្តពិសេសនេះត្រូវសរសេរអក្សរខ្មែរបញ្ជាក់ថា «កម្ពុជា» ពីខាងលើហើយផ្នែកកណ្តាលជាលេខចុះបញ្ជីមានលេខ ឬ/និងអក្សរឡាតាំង មិនលើសពី៨ខ្ទង់ និងផ្នែកខាងក្រោមសរសេរអក្សរឡាតាំង «CAMBODIA» នៅពីក្រោមបន្ទាប់ផ្តេក។ អគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន មានភារកិច្ចចុះបញ្ជី និងផ្ទេរកម្មសិទ្ធិផ្តល់បណ្ឌសម្គាល់យានជំនិះ និងផ្លាកលេខយានជំនិះស្ថិតនៅក្នុងចង្កោមទី៣។ លេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួន ត្រូវបង់កម្រៃសេវាសាធារណៈ តាមការកំណត់ក្នុងប្រកាសអន្តរក្រសួង របស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការ និងដឹកជញ្ជូន ឬតាមលទ្ធផលនៃការលក់ ឬដេញថ្លៃជាសាធារណៈ។ នីតិវិធីនៃការប្រមូលចំណូលពីលេខចុះបញ្ជីពិសេស លេខចុះបញ្ជី ពិសេសផ្ទាល់ខ្លួន និងការគ្រប់គ្រងចំណូល ត្រូវកំណត់ដោយប្រកាសអន្តរក្រសួងរវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការ និងដឹកជញ្ជូន។ សូមបញ្ជាក់ដែរថា លោកទេសរដ្ឋមន្ត្រី ស៊ុន ចាន់ថុល បានផ្តួចគំនិតក្នុងការធ្វើផ្លាកលេខពិសេសនេះឡើងក្នុងគោលបំណងកៀរគរថវិកាជូនជាតិពីអ្នកប្រើប្រាស់យានយន្ត ដែលចង់បានផ្លាកលេខពិសេសនេះ៕