កំពង់ឆ្នាំង ថ្ងៃទី០៤ ខែកុម្ភៈ ឆ្នាំ២០២១ -- ផ្លូវក្រាលក្រួសក្រហមប្រវែងជាង៥គីឡូម៉ែត្រ ភ្ជាប់ពីក្រុងកំពង់ឆ្នាំង ទៅស្រុករលាប្អៀរ ត្រូវបានរដ្ឋបាលខេត្តធ្វើពិធីក្រុងពលីបើកការដ្ឋានសាងសង់នៅថ្ងៃ៦រោច ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃពុធ ទី០៣ខែកុម្ភៈ ឆ្នាំ២០២១ ក្រោមអធិបតីភាព ឯកឧត្តម ឈួរ ច័ន្ទឌឿនអភិបាលខេត្តកំពង់ឆ្នាំង និង លោកជំទាវ ដោយមានការចូលរួមពីឯឧត្តម លោកជំទាវ អភិបាលរងខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត និងប្រជាពលរដ្ឋជាច្រើននាក់ផងដែរ ។ ឯកឧត្តម ឈួរ ច័ន្ទឌឿន បានមានប្រសាសន៍ថា កំណាត់ផ្លូវដែលបានបើកការដ្ឋានសាងសង់នាពេលនេះ មាន២ខ្សែប្រវែង ៥.២៣១ម៉ែត្រចេញពីសង្កាត់ខ្សាម ក្រុងកំពង់ឆ្នាំង ឆ្ពោះទៅកាន់ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។ ផ្លូវនេះមួយខ្សែអនុវត្តដោយមន្ទីរសាធារណការនិងដឹកជញ្ជូនខេត្ត និង មួយខ្សែទៀតគាំទ្រថវិការាជរដ្ឋាភិបាលតាមរយៈរដ្ឋបាលខេត្តកំពង់ឆ្នាំ ។ ឯកឧត្តមបានបញ្ជាក់ទៀតថា កន្លងមកផ្លូវនេះជាផ្លូវលិចទឹកនៅរដូវវស្សាមួយកំណាត់ ចំណែករដូវប្រាំងពិបាកធ្វើដំណើរឆ្លងកាត់ដោយសារផ្លូវតូចចង្អៀត និងជង្ហុកច្រើន។ ដោយមើលឃើញនូវការលំបាករបស់ប្រជាពលរដ្ឋក្នុងការធ្វើដំណើរទៅមក អាជ្ញាធរខេត្តបានស្នើសុំទៅប្រមុខរាជរដ្ឋាភិបាល ដើម្បីធ្វើការសាងសង់ផ្លូវនេះតែម្តង ។ ឯកឧត្តមអភិបាលខេត្តបន្តថា ផ្លូវគឺជាចរន្តមួយក្នុងការលើកកម្ពស់កម្រិតជីវភាពរបស់ប្រជាពលរដ្ឋ និង ការចរាចរណ៍សេដ្ឋកិច្ចយ៉ាងសំខាន់ហើយបានចូលរួមកាត់បន្ថយភាពក្រីក្ររបស់ប្រជាពលរដ្ឋនៅមូលដ្ឋានផងដែរ ។ ផ្លូវមួយខ្សែនេះក្រោយពីបានសាងសង់រួចរាល់ នឹង ឱ្យប្រជាពលរដ្ឋធ្វើដំណើរ ងាយស្រួលដឹកទំនិញកសិផលនានាមកទីផ្សារ បានឆាប់រហ័សហើយការសាងសង់ផ្លូវមួយនេះ បង្ហាញពីការអភិវឌ្ឍថ្មីមួយទៀតផ្នែកហេដ្ឋារចនាសម្ព័ន្ធ ដែលផ្សាភ្ជាប់ពីស្រុករលាប្អៀរ មកក្រុងកំពង់ឆ្នាំង ដែលតំបន់នេះកន្លងមកពុំធ្លាប់ដែលមានផ្លូវបែបនេះនោះឡើយ ហើយក៏បានបង្ហាញថា ខេត្តកំពង់ឆ្នាំងកាន់តែមានការអភិវឌ្ឍបន្ថែមទៀតនៅតាមមូលដ្ឋាននានា មានផ្លូវ មានក្តីសង្ឃឹម។ ឯកឧត្តម អភិបាលខេត្ត ក៏បានផ្តាំផ្ញើដល់បងប្អូនប្រជាពលរដ្ឋដែលប្រើប្រាស់ផ្លូវនេះទាំងអស់ មេត្តាផ្តល់កិច្ចសហការ និងសម្របសម្រួលនូវផលប៉ះពាល់នានា ក្នុងការស្ថាបនាផ្លូវនេះឱ្យបានឆាប់រហ័សទៅតាមផែនការគ្រោងទុក ព្រមទាំងចូលរួមជួយថែរក្សា ដើម្បីធានាឱ្យការប្រើប្រាស់បានយូរអង្វែង និងបានណែនាំដល់គ្រប់ក្រុមហ៊ុនដែលទទួលបានសិទ្ធស្ថាបនាផ្លូវ២ខ្សែនេះ ត្រូវខិតខំស្ថាបនាឱ្យទាន់តាមពេលវេលាដែលបានកំណត់នៅក្នុងកិច្ចសន្យា ត្រឹមត្រូវតាមស្តង់ដារ និងប្រកបដោយគុណភាពខ្ពស់ ៕