[Rasmei Kampuchea Daily News] - ចុះអប់រំផ្សព្វផ្សាយដល់ពលរដ្ឋ សិស្ស និស្សិត អាជីវករ និងសាធារណជន ឲ្យយល់ដឹងពី ច្បាប់ចរាចរណ៍ផ្លូវគោក
ស្វាយរៀង: នាព្រឹកថ្ងៃទី៩ ខែកុម្ភៈ ឆ្នាំ២០២១ នេះ លោកស្រី ដួង វណ្ណា ប្រធានកិត្តយស សាខាកាកបាទក្រហមកម្ពុជា ខេត្តស្វាយរៀង លោក ម៉ែន វិបុល ប្រធានគណៈកម្មាធិការសាខា លោកស្រី ហៅ ច័ន្ទសិរីទេពី ចៅ ភិរុណ អនុប្រធានគណៈកម្មាធិការសាខា ព្រមទាំងមន្ត្រីជាច្រើនរូប បានសហការជាមួយ មន្ទីរសាធារណការ និងដឹកជញ្ជូនខេត្ត និងសមត្ថកិច្ចនគរបាល ចរាចរណ៍ផ្លូវគោក ចុះអប់រំផ្សព្វផ្សាយដល់ប្រជាពលរដ្ឋ សិស្ស និស្សិត អាជីវករ និងសាធារណជន ឲ្យយល់ដឹងពីច្បាប់ចរាចរណ៍ផ្លូវគោក ត្រូវពាក់មួកសុវត្ថិភាពឲ្យបានត្រឹមត្រូវ រាល់ពេលធ្វើដំណើរ បើកបរចេះអធ្យាស្រ័យគ្នា មិនបើកបរ ក្រោមឥទ្ធិពល គ្រឿងស្រវឹង និងបើកបរលើសល្បឿនកំណត់ ដើម្បីឈានទៅដល់ការកាត់បន្ថយ អត្រាពិការស្លាប់ និងរបួសធ្ងន់ ដោយសារគ្រោះថ្នាក់ចរាចរណ៍។
ក្នុងយុទ្ធនាការនេះ មានចែកជូននូវឯកសារពាក់ព័ន្ធ ខិតបណ្ណ័នានា ទាក់ទងនឹងច្បាប់ ស្តីពីសុវត្ថិភាពចរាចរណ៍ផ្លូវគោក បិទចំណាំងផ្លាត និងមានការរៀបចំ ជាកម្មវិធីសំណួរ ចម្លើយស្តីពីច្បាប់ និងសុវត្ថិភាពចរាចរណ៍ផ្លូវគោក អ្នកដែលឆ្លើយ ត្រូវទទួលបានមួកសុវត្ថិភាព អាវយឺត ពីក្រុមការងារសាខា និងមន្ទីរសាធារណការ និងដឹកជញ្ជូន ។ ជាមួយគ្នានេះ ក្រុមការងារ ក៏បានផ្សព្វផ្សាយបញ្ជ្រាបនូវ សាររបស់ក្រសួងសុខាភិបាល ពាក់ព័ន្ធទៅនឹងវិធានការ ការពារពីជំងឺកូវីដ-១៩ ដល់សាធារណជនទូទៅ ដែលកំពុងធ្វើដំណើរ លើដងផ្លូវសាធារណៈ ត្រង់ចំណុច នៅភ្លើងស្តុបសួនតាឌី នៅរង្វង់មូលមុខ សាលាក្រុងស្វាយរៀង និងនៅផ្លូវកែងទំនប់តាណេង ។
នាឱកាសនោះ លោកស្រី ដួង វណ្ណា បានបញ្ជាក់ថាៈ បញ្ហាគ្រោះថ្នាក់ចរាចរណ៍ បានបង្កនូវផលលំបាកដ៏ធ្ងន់ធ្ងរ ដល់សង្គមជាតិ ដោយបានបំផ្លាញ ទាំង ទ្រព្យសម្បត្តិ ទាំងអាយុជីវិត និងបន្សល់ទុកនូវជនរងគ្រោះ ជនពិការ ក្មេងកំព្រារ ស្ត្រីម៉េម៉ាយ គ្រួសារក្រីក្រ ។ល។ បញ្ហានេះ បានទាក់ទាញនូវ ការយកចិត្តទុកដាក់ ពីសំណាក់ រាជរដ្ឋាភិបាលកម្ពុជា ក្នុងការកាត់បន្ថយនូវ អត្រាគ្រោះថ្នាក់ចរាចរណ៍ តាមរយៈការបង្កើតគណៈកម្មាធិការជាតិ សុវត្ថិភាព ចរាចរណ៍ផ្លូវគោក ប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោក ច្បាប់ស្តីពីចរាចរណ៍ផ្លូវគោក គោលនយោបាយ និងផែនការសកម្មភាពជាតិ ទសវត្សរ៍សុវត្ថិភាពចរាចរណ៍ផ្លូវគោក