ថ្ងៃចន្ទ ៤កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៥ ខែកុម្ភៈ ឆ្នាំ២០២១ ឯកឧត្ដម ឡេង ធនយុទ្ធា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្តីពីការប្រមូលព័ត៌មាន និងរៀបចំខ្លឹមសារអត្ថបទពាក់ព័ន្ធនឹងសកម្មភាពនានា ដែលកម្ពុជាបានចូលរួមចំណែកនៅក្នុងអាស៊ានចាប់តាំងពីឆ្នាំ១៩៩៩ ដោយមានការចូលរួមពីថ្នាក់ដឹកនាំ មន្ត្រីជំនាញនៃអង្គភាពពាក់ព័ន្ធក្រោមឱវាទក្រសួង។ កិច្ចប្រជុំនេះធ្វើឡើងក្នុងគោលបំណងពិនិត្យលើសមិទ្ធផលនានារបស់ប្រទេសកម្ពុជាទាក់ទងនឹងវិស័យសាធារណការ និងដឹកជញ្ជូន ទាំងផ្នែករឹង និងផ្នែកទន់ ដែលបានរួមចំណែកនៅក្នុងអាស៊ានចាប់តាំងពីឆ្នាំ១៩៩៩រហូតមកដល់បច្ចុប្បន្ន។ ថ្លែងក្នុងកិច្ចប្រជុំនាឱកាសនោះ ឯកឧត្ដមរដ្ឋលេខាធិការបានឱ្យដឹងថា៖ រៀងរាល់៥ ទៅ១០ឆ្នាំម្ដង អាស៊ានតែងតែតម្រូវឱ្យរដ្ឋជាសមាជិកនីមួយៗបរិយាយពីសមិទ្ធផលថ្មីៗជាទូទៅ ជាពិសេសសមិទ្ធផលផ្នែកប្រព័ន្ធឌីជីថលរបស់ខ្លួន ដើម្បីឱ្យអាស៊ានធ្វើការចងក្រងជាឯកសារសម្រាប់រដ្ឋជាសមាជិកដ៏ទៃទៀតបានសិក្សារៀនសូត្រ និងយកគំរូតាម សំដៅឱ្យរដ្ឋសមាជិកអាស៊ានទាំងមូលមានការរីកចម្រើនជាលំដាប់ និងប្រកបដោយនិរន្តរភាព។ ឆ្លៀតក្នុងឱកាសនោះ ឯកឧត្ដមរដ្ឋលេខាធិការ បានគូសបញ្ជាក់ថា៖ ក្នុងនាមជាសេនាធិការរបស់រាជរដ្ឋាភិបាលកម្ពុជា ក្រសួងសាធារណការ និងដឹកជញ្ជូន សម្រេចបានសមិទ្ធផលជាច្រើននៅក្នុងវិស័យសាធារណការ និងដឹកជញ្ជូន និងបានដាក់ចេញនូវគំនិតផ្ដួចផ្ដើមថ្មីៗជាច្រើនទៀតពីមួយឆ្នាំទៅមួយឆ្នាំ សំដៅធ្វើយ៉ាងណាឱ្យវិស័យនេះមានការអភិវឌ្ឍតាមទាន់ការរីកចម្រើនទាំងផ្នែកសេដ្ឋកិច្ច និងបច្ចេកវិទ្យា នៅក្នុងតំបន់ និងសកលលោក។ លើសពីនេះទៀត ឯកឧត្ដមរដ្ឋលេខាធិការបានធ្វើបច្ចុប្បន្នភាពអំពីសមិទ្ធផលសម្រេចបានរបស់ក្រសួងសាធារណការ និងដឹកជញ្ជូនក្នុងការអភិវឌ្ឍ និងធ្វើទំនើបកម្មហេដ្ឋារចនាសម្ព័ន្ធដឹកជញ្ជូនទាំងផ្នែករឹង និងផ្នែកទន់ជាបន្តបន្ទាប់ក្នុងនោះរួមមាន៖ ការដាក់ឱ្យប្រើប្រាស់ប្រព័ន្ធស្វ័យប្រវត្តិកម្មចុះបញ្ជីយានយន្ត ការត្រួតពិនិត្យលក្ខណៈបច្ចេកទេសយានយន្ត ការប្រឡងយកបណ្ណបើកបរតាមប្រព័ន្ធអនឡាញ ការបំពាក់QR codeលើផ្លាកលេខយានយន្ត ជាពិសេសកម្មវិធីថែទាំផ្លូវ (ROAD CARE Mobile App) ដែលអនុញ្ញាតឱ្យសាធារណជនបានចូលរួមចំណែកក្នុងការថែទាំផ្លូវថ្នល់ក្នុងព្រះរាជាណាចក្រកម្ពុជាផងដែរ។ ឯកឧត្ដមរដ្ឋលេខាធិការបានបន្តថា៖ តាមលក្ខខណ្ឌតម្រូវរបស់អាស៊ាន រដ្ឋជាសមាជិកនីមួយៗមិនត្រឹមតែបរិយាយតែសមិទ្ធផលថ្មីៗប៉ុណ្ណោះទេ ប៉ុន្តែត្រូវលើកឡើងពីចក្ខុវិស័យវែងឆ្ងាយ និងបញ្ហាប្រឈមផងដែរ ដើម្បីជាមាគ៌ា ឬជាផែនទីបង្ហាញផ្លូវដល់រដ្ឋសមាជិកដ៏ទៃទៀតយកទៅអនុវត្តតាម។ ជាមួយគ្នានោះផងដែរ ឯកឧត្តមរដ្ឋលេខាធិការបានស្នើឱ្យអង្គប្រជុំ ជាពិសេសអង្គភាពពាក់ព័ន្ធត្រៀម និងជ្រើសរើសនូវសមិទ្ធផលថ្មីៗចម្បងៗទាក់ទងនឹងវិស័យសាធារណការ និងដឹកជញ្ជូន ដើម្បីចងក្រងជាឯកសារ ឬជារបាយការណ៍ដាក់ជូនលេខាធិការដ្ឋានអាស៊ានធ្វើការបោះពុម្ភផ្សព្វផ្សាយជូនរដ្ឋជាសមាជិកអាស៊ានទាំងមូល៕