ភ្នំពេញ ថ្ងៃទី​១០ ខែកុម្ភៈ ឆ្នាំ​២០២១ -- ជំទាវ កុយ សុដានី រដ្ឋលេខាធិការ និងជាប្រធានគណៈកម្មការអន្តរក្រសួងគ្រប់គ្រងការលក់លេខរថយន្ត បានដឹកនាំកិច្ចប្រជុំគណៈកម្មការអន្តរក្រសួង ដើម្បីកែសម្រួលបទអន្តរាគមន៍សម្រាប់ចូលរួមក្នុងសន្និបាតបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ របស់ក្រសួង កាលពីថ្ងៃ​១២រោច ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអង្គារ ទី០៩ ខែកុម្ភៈ ឆ្នាំ២០២១ នៅទីស្ដីការក្រសួង​សាធារណការ និង​ដឹកជញ្ជូន។ នៅក្នុង​ឱកាសនោះ ជំទាវរដ្ឋលេខាធិការ បានមាន​ប្រសាសន៍លើកទឹកចិត្តឱ្យសមាជិកសមាជិកាទាំងអស់ របស់គណៈកម្មការអន្តរក្រសួង គ្រប់គ្រងការលក់លេខរថយន្ត ចូលរួមយ៉ាងសកម្មក្នុងការផ្លាស់ប្ដូរយោបល់ ផ្ដល់ធាតុចូលសំខាន់ៗសំដៅធ្វើយ៉ាងណា ឱ្យបទអន្តរាគមន៍នេះមានលក្ខណៈគ្រប់ជ្រុងជ្រោយឆ្លើយតបតាមស្ថានភាពជាក់ស្តែង ដើម្បីដាក់ជូនគណៈកម្មការត្រៀមរៀបចំសន្និបាតឱ្យបានទាន់ពេលវេលា។ ទន្ទឹមនឹងនេះ ជំទាវរដ្ឋលេខាធិការ ក៏បានណែនាំឱ្យសមាជិកសមាជិកាគណៈកម្មការ ពិភាក្សាឱ្យបានផុសផុលដើម្បីស្វែងរកយន្តការណាមួយសម្រាប់គ្រប់គ្រងនីតិវិធី នៃការដាក់ដេញថ្លៃលេខពិសេសផ្ទាល់ខ្លួន ឱ្យកាន់តែប្រសើរឡើងថែមទៀត សំដៅគ្រប់គ្រងចំណូលជាតិប្រកបដោយប្រសិទ្ធភាព។ ជាមួយគ្នានេះដែរ ជំទាវរដ្ឋលេខាធិការ បានសម្តែងការកោតសរសើរចំពោះ សមាជិកសមាជិកាគណៈកម្មការអន្តរក្រសួងគ្រប់គ្រងការលក់លេខរថយន្ត និងក្រុមការងារនៃអនុគណៈកម្មការទាំងពីរ ដែលបានខិតខំប្រឹងប្រែងបំពេញការងារប្រកដោយការយកចិត្តទុកដាក់ និងការទទួលខុសត្រូវខ្ពស់។ សូមបញ្ជាក់ថា អង្គប្រជុំបានពិភាក្សាយ៉ាងស៊ីជម្រៅលើចំណុចខ្លាំង ចំណុចខ្សោយ បញ្ហាប្រឈម ដំណោះស្រាយ និងសំណូមពរនៃបទអន្តរាគមន៍ ទាក់ទងនឹងការគ្រប់គ្រងការលក់លេខរថយន្ត និងនីតិវិធីនៃការដេញថ្លៃលេខពិសេសផ្ទាល់ខ្លួន ដើម្បីបង្ហាញជូនអង្គសន្និបាត ក៏ដូចជាដើម្បីជំរុញការផ្សព្វផ្សាយលើ ការលក់លេខរថយន្ត និងបង្កើនប្រាក់ចំណូលជាតិថែមមួយកម្រិតទៀតផងដែរ៕