ភ្នំពេញ៖ ថ្ងៃសុក្រ ១កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១២ ខែកុម្ភៈ ឆ្នាំ២០២១ នៅទីស្តីការក្រសួងសាធារណការ និងដឹកជញ្ជូន ឯកឧត្ដម តូច ចាន់កុសល រដ្ឋលេខាធិការប្រចាំការ និងជាប្រធានគណៈកម្មការ បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារត្រៀមរៀបចំសន្និបាតបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ របស់ក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំ និងសមាជិកសមាជិកានៃអនុគណៈកម្មការទាំងអស់។ ឯកឧត្តមរដ្ឋលេខាធិការបានឱ្យដឹងថាការត្រៀមរៀបចំសន្និបាតបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ របស់ក្រសួង ត្រូវបានរៀបចំស្ទើរតែ១០០%ហើយ ដោយសារអនុគណៈកម្មការនីមួយៗបានខិតខំប្រឹងប្រែងបំពេញការងារយ៉ាងយកចិត្តទុកដាក់ និងមានទំនួលខុសត្រូវខ្ពស់។ ឯកឧត្ដមរដ្ឋលេខាធិការប្រចាំ បានគូសបញ្ជាក់ថា សន្និបាតនេះនឹងធ្វើឡើងតាមរយៈការចូលរួមដោយផ្ទាល់ និងតាមរយៈប្រព័ន្ធវីដេអូពីចម្ងាយ ដោយប្រកាន់ខ្ជាប់តាមវិធានការការពាររបស់ក្រសួងសុខាភិបាល ដើម្បីទប់ស្កាត់ការឆ្លងរីករាលដាលនៃជំងឺកូវីត-១៩។ គួបញ្ជាក់ផងដែរថា៖ ពិធីសន្និបាតនេះនឹងប្រារព្ធធ្វើឡើងនៅថ្ងៃទី១៦-១៧ ខែកុម្ភៈ ឆ្នាំ២០២១ ក្រោមប្រធានបទ “លើកកម្ពស់ការអភិវឌ្ឍធនធានមនុស្ស វិទ្យាសាស្ត្រ បច្ចេកវិទ្យា ដើម្បីពង្រឹងគុណភាពប្រសិទ្ធភាពក្នុងវិស័យសាធារណការ និងដឹកជញ្ជូន” ក្រោមអធិបតីភាព ឯកឧត្ដមឧបនាយករដ្ឋមន្ត្រីបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញវត្ថុ តំណាងដ៍ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ ឆ្លៀតក្នុងឱកាសនោះដែរ ឯកឧត្ដរដ្ឋលេខាធិការប្រចាំការ និងជាប្រធានគណៈកម្មការ បានសម្តែងនូវក្តីសង្ឃឹមយ៉ាងមុតមាំថា មន្ត្រីក្រោមឱវាទក្រសួងទាំងអស់ នឹងខិតខំប្រឹងប្រែងបំពេញការងារប្រកបដោយការទទួលខុសត្រូវខ្ពស់ដើម្បីឱ្យពិធីសន្និបាតរបស់ក្រសួងមានដំណើរការប្រកបដោយជោគជ័យយ៉ាងរលូនតាមការគ្រោងទុក៕