ខេត្តសៀមរាប៖ ថ្ងៃចន្ទ ១១កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែកុម្ភៈ ឆ្នាំ២០២១ នៅសាលាខេត្តសៀមរាប ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីសំណេះសំណាលជាមួយមន្ត្រីរាជការ បុគ្គលិក និងកម្មករ នៃមន្ទីរសាធារណការ និងដឹកជញ្ជូនខេត្តសៀមរាប ដោយមានការចូលរួមពីឯកឧត្ដមប្រធានក្រុមប្រឹក្សា ខេត្ត អាជ្ញាធរដែន ថ្នាក់ដឹកនាំមន្ត្រីរាជការជុំវិញខេត្ត បុគ្គលិក និងកម្មកនៃមន្ទីរសាធារណការ និងដឹក ជញ្ជូនសរុបប្រមាណ១៥០នាក់។ ថ្លែងទៅកាន់អង្គពិធីទាំងមូល ឯកឧត្តមទេសរដ្ឋមន្ត្រី បានស្នើឱ្យមន្ទីរសាធារណការ និងដឹកជញ្ជូនខេត្ត សៀមរាបសហការជាមួយនឹងក្រសួងលើកគម្រោងបណ្ដុះបណ្ដាលធនធានមនុស្សលើវិស័យសាធារណការនិងដឹកជញ្ជូន នៅវិទ្យាស្ថានតេជោសែនសាធារណការ និងដឹកជញ្ជូន ដែលត្រូវបានសម្ពោធដាក់ឲ្យ ប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី២២ ខែមករា ឆ្នាំ២០២១កន្លងទៅ។ ឯកឧត្តមទេសរដ្ឋមន្ត្រី បានជម្រាបជូនផងដែរថា ក្រសួងកំពុងរៀបចំកម្មវិធីសិក្សាវគ្គបណ្ដុះបណ្ដាលខ្លីៗ ដើម្បីពង្រឹងសមត្ថភាពធនធានមនុស្សរបស់ក្រសួង ក៏ដូចជាមន្ទីរសាធារណការរាជធានី-ខេត្ត ឱ្យកាន់តែ មានជំនាញបច្ចេកទេសខ្ពស់ថែមទៀត ដើម្បីអភិវឌ្ឍហេដ្ឋារចនាសម្ព័ន្ធរូបវន្តរបស់កម្ពុជាឱ្យកាន់តែមានការ រីកចម្រើនថែមទៀត។ ជាមួយគ្នានោះផងដែរ ឯកឧត្តមទេសរដ្ឋមន្ត្រី បានណែនាំឱ្យមន្ត្រីក្រោមឱវាទក្រសួង ក៏ដូចជាមន្ទីរ សាធារណការ និងដឹកជញ្ជូនរាជធានី-ខេត្ត ពិនិត្យឡើងវិញនូវនីតិវិធីលំហូរការងាររបស់ខ្លួនឱ្យបាន គ្រប់ជ្រុងជ្រោយ ដើម្បីតាមដានការងារដែលត្រូវធ្វើ ការងារគួរធ្វើ ការងារមិនត្រូវធ្វើ កាត់បន្ថយលំហូរ ការងារស្មុគស្មាញ ដើម្បីលើកកម្ពស់ប្រសិទ្ធភាពនៃការបំពេញការងាររបស់ខ្លួន។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រី បានរំលឹកឡើងវិញអំពីប្រធានបទសន្និបាតបូកសរុប លទ្ធផលការងារឆ្នាំ២០២១ និងលើកទិសដៅការងារឆ្នាំ២០២១ ដែលផ្ដោតជាសំខាន់ទៅលើការអនុវត្ត ការងារប្រកបដោយគុណភាពទាំងផ្នែករឹង និងផ្នែកទន់ និងបានណែនាំឱ្យមន្ត្រីក្រោមឱវាទកុំធ្វើអ្វីមួយឲ្យ រួចពីដៃ ត្រូវតាមដាន ត្រួតពិនិត្យ និងវាយតម្លៃការអនុវត្តការងារឱ្យបានត្រឹមត្រូវ ធ្វើឱ្យឆាប់ ធ្វើឱ្យបានលឿន ប្រកបដោយគុណភាពទាំងការផ្តល់សេវាសាធារណៈទាំងការកសាងហេដ្ឋារចនាសម្ព័ន្ធរូបវន្ត ដើម្បីឱ្យប្រជាពលរដ្ឋសប្បាយចិត្ត៕