រយៈពេល ១០ ឆ្នាំ ហើយការផ្សព្វផ្សាយ នាពេលនេះ ក្នុងគោលបំណងអំពាវនាវ ដល់ប្រជាពលរដ្ឋទាំងអស់ ត្រូវពាក់មួកសុវត្ថិភាព ឲ្យបានគ្រប់ៗគ្នា ទាំងអ្នកបើកបរ និង អ្នករួមដំណើពីក្រោយគ្រប់ពេលវេលា ដែលធ្វើចរាចរណ៍ តាមដងផ្លូវតាមរយៈម៉ូតូ ដើម្បីធានា សុវត្ថិភាព កុំឲ្យមានរបួសក្បាល បណ្តាលឲ្យស្លាប់ បើគ្មានមួកសុវត្ថិភាព កុំបើកបរ និងជិះពីក្រោយ ។ ត្រូវគោរពច្បាប់ ចរាចរណ៏ឲ្យបានខ្ជាប់ខ្ជួន កុំបើកបរហួសល្បឿនកំណត់ និងត្រូវបំពេញលក្ខខណ្ឌយានជំនិះរបស់ខ្លួនឲ្យបានគ្រប់គ្រាន់ ដូចជាកញ្ចក់មើលក្រោយ ចង្កៀងបំភ្លឺភ្លើង សញ្ញាបត់ ។ល។
លោកស្រី បានបន្តទៀតថាៈ គ្រោះថ្នាក់ចរាចរណ៍ កំពុងក្លាយជាឃាតក សម្លាប់ជីវិតមនុស្ស នៅលើដងផ្លូវសាធារណៈជាច្រើនបំផុត និងបង្កឲ្យប៉ះពាល់យ៉ាងខ្លាំង ដល់សុខភាពសាធារណៈ ក្នុងប្រទេសកម្ពុជា ដែលមានមនុស្សស្លាប់ និងច្រើនពាន់អ្នកផ្សេងទៀតរងរបួសធ្ងន់ ស្រាល ធ្វើឲ្យប្រទេសកម្ពុជា ខាតបង់ថវិកាច្រើន រយលានដុល្លារ ។
ដោយមើលឃើញពីស្ថានភាព នៃគ្រោះថ្នាក់ចរាចរណ៍ ពីមួយឆ្នាំ ទៅមួយឆ្នាំ មានការកើនឡើង សាខាកាកបាទក្រហមកម្ពុជាខេត្ត បាននឹងជំរុញឲ្យមាន អ្នកស្ម័គ្រចិត្ត និងយុវជនកាកបាទក្រហមកម្ពុជា ចុះសហការជាមួយ មន្ត្រីចរាចរផ្លូវគោក នៅតាមចំណុចគោលដៅ ដើម្បីផ្សព្វផ្សាយ ពីផលប៉ះពាល់ ដោយសារ គ្រោះថ្នាក់ចរាចរណ៍ និងបានណែនាំឲ្យអ្នកបើកបរទាំងអស់ ត្រូវពាក់មួកសុវត្ថិភាព ខ្សែក្រវាត់សុវត្ថិភាព និងការបើកបរ ក្រោមឥទ្ធិពល គ្រឿងស្រវឹង ។
សូមបញ្ជាក់ថាៈ នៅក្នុងយុទ្ធនាការនេះ សាខា រួមនឹងមន្ទីរសាធារណការ និងដឹកជញ្ជូនខេត្ត បានរៀបចំកម្រងសំណួរ ចម្លើយ និងចែកមួកសុវត្ថិភាព ដល់អ្នកឆ្លើយសំណួរ ត្រូវចំនួន ៦០ មួក អាវយឺត ១៨០ អាវ ម៉ាស់ ចំនួន ៣០០ សៀភៅ ច្បាប់ចរាចរណ៍ផ្លូវគោក ចំនួន ៣០០ ក្បាល សៀវភៅអ្នកបើកបរ ទោចក្រយានយន្ត ត្រូវយល់ដឹង ចំនួន ៣០០ ក្បាល ខិត្តប័ណ្ណជំនួយស្មារតី ស្ដីពីច្បាប់ចរាចរណ៍ផ្លូវគោក ចំនួន ៣០០ សន្លឹក ស្ទីគ័រថ្ងៃនេះ ថ្ងៃស្អែក កុំអោយមានគ្រោះថ្នាក់ចរាចរណ៍ ចំនួន ៣០ សន្លឹក ចងបដាអប់រំសុវត្ថិភាពចរាចរណ៍ផ្លូវគោក ចំនួន ៤ ផ្ទាំង និងចែកខិតប័ណ្ណផ្សព្វផ្សាយ ៥០០ សន្លឹក ដោយមានអ្នកចូលរួមផ្សព្វផ្សាយ និងឆ្លើយសំណួរសរុប ៤៥៥ នាក់ ស្រី ២០២ នាក់ ។ ក្នុងឱកាសនោះដែរលោកស្រី ហៅ ច័ន្ទសិរីទេពី ចៅ ភិរុណ អនុប្រធានគណៈកម្មាធិការសាខា បានឧបត្ថម្ភដល់ អ្នកចូលរួម ចំនួន ៤៥៥ នាក់ ក្នុងម្នាក់ថវិកា ១០.០០០ រៀល៕
