ថ្ងៃព្រហស្បតិ៍ ៦កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៤ ខែមីនា ឆ្នាំ២០២១ នៅទីស្តីការក្រសួង លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាលើនីតិវិធី នៃការជ្រើសរើសសាស្ត្រាចារ្យបង្រៀន នៅវិទ្យាស្ថានតេជោ សែនសាធារណការ និងដឹកជញ្ជូន ផ្នែកដឹកជញ្ជូន និងភ័ស្តុភារកម្ម ដោយមានការអញ្ជើញចូលរួមពី សំណាក់ថ្នាក់ដឹកនាំក្រសួងទទួលបន្ទុក គណៈកម្មការរៀបចំការប្រឡង និងគ្រូជាមន្ត្រីរាជការក្នុងក្រសួង ដែលមានបំណងបង្រៀននៅវិទ្យាស្ថានតេជោសែនសាធារណការ និងដឹកជញ្ជូន មន្ត្រីជំនាញពាក់ព័ន្ធ ក្រោមឱវាទក្រសួង នៅក្នុងសាលប្រជុំដោយផ្ទាល់ផង និងតាមប្រព័ន្ធវីដេអូពីចម្ងាយផង។ កិច្ចប្រជុំនេះធ្វើឡើងក្នុងគោលបំណងពិភាក្សាអំពីនីតិវិធីនៃការជ្រើសរើសសាស្ត្រាចារ្យចូលបង្រៀននៅវិទ្យាស្ថានតេជោសែនសាធារណការ និងដឹកជញ្ជូនសំដៅស្វែងរកគ្រូមានចំណេះដឹង និងពិសោធន៍ពិតប្រាកដ ដែលអាចផ្តល់ចំណេះដឹងដល់ធនធានមនុស្សជំនាន់ក្រោយ ក៏ដូចជាដើម្បីជួបពិភាក្សាជាមួយគ្រូបង្រៀន ជាមន្ត្រីរាជការក្នុងក្រសួងចំនួនប្រាំពីររូបដែលមានបំណងចូលបង្រៀននៅក្នុងវិទ្យាស្ថាននេះផងដែរ។ ថ្លែងទៅកាន់អង្គប្រជុំទាំងមូលនាឱកាសនោះ លោកជំទាវរដ្ឋលេខាធិការ បានថ្លែងនូវការកោតសរសើរ ចំពោះការខិតខំប្រឹងប្រែងបំពេញការងាររហូតសម្រេចបានលទ្ធផលដ៏ល្អប្រសើររបស់គណៈកម្មការរៀបចំ ការប្រឡងសិស្សដែលបានដាក់ពាក្យសុំប្រឡងនៅវិទ្យាស្ថានតេជោសែនសាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន។ លោកជំទាវក៏បានជម្រាបជូនផងដែរថា៖ គណៈកម្មការរៀបចំការប្រឡងនឹងប្រកាសផ្សព្វផ្សាយលទ្ធផលសិស្ស ដែលបានប្រឡងជាប់ជាស្ថាពរចំនួន២០០នាក់ និងសិស្សជាប់បម្រុងចំនួន៥៧នាក់ នៅថ្ងៃទី០៥ ខែមីនា ឆ្នាំ២០២១ ដើម្បីផ្ដល់លទ្ធភាពឱ្យសិស្សដែលបានប្រឡងជាប់ទាំងអស់អាចធ្វើការចុះឈ្មោះចូលរៀនជាផ្លូវការបានទាន់ពេលវេលា បន្ទាប់ពីធ្វើការផ្សព្វផ្សាយលទ្ធផលរួច។ ជាមួយគ្នានោះ លោកជំទាវបានជម្រាបជូនអង្គប្រជុំផងដែរថា៖ បន្ទាប់ពីការប្រកាសផ្សព្វផ្សាយលទ្ធផលសិស្សដែលបានប្រឡងជាប់រួចហើយ គណៈកម្មការនឹងធ្វើការរៀបចំប្រឡងជ្រើសរើសគ្រូ និងបានស្នើសុំឱ្យគ្រូដែលជាមន្ត្រីរាជការនៅក្នុងក្រសួងផ្តល់ប្រវត្តិរូបរបស់ខ្លួនឱ្យបានមុនថ្ងៃទី៧ ខែមីនា ឆ្នាំ២០២១ ដើម្បីគណៈកម្មការអាចពិនិត្យទៅលើសញ្ញាបត្រ ចំណេះដឹង ជំនាញ និងបទពិសោធន៍ ហើយជូនដំណឹងទៅក្រសួងអប់រំ យុវជន និងកីឡា ស្របតាមលក្ខខណ្ឌតម្រូវរបស់ក្រសួងអប់រំផងដែរ។ ឆ្លៀតក្នុងឱកាសនោះផងដែរ លោកជំទាវរដ្ឋលេខាធិការបានថ្លែងអំណរគុណយ៉ាងជ្រាលជ្រៅដល់គ្រូ ជាមន្ត្រីរាជការនៅក្នុងក្រសួងដែលមានទឹកចិត្តចូលរួមចំណែកក្នុងការបណ្ដុះបណ្ដាលធនធានមនុស្ស ថ្មីរបស់យើងឱ្យទទួលបានចំណេះដឹងថែមទៀតនៅក្នុងវិទ្យាស្ថានថ្មីនេះ ក៏ដូចជាដើម្បីផ្តល់នូវចំណេះដឹង និងជំនាញច្បាស់លាស់ដល់ពួកគាត់ ដែលអាចឆ្លើយតបទៅនឹងតម្រូវការទីផ្សារការងារបច្ចុប្បន្ន និងនាពេលអនាគតផងដែរ។ សូមជម្រាបជូនថា៖ ក្រោយពីការប្រឡងជ្រើសរើសគ្រូរួចរាល់ហើយ គណៈកម្មការនឹងរៀបចំពិធីសំណេះសំណាលរវាងសិស្សដែលបានប្រឡងជាប់ជាមួយនឹងគ្រូដែលបានជ្រើសរើស ក្រោមអធិបតីភាពដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី១៩ ខែមីនា ឆ្នាំ២០២១ បើគ្មានការប្រែប្រួល ហើយកម្មវិធីសំណេះសំណាលនេះនឹងមានការណែនាំផងដែរអំពីបទបញ្ជាផ្ទៃក្នុងនៃវិទ្យាស្ថានតេជោសែនសាធារណការ និងដឹកជញ្ជូន ទាក់ទងនឹងការអនុវត្តផ្សេងៗ៕